Read Q'anjob'al 2 Cr 18 Bible Online

2 Cr 18 - Q'anjob'al bible

2 Cr 18

¹A Josafat tu', caw wal max aj can is beyomal, caw mimanbil max yunej. A cutz'in Acab, reyal Israel max yaoc is yalibok.

²Max ec'tok janic'ok tiempoal max toj cham Josafat bay Samaria yilon cham Acab. Axa cham, xiwil no calnel, c'al no wacax max mak' camok yuj chaon k'inal cham Josafat yetokc'al eb ajun yetok. Max yal bay tol chi oc yetok, yin yak'on owal yin Ramot yul yet Galaad.

³A yet tu' max k'anlen cham Acab reyal Israel bay cham Josafat reyal Judá axca ti': —¿Chi mi yal a c'ul chach toj wetok yet chin toj wak'on owal yin Ramot yul yet Galaad? ẍi. Max tak'wi Josafat bay axca ti': —Chi je' chin toj etok yetok masanil eb in soldado.

⁴Palta a yet c'amto chon toji, co k'anlej tzet wal yochwan Jehová, ẍi cham.

⁵Xan max wajbaj oc cham reyal Israel masanil eb chi yaloc ba chekbejok Dios, ay 400 eb yin masanil. Max k'anlen bay eb axca ti': —¿Chi mi jak' owal yin Ramot yul yet Galaad, ma c'amak? ẍi. Max tak'wi eb bay axca ti': —Ocan ak'on owal yin, yujtol a Dios ok aon oc yul a k'ab, ẍi eb.

⁶Palta max k'anlej Josafat axca ti': —¿Tom c'am junok chekbej Jehová cayti' yet chi co k'anlej bay? ẍi.

⁷Axa tak'wi cham reyal Israel tu' bay Josafat: —Ay jun chi je' k'anlen bay Jehová juj, a ton Micaías c'ajol Imla. Palta caw wal chin cak jun tu', yujtol c'am junelok chi yal tzet yetal watx' ayin, palta asanc'al yobal chi yala', ẍi bay Josafat. Palta max yalon Josafat: —Manchak al axca tu', ẍi bay.

⁸Lajwi tu' max yawten cham reyal Israel jun is chekbej, max yalon bay: —Yin wal aymanil chi toj awtej Micaías c'ajol Imla, ẍi.

⁹A eb rey tu' cawanil, ayoc is pichil eb yet reyal, chotan ay eb bay trono bay chon octok bay yul conob Samaria. Ayic' masanil eb chi yaloc ba chekbejok Dios tu' satak eb.

¹⁰A Sedequías, c'ajol Quenaana max watx'nej juntzan ch'en ch'en axca yili cacho, chi el yaw chi yaloni: Axcawal ti' yalon Jehová: A yetok juntzan cacho ti' ok ak' owal yetok eb sirio, masantac'al ok yal lajwi eb, ẍi Jehová, ẍi Sedequías.

¹¹Masanilxac'al eb chekbej tu', jun lajanxac'al yalon eb: Ocan yin ak'on owal yin Ramot yul yet Galaad, ok ayc'ay oj, yujtol a Jehová ok aon oc jun conob tu' yul a k'ab, ẍi eb.

¹²A jun chekbej max bet awten Micaías max yal axca ti': —A masanil eb chekbej Dios, watx'xac'al max yut k'anjab ba eb bay cham rey tu'. Yuj tu' xan chi wal ayach, caytu' ok ot alon axca chi yun yalon eb tu', watx'c'al ok ot aloni, ẍi.

¹³Max tak'wi Micaías, max yaloni: —Chi wak' in ti' bay Jehová, tol asan tzet yetal ok yal in Diosal tu' ayin, a' ok wala', ẍi bay.

¹⁴Lajwi tu' max oc satak cham rey, max k'anlen cham bay axca ti': —¿Watx' mi chi jak' owal yin conob Ramot yul yet Galaad, ma c'amak? ẍi bay. Max tz'ak yalon Micaías tu': —Ocan yin ak'on owal yin, toc'alta' ok ayc'ay oj, yujtol ok alay oc yul a k'ab, ẍi.

¹⁵Palta max tak'wi cham rey tu' bay axca ti': —¿Jayeltoc'al ok wal ayach tol chak' a ti' alon k'anej yel ayin yet chalon chekbanilej yet Jehová? ẍi bay.

¹⁶Lajwi tu' max yalon Micaías axca ti': Max wil masanil eb israel, toxac'al max saklemcantok eb bay jolomlak witz axca calnel tol c'am yilomal, xan max yal Jehová ayin: A juntzan ti' c'amxa mac chi ikban eb; junjunxac'al meltzojokab bay yatut, ẍi Jehová, ẍi Micaías.

¹⁷Xan max yal pax cham reyal Israel bay Josafat axca ti': —Ila wal max wal ayach, tol a jun winak ti' c'am bay chi yal junok tzet yetal watx' ayin, palta asanc'al yobal chi yala', ẍi bay.

¹⁸Maxto wal yal cham Micaías janic'xa. Abek wal is k'anej Jehová xin. Max wila' tol chotan ay Cham yul is trono; masanil eb ejército yet satcan lecan oc eb bay yinlak.

¹⁹Axa yak'on Jehová is k'anlebal tu': ¿Mactxel chi toj iptzen Acab, reyal Israel, yet chi oc yin yak'on owal yin conob Ramot, yet chi cam bay tu'? ẍi Jehová. Tx'ok tzet chi yal juntzan eb, tx'ok pax tzet chi yal juntzanxa eb.

²⁰Palta ay jun espíritu max oc satak Jehová, max yaloni tol a' chi toj ak'on yunej. Max k'anlen Jehová bay yuj tzet ok yutej.

²¹Max yalon jun espíritu tu' tol ok yak' yal masanil eb chekbej tu' lek'tial bay cham rey. Max yalon Jehová: Ok ton je' oj axca tu xin, asi', ẍi bay.

²²A tinani' xin, ojtakxa tol a Jehová max chatek jun espíritu lek'ti' yin eb chekbej ti', caywal tu' ok yun titcan eban, ẍi Micaías tu'.

²³Xan max jitztek ba Sedequías, c'ajol Quenaana c'atan Micaías, cax max mak'ontok sat, max yaloni: —¿Tzetbil max yun yel Yespíritu Jehová win yin toj k'anjab ayach? ẍi.

²⁴Max tak'wi pax cham Micaías bay: —Ok nachaj el oj yet jun c'ual, yet toxac'al ok ach ec' a say bay watx' ok a c'ubaj el a ba, ẍi.

²⁵Max yalon cham reyal Israel axca ti: —Mitx'ek Micaías ti', che yiontok bay Amón is gobernadoral conob, c'al bay satak Joás in c'ajol.

²⁶Che yaloni tol ayin chi wala' tol chi oc preso; jabjab ch'an lobej, c'al yuc'a' chi ak'layi, masantac'al yet ok in meltzoj yin tzalojc'ulalil, ẍi.

²⁷Maxto yal Micaías janic'xa: Tatol yin tzalojc'ulal ok ach meltzojtek, tita' tol manak Jehová chi k'anjab el win chi yal tu', ẍi bay. Maxto yal c'apaxok: Abek e masanil ex conoblak, ẍi.

²⁸Caytu' max yun toj cham reyal Israel, c'al cham Josafat reyal Judá yin owal yin conob Ramot yul yet Galaad.

²⁹Max yalon cham reyal Israel bay cham Josafat axca ti': —A yet ok in oc xol owal tu', ok in q'uexil in pichil; a pax ach ti' xin, ayokabc'al oc a pichil yet a reyal tu', ẍi. Xan max q'uexil cham reyal Israel is pichil, axa toj eb cawanil yin owal tu'.

³⁰Palta a cham reyal Siria mayal yal bay eb capitán yayji yin carruaje yet owal, tol c'am chi oc eb yak'on owal yin junokxa mactxel, palta asan yin reyal Israel.

³¹A yet max yilon eb capitán tu' yin cham Josafat, max na eb tol a cham reyal Israel tu', xan max yoy ba eb yin, yet chi yak'on eb owal yetok yalon eb. Axa yaj yaw cham Josafat k'anon colwal, cax max col-lay yuj Jehová. A Cham max ion el eb capitán tu' yin.

³²A yet max yilon eb tol manak reyal Israel tu', max bek eb yak'on owal yin.

³³Palta ay jun soldado comonc'al max jultok is julbal, palanc'al yasji cham reyal Israel tu'. A bay chi nublej ba is colbalba ayocok, a tu' max low jun julbalej tu'. Axa yalon cham bay mac inej oc carruaje tu' axca ti': —I meltzoj carruaje ti', chin eon el xol owal ti', yujtol caw wal miman max yun in lajwi, ẍi bay.

³⁴Caw wal ow max yun yoc owal yet jun c'ual tu', maxtoc'al tec'baj ba cham reyal Israel yoc waan satak eb sirio bay yul is carruaje, masantac'al yet yayxa wal c'u. Axa yet max tojxac'al c'u xin, max cam cham.