Read Q'anjob'al 2 Cr 2 Bible Online

2 Cr 2 - Q'anjob'al bible

2 Cr 2

¹Max nabalnejxac'al el Salomón watx'nen aj is despacho, c'al yetok is templo Jehová.

²Max sic'can el 70,000 eb iktzom, 80,000 eb mak'om poj ch'en bay jolomlak witz, c'al 3,600 eb caporal chi ikban mulnajil tu'.

³Lajwi tu' max yalontok cham rey Salomón bay Hiram reyal Tiro axca ti': Chi mi je' chak' te te' ayin axca max on yetok in mam yet max watx'nen aj is yatut bay max cajayi.

⁴Ilab tol ok in watx'nej aj jun templo yet Jehová co Diosal on, tol yet yayji ocok, yuj wak'on tz'a perfume, yuj wion aj can Cham, c'al yuj yay txolan ixim pan satak, c'al yuj yak'lay tz'a xajanbal yet k'inibalil, c'al yet yayc'ualil, ac'ala' c'apax yet c'ual xewilal, yetok yet k'in yet unin xajaw, yetokc'al juntzanxa k'in chi chalayc'alta' yuj jion can Jehová co Diosal on atac'ala' chekbanilej ak'bil ayon israel on ti', yin tojbalk'inal.

⁵Palta a jun templo ok in watx'nej aj tu', yowalil tol miman ok yunej, yujtol a co Diosal on, yelxac'al miman yintak masanil juntzan dios.

⁶Palta xin, ¿mac wal junok ok je' watx'nen aj junok is templo? Yujtol a satcan, miman yayji ocok; palta c'am chi yab bay chi ayji Cham. Yuj tu', tokwal ok je' in watx'nen aj junok templo bay chi je' yayji ec' Jehová; asan mi junok lugar bay chi ak'lay tz'a incienso satak Cham.

⁷Yuj tu' xan atek junok winak jelan mulnaj yin oro, yin plata, yin bronce, c'al yin hierro, c'al yin an tx'al púrpura, cak tx'al, c'al yetok yax tx'al, tol chi je' c'apax yuj watx'nen oc yechelej yin tzanc'al tzet yetal. A' ok colwaj yetok eb tol meẍtol yin juntzan tu' ay bay Judá, c'al bay Jerusalén ti'. A eb tu' ayic' eb wetok cayti', a ton eb tu' max sic'laycan oc yuj in mam.

⁸Cax chaon c'apaxtek te te' ay bay Líbano ayin, a ton te c'ute', te q'uisis, c'al te sándalo, yujtol wojtak tol jelan eb a mulnajwom yin k'akoj te'. Axa eb in mulnajwom ayin ti', ok colwaj eb yetok eb et tu' yin wajban oc

⁹mimanok te te', yujtol a jun templo ok in watx'nej aj tu' caw wal miman ok yunej, tx'okxa ok yun yili.

¹⁰Ok watok 60,000 quintal ixim trigo, ac'ala' axca c'apax tu' ixim cebada, 110,000 galón vino; ac'ala' axca c'apax tu' aceite, yuj is gasto eb a mulnajwom tu', ẍitok Salomón.

¹¹Lajwi tu xin, max yaontek Hiram reyal Tiro jun carta bay Salomón bay max yal axca ti': Ach rey Salomón, a Jehová max ach aon oc yin reyal bay Israel tu', yujtol caw wal ay is camc'ulal yin is conob.

¹²Xan al-layokab watx' k'anej yin Jehová Diosal Israel, Cham max watx'nen satcan, c'al sat tx'otx' ti', yujtol a' max ach sic'on el xol eb oẍtak ayex ton c'ajol ex cham rey David, tol caw wal aj nabal ach, cuywinak ach wal yin jelanil, tol ok a watx'nej aj jun is templo Jehová c'al yetok junok a despacho.

¹³Ti' chi watok jun winak tol caw wal jelan, caw wal aj nabal: a ton Hiram tol meẍtol yayji.

¹⁴A jun ti' yune' jun ix ix titnak yin is tribual Dan, cax aj conob Tiro ti' is mam. A jun ti' caw wal jelan mulnaj yin oro, plata, bronce, hierro, c'al yin ch'en ch'en; chi je' c'apax mulnaj yin te', yin tx'al púrpura, yax tx'al, c'al yin cak tx'al, c'al yin lino. Tol jelan watx'nen masanil yechelej. Chi je' c'apax nabalnen el tzetbil chi yun yili junok mulnajil, tzanc'al tzet chi k'anlay bay. Ok ayjok ec' yetok eb a mulnajwom tol jelan, a ton eb toltac'a chi mulnaj yetok a mam, cham tol miman yelapnok yul in sat.

¹⁵Yuj tu xin chi wala': atek ixim trigo tu' ayon, ixim cebada, yetok aceite c'al vino max ala' tol ok ak' tu'.

¹⁶Yak'ban tu', ayon ti', ti wal ok jiel te te' bay Líbano jantak te' tol ok oc yopiso oj, cax ok co c'alon ay te', ok jaon oc yiban a' mar, masantac'al bay Jope. Achxa ok etok te' bay Jerusalén, ẍitok Hiram reyal Tiro bay Salomón.

¹⁷Max lajwi tu xin, max yion aj Salomón is bisil masanil eb tx'ok conobal cajan ec' bay xol conob Israel tu', tx'ok pax max yun bislay eb yuj is mam. Axa is bisil eb max aj xin, 153,600 eb yin masanil.

¹⁸Max oc 70,000 eb tu' yin iktzomal, yetok 80,000 eb mak'om poj ch'en bay jolomlak witz, c'al 3,600 eb caporal, a ton eb chi ak'on mulnajil eb mulnajwom tu'.