Read Q'anjob'al 2 Cr 20 Bible Online

2 Cr 20 - Q'anjob'al bible

2 Cr 20

¹Lajwi yeq'uel jun tiempoal, a eb moabita, c'al eb amonita max junanej ba eb yetok eb meunita, max oc eb yak'on owal yin Judá.

²Caytu' max yun jayoc jaywanok winak yalon bay cham Josafat reyal Judá axca ti': A bay Edom yetokc'al bay junxa k'axepaltok a' Mar Muerto, a tu' chi tit jun miman bulan soldado en. Ayxa ec' eb bay conob Hazezón-tamar, ẍi eb. (A jun conob tu' ac'al oc chi yik c'apax En-gadi.)

³Caw wal max xiwaj cham Josafat; max naoni tol chi yaoc ba yul k'ab Jehová, xan max yala' tol chi oc masanil anima yul yet Judá yin c'ajbanc'ulal.

⁴Max tit eb anima ay bay junjun conoblak ay yul yet Judá yin k'anon eb colwal cham yetok.

⁵Yuj tu xin, max aj wan cham rey Josafat xol masanil eb anima wajan ec' bay Jerusalén tu' bay sat jun ac' yamak'il templo Jehová.

⁶Max aj yaw cham max yalon axca ti': Ach Jehová co Diosal ach, yetok eb jichmam on, ach ti' Dios ach bay satcan, Yajaw ach c'apax yiban masanil nacionlak. Yul a k'ab, a tu' ay ipejal c'al ikbejal. Tok ay mactxel chi je' ach tenon oc wanajok.

⁷Ach co Diosal, ach max a k'okcan el juntzan anima cajan sat tx'otx' ti' co satak ayon a conob Israel on ti'. Yin tojbalk'inal max ak' tx'otx' tx'otx' ti' ayon, yinatil on Abraham a watx'il anima.

⁸A yet mayal cajay eb jichmam on cayti', max watx'nen aj eb jun templo ayach, max yalon eb axca ti':

⁹Tatol chi jayoc junok yailal jiban yuj co yobtakil, axca owal, ilya', ma wajil, ok on jayoc a satak bay a templo ti'. A nan xol co yailal tu' ok co k'anon a colwal, ok ab co tewilal, axa on a colon tu', ẍi eb.

¹⁰A tinani', ilabi ayic' eb amonita, eb moabita, yetokc'al eb cajan bay siquilal tx'otx' yul yet Seir, a ton bay tx'otx' tx'otx' eb maj yal a c'ul max on octok ayon israel on tu', yet max on tit bay Egipto; palta tol max co q'uexbenej co ba, maj jak' lajwok el eb.

¹¹Axa tinani' xin, a chi yun paktzen eb ayon yuj maj jiec' tx'otx' eb tu', chi yochej eb chi oc yak'on owal jin yet chon yiel eb bay tx'otx' tx'otx' tol et max ak' co sataknej.

¹²Yuj tu xin, ach co Diosal, elok wal yin a c'ul chaoc yailal yiban eb xin, yujtol ayon ti', caw wal c'am jip chi jabej, yet chi je' co tec'ban co ba on satak jun miman bulan soldado tu', yet chi jak' owal yetok. Caw wal man jojtakok tzet wal chi jun on; yuj tu' xan a wal en ay oc co nabal, ẍi cham rey bay Jehová.

¹³Masanil eb Judá, lecan ec' eb satak Jehová, yetok masanil yistzil eb, c'al yuninal eb, ajun eb yaliẍ unin c'apaxok.

¹⁴A yet wajan ec' masanil eb conob tu', max oc Yespíritu Jehová yin jun levita yinatil Asaf, chi yik Jahaziel, c'ajol Zacarías, is yitxiquin Benaía. A Benaía tu', c'ajol Jeiel, is yitxiquin Matanías.

¹⁵Max yalon cham Jahaziel tu' axca ti': Abek wal xin, ex cajyom ex bay Judá, c'al bay Jerusalén, yetok c'apax ach rey Josafat. Ẍi wal Jehová axca ti': C'am chex xiwi, tamwal cabax aj e c'ul yuj jun miman bulan soldado tu', yujtol a jun owal tu', man e yetok ayex ti', palta wet.

¹⁶A yet yecal chex aytok e yak'on owal yin eb. Ok ajtek eb bay witzal yet Sis, axa ayex ti', ok e chalej e ba yetok eb bay chi tit a' elom aej bay tilak tz'inan tx'otx' yet Jeruel.

¹⁷Mayexnak ok e yak' owal tu', palta toc'al ok ex ayjok ec' bay tu', c'amc'al tzet ok e yunej, toc'al ok e yila' tzet ok yun ex in coloni, ẍi Jehová. Yuj tu' xan a e masanil ex cajan ex bay Jerusalén c'al bay Judá, c'amc'al chex xiwajok, tamwal cabax aj e c'ul. Yecal chex toj yin eb, yujtol a Jehová ayoc e yetok, ẍi cham Jahaziel.

¹⁸Yuj tu xin, max ay jajan cham Josafat, max ay nojan sat tx'otx'; max ay c'apax nojan masanil eb anima cajan bay Judá c'al bay Jerusalén yin ayilal satak Jehová.

¹⁹Axa yaj wan eb levita, eb yinatil Coat yetok eb yinatil Coré; caw wal can max yun yaj nuk' eb bitni bay Jehová is Diosal Israel.

²⁰Axa yet k'inibalil yet junxa c'ual xin, max aj wan eb masanil, max toj eb bay beal tz'inan tx'otx' yul yet Tecoa. A wal yet max toj eb tu', max oc lecan cham rey Josafat, max yalon bay eb axca ti': Abek tzet ok wal xin, ex aj Jerusalén c'al ex aj Judá: Aek wal oc e c'ul yin Jehová co Diosal cax c'am tzet ok on onok, che yaon wal oc eb chekbej Dios ti' yipok e c'ul, axca tu xin, watx'c'al ok yun jelocok, ẍi bay eb.

²¹A yet mayal k'anjab cham yetok eb conob tu', max sic'on el juntzan eb bitnom. Max yaon oc eb pichil chi k'anc'alta' eb yet chi bitni yet k'in; axa toj eb satak eb soldado tu'. Chi yalon eb watx' k'anej bay Jehová yin bital axca ti': Jalek yuj diosalil bay Jehová, yujtol ayc'al ec' is camc'ulal yin tojbalk'inal, ẍi eb.

²²A wal yet max chaon el eb yich bitnen bit yin tzalojc'ulal tu', axa Jehová max aon oc uchlejbail xol eb amonita, c'al eb moabita, yetokc'al xol eb max tit bay siquilal tx'otx' bay Seir yin yak'on owal yin Judá, xan max ayc'ay eb.

²³Yujtol a eb amonita yetok eb moabita max oc eb yak'on owal yin eb max tit bay Seir, max lajwi eb tu' yuj eb. Lajwi tu', axac'al oc eb max yak'lej lajwok ba.

²⁴Axa yet max apni oc eb winak yet Judá bay lugar bay txequelxa tok tz'inan tx'otx', max toj sat eb yiban eb soldado ajc'ul tu', asanxanej camnak latz'an ay max yil eb, c'amxa junok max elcanok.

²⁵Xan max toj cham Josafat yetokc'al is soldado ibil oc yuj, yin toj yion aj eb masanil tzet yetal max can yuj eb ajc'ul tu'. Max ilchaj pichilej, c'al juntzanxa tzet yetal tol can is tojol. Yuj tu' max yi' eb xiwil tzet yetal, palta aytoc'al majxa tzakay eb yiontek. A jantak tzet yetal max yitek eb tu', oxeb wal c'u max yak' eb wajban ajok.

²⁶Axa yet is can c'ual xin, max wajban oc ba eb bay jun jobe. A bay tu' max yal eb watx' k'anej bay Jehová. Yuj tu' xan max yak' eb yik jun lugar tu', Jobeal yet Beraca, (Beraca chi yal elapnok aloj watx' k'anej). Ac'ala'c'al bi jun lugar tu' tinani'.

²⁷Max lajwi tu xin, yinxac'al tzalojc'ulal max yun babji Josafat yin meltzojtek yetok eb aj Judá c'al eb aj Jerusalén, yujtol a Jehová max ak'on tzalojc'ulal bay eb yuj max ayc'ay eb ajc'ul tu'.

²⁸A yet max jayoc eb bay Jerusalén, max toj eb bay templo Jehová yetok sonal te salterio, te cítara c'al trompeta.

²⁹A yet max ablayi tol a Jehová max yak' owal yin eb ajc'ul yin Israel, masanil juntzanxa nación max oc miman xiwc'ulalil yin eb.

³⁰Yuj tu' ay junc'ulal yul is makbej cham Josafat, yujtol a Dios max ak'on junc'ulalil bay, yetok juntzanxa nacionlak ay bay is cawilal tu'.

³¹35 abil is k'inal cham Josafat yet max chaon el yich yak'on reyal bay Judá, 25 abil max yak' reyal bay Jerusalén. A is txutx chi yik Azuba is cutz'in Silhi.

³²A cham Josafat tu', watx'c'al max yut ba axca max yut ba cham Asa is mam. A masanil tzet yetal max yunej, caw wal tojolc'al satak Jehová.

³³Palta juntzan lugar yet ayilal bay can ayajok, majc'al yielok, yujtol man masanilok eb conob tec'anxa is nabal tzakloj yintak Diosal eb yetok yichmam.

³⁴A janic'okxa is yabixal yettaxc'al max el yich, masantac'al is lajubal, a tu' tz'ibbil bay yul tx'an un yet Jehú, is c'ajol Hanani, junnej yayji yetok tx'an yunal yabixal eb reyal Israel.

³⁵Axa yin tzunanil max watx'nej cham Josafat is trato yetok Ocozías, reyal Israel. A jun rey tu', caw wal yob is nabal.

³⁶Max wajan watx'nen aj eb juntzan barco axca juntzan chi toj bay conob Tarsis. A tu' max watx'nej aj eb bay conob Ezion-geber.

³⁷Yuj tu xin, a Eliezer aj Maresa, c'ajol Dodava max alon el jun k'anej ti' yin cham Josafat: A Jehová ok yak' coc'axtok masanil tzet yetal max a watx'nej ti', yujc'al wal tol junej max ot a mulnajil yetok cham Ocozías, ẍi. A yet tu', max coc'axtok juntzan barco max watx'nej eb tu', majxa je' toj te' yin is viaje.