Read Q'anjob'al 2 Cr 25 Bible Online

2 Cr 25 - Q'anjob'al bible

2 Cr 25

¹25 abil is k'inal Amasías yet max oc yin reyal; 29 abil max yak' reyal bay Jerusalén. A is txutx chi yik Joadán, aj Jerusalén xal.

²A tzet yetal max yun Amasías, watx' yul sat Jehová, asan xin, man wal yinok masanil c'ul max yuneni.

³A yet max yion yip is yikbej tu', max mak' cam eb ayoc yin yajawilal, eb max mak'on cam is mam.

⁴Palta maj mak'lay cam eb is c'ajol eb yuj, yujtol tz'ibbilcan bay tx'an yunal ley yet Moisés, bay max yal Jehová: A eb mamej c'am chi je' cam eb yuj tzet yetal chi yun yuninal eb, tamwal eb uninalej chi cam yuj tzet yetal chi yun is mam eb; palta junjunc'al chi cam yuj is mul, ẍi.

⁵A Amasías tu' max wajbaj oc masanil eb winak yet Judá c'al eb yet Benjamín. Max sic'lay oc yin makquiltakil, atac'ala' yinatil. Max yaon oc eb yajaw yin mil c'al yin cien; max yion aj bisil eb ayxa 20 abil is k'inal chi beyc'altok. Axa max yun xin, tol 300,000 eb tiempoalxa toj yin owal, chi je' k'anon eb lanza c'al makbal julbalej.

⁶Max k'anon c'apax 100,000 soldado bay Israel; 80 quintal ch'en plata max yak' tojolok.

⁷Palta a yet tu', ay jun chekbej Dios max apni oc satak cham Amasías, max yalon bay axca ti': —Ach rey, manchak aoc eb soldado yet Israel etok, yujtol a Jehová c'am oc yetok eb tu', c'am c'apax oc yetok eb yet Efraín.

⁸Caxc'al mi cha na' tol a yuj eb tu' xan ay ep yin owal, palta a Dios ok ach ak'on ayc'ay satak eb ajc'ul, yujtol a Cham ay yipalil yin colwaji c'al yin yak'on lajwok, ẍi.

⁹Axa k'anlen Amasías bay jun chekbej Dios tu' axca ti': —Palta ¿tzet yetal ok yun pax ch'en 80 quintal plata max wak' bay eb israel? ẍi. Max tak'wi pax jun chekbej Dios tu' bay: —A Jehová chi je' yak'on ec'ban yintak ch'en tu' ayach, ẍi bay.

¹⁰Lajwi tu xin, a Amasías max chekon pax eb soldado max tit bay yul yet Efraín bay yatut; palta max tit yowal c'ul eb yin eb yet Judá, caw wal ow eb yet max meltzoj eb.

¹¹Caytu' max yun yion yip cham rey Amasías, axa toj yetok is soldado bay jobeal yet atz'am. A bay tu' max mak' cam 10,000 soldado aj Seir.

¹²Ac'ala' eb Judá max mitx'on c'apax junxa 10,000, max yiontok eb bay jolom junok witz caw wal satlak ch'en yeq'ui. A bay satlak ch'en tu' max tenlay el eb yuj eb, coc'xac'al max yuntok eb.

¹³Axa pax eb soldado maj chalaytok yuj Amasías tu' yin owal, palta tol max ak'lay meltzojcan eb yuj bay yatut, max yak'on can lajwok eb jayeb conob yul yet Judá, chi tojtac'al bay Samaria masantac'al bay Bet-horón. Max mak' cam eb 3,000 anima, max yelk'anentok eb xiwil tzetak yetal.

¹⁴A yet max meltzojtek Amasías, yet mayal yak' ayc'ay Edom, max yitek juntzan dios yet Seir, max yaon oc is diosalok. Max oc yin ayilal bay, c'al yak'on tz'a incienso bay.

¹⁵Caytu' max yun tit yowal Jehová yin, xan max chektok jun is chekbej yalon bay cham rey: —¿Tzet yuj xan chach oc yin ayilal bay juntzan comon dios tol maj je' yuj colon el is conob yul a k'ab? ẍi.

¹⁶A yet max yalon jun chekbej Dios tu', axa tak'wi cham rey tu' axca ti': —Tokwal max jal ayach tol ach ok aoc in nabal ayin rey in ti'. Bek alon juntzan tzet yetal tu', ¿ma chi yochej a c'ul chach mak'lay camok? ẍi bay. Axa jun chekbej Dios tu' majxa teyej ocok, asanxanej max yal bay axca ti': —Wojtak ayin ti' tol nabilxa yuj Dios tol ok ach yak' lajwok, yujtol c'am chekej tzet chi wal ayach ti', ẍi bay.

¹⁷Palta a Amasías reyal Judá, max k'anlej is nabal bay juntzanxa ak'om nabalej, xan max chek toj al-lay bay Joás c'ajol Joacaz, yitxiquin cham Jehú, reyal Israel: Sebach, jak'lej owal, ẍitok bay.

¹⁸Palta a Joás max yaltok juntzan k'anej ti' bay: Ay jun sak q'uix max yaltok bay jun c'ute' yet Líbano: Ak' ix a cutz'in yistzilok in c'ajol, ẍitok. Palta ay jun no chiwajwom no' max ec' bay tu'. A no' max tec'on ay jun q'uix tu'.

¹⁹Ach ti' cha maynej a ba yujtol mayal ayc'ay eb edomita oj. A yuj tu' xan chochej cha say tzetbil chi yun elay can. Palta yelxac'al watx' tol chach canc'al bay atut, ¿tzet yuj xan chi yochej a c'ul chetek junok yailal eban, c'al yiban conob Judá? ẍitok Joás tu' bay.

²⁰Palta a Amasías maj cha yab axca tu', yujtol a Dios mayal na tol ok ocxac'al yul k'ab Joás, yuj wal tol a bay juntzan diosal eb edomita chi oc yin ayilal.

²¹Caytu' max yun toj Joás yak'on owal yin Amasías; a tu' max chalej ba yetok bay Bet-semes, a yul makbej Judá ay jun tu'.

²²Max ayc'ay Judá tu' yuj Israel, max elaj eb soldado aj Judá tu', max tojcan eb bay yatut.

²³Max michchaj Amasías, cham reyal Judá bay Bet-semes tu' yuj Joás, cham reyal Israel. Lajwi tu' max ilaytek bay Jerusalén. A bay tu' max uchlay ay muralla yuj eb israel. Ay mi junok 180 metro max yuchay eb, max tojtac'al bay puerta yet Efraín, masantac'al bay puertail txiquin jun muralla tu'.

²⁴Axa yiontok masanil ch'en oro, c'al ch'en plata yetokc'al juntzanxa tzet yetal ay bay yul templo Dios, a ton juntzan chi taynelay yuj eb yinatil Obed-edom, c'al masanil jantak beyomal ay bay is despacho cham rey. Max yitok juntzan anima yetok bay Samaria, yuj yak'on pural Amasías yoccan yin watx'c'ulal yetok.

²⁵15 abilto max ec' Amasías, c'ajol Joás, yin reyalok Judá, yet mayal cam Joás, c'ajol Joacaz reyal Israel.

²⁶A janic'okxa is yabixal Amasías yet max el yich c'al is lajubal, a tu' tz'ibbilcan bay yul tx'an yunal yabixal eb reyal Judá, c'al eb reyal Israel.

²⁷Atax wal yet max yion el ba Amasías yin Jehová, atax yet tu' ay eb max c'oli naon tol ok mak' cam eb; c'ojanc'ulal xin, max elajok axa tojcan bay conob Laquis, palta max tzakloj eb ajc'ul yintak bay jun conob tu'. A bay tu' max yak' cam eb.

²⁸Lajwi tu' max yiontok eb is mimanil yiban chej, max mukon eb bay mukan eb yichmam cham bay conob David.