Read Q'anjob'al 2 Cr 28 Bible Online

2 Cr 28 - Q'anjob'al bible

2 Cr 28

¹20 abil is k'inal Acaz yet max oc yin reyal. 16 abil max yak' reyal bay Jerusalén, palta man watx'ok tzet max yun satak Jehová, man axcaok David is yichmam.

²Max beybalnej is beybal eb reyal Israel; max watx'nej ch'en ch'en chi chac'layi yin yechelok Baal.

³Max yak' tz'a incienso bay jobeal yet Ben-hinom, max yak'on c'apax tz'a is yuninal yin xajanbalil, axca wal is yob beybalil juntzan nacionlak max ilay el satak eb israel yuj Jehová.

⁴Yetok c'apaxok, max yak' tz'a xajanbal c'al yak'on tz'a incienso bay lugarlak bay can ayajok, c'al bay yichlak te te' caw wal pim xak.

⁵Yuj tu' xan max alay oc yul k'ab cham reyal Siria yuj Jehová Dios, caw wal xiwil mac max ilaytok preso bay Damasco. Yetok c'apaxok, max beklay c'apax yuj Jehová yul k'ab Peka c'ajol Remalías, reyal Israel. A' max mak'on cam 120,000 soldado caw wal tec'an yet Judá yin junnej c'ual, yujtol max bekcan eb Jehová is Diosal ac'al ton a' Diosal eb yichmam eb.

⁷Ay jun soldado yin yinatil Efraín chi yik Zicri, a' max mak'on cam Maasías c'ajol cham rey, yetok Azricam ikbajwom bay despacho, c'al yetok Elcana, cab yajaw yayji bay despacho cham rey.

⁸Caxc'al yet conob ba eb yetok eb israel, palta max ilaytok 200,000 eb ix ix, c'al eb unin yuj eb yin presoal bay Samaria, yetok xiwil tzet yetal.

⁹A bay tu', ay jun is chekbej Dios chi yik Obed. A jun tu' max eltek satak eb soldado yet max apni oc eb bay Samaria tu'. Max yalon bay eb axca ti': —Ilabi, a Jehová co Diosal, ac'al ton a' is Diosal eb jichmam; yuj wal yowal c'ul yin Judá xan max yaoc eb yul e k'ab, axa ayex ti' tol max e mak' cam eb yin c'amxac'al yabenc'ulal. A jun e mul tu', yojtak Dios tzet max e yunej.

¹⁰Axa tinani', che na' tol che yaoc eb aj Judá yetok eb aj Jerusalén e mosook. Tokwal c'am c'apax e mul ayex ti' satak Jehová.

¹¹Abek tzet ok wal xin: a tinani', ak'ek meltzoj masanil eb e yet israelal max e yitek yin presoal ti', yujtol mayal caktzaj tit yowal Jehová e yin, ẍi cham Obed.

¹²Caytu' max yun yaj wan eb yajaw yayji xol eb yinatil Efraín, a ton Azarías c'ajol Johanán, Berequías c'ajol Mesilemot, Ezequías c'ajol Salum, c'al yetok Amasías c'ajol Adlai, a ton eb tu' max oc satak eb max jayoc yin owal tu'.

¹³Max yalon eb axca ti': —Manchak e yitek eb aj preso tu' cayti', yujtol mayal oc co yobtakil bay Jehová. Mayal caktzaj tit yowal c'ul jin, axa ayex ti' che yochejc'al che say tzet chi yun yaj can co yobtakil satak Cham, ẍi eb.

¹⁴Yuj tu xin, a masanil eb soldado max bekoncan masanil eb aj preso tu', c'al yetok masanil tzetak yetal max bet yitek eb bay satak eb yajawilal conob, yetokc'al satak masanil anima.

¹⁵Yuj tu' xan max aj wan eb canwan winak mayal binaji, max il-lay eb aj preso tu' yuj eb. A xol masanil tzetak yetal max bet yitek eb soldado yetok eb, a tu' max ilay ajtek pichilej max alay oc yin eb t'iran elok. Max alay c'apax oc xanab eb, max ak'lay low eb, c'al yuq'uena' eb. Max antelay eb yas yayji yetok aceite. Lajwi tu', a eb c'amxa chi je' beyi, max alay ajtok eb yiban no burro, max bet yak'can eb bay Jericó, a ton bay conobal an palma, bay cawilal eb yet conob eb. Lajwi tu' axa meltzojtok eb bay Samaria tu'.

¹⁶A yet jun tiempoal tu' max k'an cham rey Acaz is colwal cham reyal Asiria.

¹⁷Yujtol a eb aj Edom max jayoc eb ul yak'on owal yin Judá, cax xiwil eb max ilaytok yin presoal yuj eb.

¹⁸Cay c'apax tu' eb filisteo, max yitok tzetak yetal ay bay juntzan conoblak bay yichlak witz, c'al bay sur yul yet Judá: a ton Bet-semes, Ajalón, Gederot, Soco, Timna c'al Gimzo, yetokc'al yaldeail junjun. Lajwi tu' max jayoc cajan eb bay tu'.

¹⁹Max ilay ay Judá yuj Jehová, yujtol a Acaz reyal Judá tu', max ikbantok eb anima yin mimek yobtakil; caw wal tenomtak max yut ba cham bay Jehová.

²⁰Max jay c'apax oc Tiglat-pileser reyal Asiria. A' max ak'onxac'al ayc'ayok, maj colwaj jabok.

²¹Max wajbaj eltek Acaz tzetak yetal can tojol bay templo Jehová, c'al bay despacho eb rey, c'al bay na eb yajaw yayji bay tu', yuj yak'on bay cham reyal Asiria, palta nabac'al, maj colwaj jabok.

²²Caxc'al miman yailal max jayoc yiban, palta a Acaz tu', max ajc'al can yaon oc is yobtakil satak Jehová.

²³Yujtol aynakxa c'ay yuj eb sirio, max yak' tz'a cham xajanbal bay is diosal eb, max yalon axca ti': Yujtol a diosal eb sirio chi colwaji, yuj tu' xan ok wak' xajanbal bay ayin ti', yet watx' ok colwaj wetok, ẍi Acaz. Caywal tu' max yun cancan yalan yetok masanil eb yet conob.

²⁴Yetok c'apaxok, max wajbaj aj cham rey Acaz tu' mitx'k'abej bay templo Dios, cax max mak'on pojok. Max makchencan templo tu', axa watx'nen aj altar bay txiquinlak calleal bay Jerusalén.

²⁵Max watx'nen c'apax aj juntzan altar bay can ayajok bay yul conoblak Judá. A bay tu' max yak' tz'a incienso bay comon dios. Caytu' max yun tx'emontek yowal c'ul Jehová Diosal is yichmam.

²⁶Axa masanil tzet yetal max yun xin, yet yichbanil c'al yet lajubal, a tu' tz'ibbilcan ay bay tx'an yunal yabixal yet eb reyal Judá, c'al Israel.

²⁷Max cam Acaz xin, max mukay bay conob Jerusalén, palta man junejok max mukay yetok eb rey. Axa Ezequías is c'ajol, max occan yin reyal is q'uexelok.