Read Q'anjob'al 2 Cr 29 Bible Online

2 Cr 29 - Q'anjob'al bible

2 Cr 29

¹25 abil is k'inal Ezequías yet max oc yin reyal. 29 abil max yak' reyal bay Jerusalén. Abías bi is txutx, is cutz'in cham Zacarías.

²Watx'c'al tzet max yun satak Jehová, axca wal is beybal cham David is yichmam.

³A yet babel xajaw yet babel abil yoc yin reyal, max jakon puertail templo Jehová cax max ca watx'nen ajok.

⁴Max wajbanelay oc eb sacerdote c'al eb levita yuj bay yamak'il templo bay yetc'ulal yichcan.

⁵Max yalon c'apax axca ti': Ex levita, abek tzet ok wala': Watx'nejek e ba, cax che watx'nen c'apax el is templo Jehová, a ton co Diosal yetok eb jichmam. Iek eltek masanil tzet yetal man watx'ok bay yul is cajlobal Cham.

⁶Yujtol a eb jichmam, tenomtak max yut ba eb. Caw wal yob tzet max beybalnej eb satak Jehová co Diosal. Max bekcan eb, max el tx'uman eb yin is cajlobal Cham.

⁷Max makchej eb is puertail, max buton c'apax tan eb tzektebalej. Majxac'al yak' tz'a eb incienso; c'amxa xajanbal max yak' tz'a eb bay lugar yet co Diosal ayon israel on ti'.

⁸Yuj wal tu' xan max tit yowal c'ul Jehová jin, c'al yin Jerusalén ti', xan chon bilajok, toxac'al chi c'aycan aj co c'ul jilon oc co yailal. Buchbejalxac'al chi juncan yuj juntzanxa nación, axca wal jilon ti'.

⁹Yuj wal tu', ay eb co mam max cam yin owal, xiwil c'apax eb jistzil, c'al eb juninal mayal ilaytok eb yin presoal.

¹⁰Yuj tu' xan max in nabalnej el in watx'nen jun trato yetok Jehová, co Diosal ayon israel on ti', yet watx' c'amxa chi yaoc yowal c'ul jiban.

¹¹Yuj wal tu xin, ex wet conob, c'amc'al chex mayji e watx'nen is templo Jehová, Cham max ex sic'on elok, yet watx' chex oc yak'omalok serbil, yet che yak'on c'apax incienso bay, ẍi cham rey Ezequías.

¹²Tix listail eb levita max oc yin jun mulnajil ti': A xol eb yinatil Coat: a ton Mahat, c'ajol Amasai, c'al Joel c'ajol Azarías. Axa xol eb yet Merari: a ton Cis c'ajol Abdi, c'al Azarías c'ajol Jehalelel. Axa xol eb yet Gersón: a ton Joa c'ajol Zima, c'al Edén c'ajol Joa.

¹³Axa xol eb yet Elizafán, a Simri c'al Jehiel. A xol eb yet Asaf, a Zacarías c'al Matanías.

¹⁴Axa xol eb yet Hemán: a ton Jehiel c'al Simei. Axa xol eb yet Jedutún: a ton Semaías c'al Uziel.

¹⁵Yin babelal, max wajbaj oc eb masanil eb yican, cax max watx'nen ba eb masanil, atac'ala' yalon ley. Lajwi tu' axa yoctok eb bay yul templo tu', max sakbanen eb atac'ala' yalon cham rey, axca wal max yun yalon c'apax Jehová.

¹⁶Lajwi tu xin, max octok eb sacerdote bay yul templo yuj sakbaneni. Max yieltek eb masanil tzetak yetal man watx'ok atac'ala' ley, bay yamak'il templo tu', axa eb levita max iontok bay jobeal a' Cedrón.

¹⁷Max chaoc eb sakbanen el juntzan yamak'il templo tu', yet wal babel c'ual yet babel xajaw, axa yet is waxakeb c'ual mayal apni oc eb bay ti' templo. Waxakebto c'ual max yak' eb sakbanen templo, xan a yin 16 c'ual tu' mayal sakbican masanil yuj eb.

¹⁸Lajwi tu xin, max apni oc eb bay cham rey, max yalon eb axca ti': Mayal co sakbanej templo Jehová; yetok altar bay chi tz'a xajanbal, yetokc'al jantak is mitx'k'abil; yetokc'al meẍa yet ixim pan, c'al yetok is mitx'k'abil;

¹⁹yetok c'apaxok max co watx'nej, c'al co sakbanen juntzan mitx'k'abej ibil el yuj cham rey Acaz yuj is tenomtakil. Axa tinani', watx'xa yayji bay satak is yaltar Jehová, ẍi eb bay.

²⁰Yuj tu xin, max pet aj wan cham rey Ezequías, max wajban oc masanil eb yajaw yayji bay yul conobal tu', max toj eb bay templo Jehová.

²¹Max yitok eb ukc'on no ach'ej wacax, ukc'on no icham calnel, c'al ukc'on no ach'ej calnel, c'al yetok ukc'on no ach'ej chiwo. A juntzan tu' ofrenda yuj yak'lay tan yobtakil eb yajawil conob, c'al eb yul makbej Judá, c'al yuj sakbanil templo. Max yalon cham rey bay eb cham sacerdote, a ton eb yinatil cham Aarón, tol chi yak' tz'a eb xajanbal tu' bay yiban altar yet Jehová.

²²Max mak' cam eb sacerdote no wacax, max chaon eb chiq'uil no', max txijon ay eb yiban altar. Ac'ala', axca tu' max yut c'apax eb no icham calnel, c'al yetok no ach'ej calnel.

²³Lajwi tu' max yiontok eb no chiwo yin ofrendail yuj yak'lay tan yobtakil bay satak cham rey, c'al bay satak eb conob, max yaon oc eb is k'ab yiban no no' tu'.

²⁴Max lajwi tu', max mak'on cam eb sacerdote no no' tu', max secon ay eb is chiq'uil no' yiban altar. A jun tu' ofrenda yuj yak'lay tan yobtakil masanil eb israel, atac'ala' tzet max yal cham rey.

²⁵Max ya c'apax oc cham rey Ezequías eb levita bay templo Jehová yuj sonli eb yetok platillo, salterio, c'al cítara, atac'ala' max yun yaloncan cham rey David yetok cham Gad, is yaomal oc nabal cham rey David tu' yetokc'al cham Natán chekbej Dios. A juntzan chekbanilej tu', a Jehová max chekon yalcan eb is chekbej.

²⁶Yuj tu' xan lecan oc eb levita yetok mitx'k'abej yin música watx'nebilcan yuj cham rey David, axa eb sacerdote lecan c'apax oc eb yetok is trompeta.

²⁷Lajwi tu xin, max yalon cham rey Ezequías tol chi ak'lay tz'a xajanbal bay yiban altar. A wal yet max chaon el eb yich, a wal yet tu' max el pax yich bitni eb chi bitni, yuj yion aj can eb Jehová, c'al xuon eb trompeta, cax chi alay c'apax oc juntzanxa mitx'k'abej yet música.

²⁸Axa masanil eb conob, jajan ay eb yin ayilal, yak'ban lanan bitni eb ayoc yin jun coro tu', cax chi xuon c'apax eb sacerdote tu' trompeta. Ato yet max lajwi tz'a masanil xajanbal tu', catatu' max oc wanaj yoc bit,

²⁹cax max ay jajan cham rey yetok masanil eb ajun yetok yin ayilal.

³⁰Max lajwi tu', max yalon cham rey Ezequías, yetokc'al eb yajaw yayji bay eb levita tol chi bitnej eb salmo bay Jehová, a ton juntzan salmo yet cham rey David, yetokc'al yet Asaf is chekbej Jehová. Yin wal tzalojc'ulalil max yikej eb yuneni, cax max ay c'apax jajan eb yin ayilal.

³¹Lajwi tu xin, max yalon cham rey Ezequías bay eb conob: Yak'ban tol ayex ti', mayal e watx'nej e ba satak Jehová, titanek, iektek e xajanbal c'al e yofrenda bay templo Cham yuj e yalon yuj diosal, ẍi cham bay eb. Xan max yitek masanil eb conob is xajanbal c'al is yofrenda yuj yalon yuj diosalil; axa mac chi el wal yin c'ul yak'oni, max yak' eb xajanbal tol chi tz'a'i.

³²70 no toro, 100 no icham calnel, c'al 200 no ach'ej calnel max yitek eb conob tz'a yin xajanbalil bay Jehová.

³³A masanil no no' max yak' eb yin xajanbalil, ay 600 no wacax, yetok 3,000 no calnel c'al no chiwo.

³⁴Palta c'am wal tx'ial eb sacerdote, c'am chi tzakay eb yin yion el tz'umal no xajanbal chi tz'a tu'. Yuj tu' xan max colwaj eb yet levitail eb yetok. Caytu' max yun lajwi jun mulnajil tu' yuj eb levita, masantac'al max watx'nej ba juntzanxa eb sacerdote, yujtol max tx'ox eb levita tol bekan c'ul eb watx'nen ba eb yintak eb sacerdote.

³⁵Aytoc'al junxa miman bulan xajanbal max ak'layi, yetokc'al is seboal no xajanbal yet junc'ulalil, c'al yetok vino max ak'lay yin ofrendail yetok no xajanbal chi tz'a'i. Caytu' max yun chaon el eb yich yoc yin ayilal bay templo Jehová junelxa.

³⁶Axa cham rey Ezequías, yetokc'al masanil eb conob, caw wal max tzaloj eb yuj tzet max yun Jehová yetok eb conob tu', yujtol yin wal aymanil max yi ba masanil.