Read Q'anjob'al 2 Cr 30 Bible Online

2 Cr 30 - Q'anjob'al bible

2 Cr 30

¹Max chek cham rey Ezequías yal-lay bay Israel c'al bay Judá yuj chalay k'in Pascua bay Jehová Diosal Israel; max toj c'apax carta bay eb yet Efraín, c'al bay eb yet Manasés, yet max awtelay eb yin yoc eb ayilal bay Jehová bay Jerusalén.

²A yet mayal lajwi k'anjab cham rey yetok eb ayoc yin yajawilal, c'al yetok eb conob bay Jerusalén, max nabalnen eb chaon k'in Pascua yet is cab xajaw,

³yujtol maj je' chaon eb jun k'in tu' yin is tiempoal, yujtol man xiwilok eb sacerdote max watx'nej ba atac'ala' yalon ley, tamwal eb conob max wajbaj ba bay Jerusalén.

⁴Yujtol max cha' c'ul cham rey yetok eb conob tzet yetal max nalay tu',

⁵xan max nabalnej el eb yaontok carta bay masanil eb israel. Max tojtac'al bay Beerseba, masantac'al bay Dan. Max awtelay eb, yet chi toj eb bay Jerusalén chaon k'in Pascua bay Jehová is Diosal Israel. Yujtol a yet yalantok, maj cha eb k'in yetok xiwilok anima axca tz'ibelaycanok.

⁶Caywal tu' max yun toj carta yuj cham rey, c'al eb yajaw yayji yetok, bay masanil yul yet Israel c'al yul yet Judá, bay max yal axca ti': Ex jet israelal, meltzojanektek bay Jehová, a ton is Diosal jichmam Abraham, Isaac, c'al Israel, cax ok meltzojtek Cham ayex, a ton ayex max ex elcan yul is k'ab eb reyal Asiria.

⁷Man lajanok che yut e ba axca eb jichmam c'al axca eb jet israelal, tol caw wal tenomtak max yut ba eb bay Jehová, a ton co Diosal yetok eb jichmam. A wal Cham max aon oc eb yalan etnejc'ulal, axca ton wal chi jil tinani'.

⁸Yuj tu' xan manchak e yak' pitbok e c'ul, axca max yun eb jichmam tu'. Aek oc e ba yul k'ab Jehová, cax che ca watx'nen trato yetok, cax chex jayoc bay is cajlobal sic'bil el yuj Cham yin junelnej. Ak'ek serbil Jehová co Diosal, yet watx' c'amxa chi tit yowal c'ul e yin.

⁹Tatol ayex ti' ok e yawal oc e ba yul k'ab Jehová, a eb ajc'ul max iontok eb jet israelal, c'al eb e yuninal yin presoal tu', ok cusaj c'ul eb yin eb, cax ok beklaytek eb yuj eb bay co conobal ti', yujtol a Jehová co Diosal, caw wal watx' is c'ul, ay is camc'ulal, tokwal ok ex yintaknejcan elok, tatol ok ex meltzojtek yul k'ab, ẍitok cham rey tu' bay eb.

¹⁰Caytu' max yun toj eb chekbej tu' bay masanil yulak yet Efraín, c'al yulak yet Manasés, max tojc'al eb bay conoblak, masantac'al max apni oc eb bay yul yet Zabulón. Palta toc'al max tzewi eb anima tu', c'al buchwaj eb yin eb chekbej tu'.

¹¹Palta ay jaywanok eb winak yin is tribual Aser, yin yet Manasés, c'al yin yet Zabulón max yiay ba eb bay Dios, axa tit eb bay Jerusalén.

¹²Max ak'lay yun eb anima bay Judá yin junanen is nabal yuj Dios yin yiken eb chekbanilej max yal cham rey, yetokc'al eb ayoc yin yajawilal yetok, atac'ala' tzet max yun yalon Jehová.

¹³Caywal tu' max yun wajon ba jun miman bulan eb anima bay Jerusalén yin yet is cab xajaw, yin chaon eb k'in yet ixim pan c'am yich.

¹⁴Yin babelal max yuchil eb masanil altar, c'al juntzan lugar bay chi ak'lay tz'a incienso bay Jerusalén tu'. Max k'okoncan aytok eb bay jobeal a' Cedrón.

¹⁵A yet 14 waay yet is cab xajaw tu', max mak'on cam eb no ach'ej calnel yet Pascua. A eb sacerdote c'al eb levita, toxac'al max q'uixwi aj eb, yuj tu' xan max watx'nej ba eb, atac'ala' yalon ley. Max yiontok eb no xajanbal chi tz'a bay templo Jehová.

¹⁶Caytu' max yun yoc eb yin yopiso junelxa, atac'ala' yalon ley Moisés is chekbej Dios. A eb sacerdote max txijon ay chiq'uil no xajanbal max yak' eb yet levitail eb bay.

¹⁷Yujtol xiwiltoc'al eb anima xol conob tu' c'amtoc'al chi watx'nej ba; yowalil max mak' cam eb levita no no' yin xajanbalil yuj eb c'amto chi watx'nej ba tu', yet watx' chi oc yopiso no' yet k'in.

¹⁸Ay c'apax jun miman bulan eb anima yin yinatil Efraín, yin yet Manasés, yin yet Isacar, c'al yin yet Zabulón, a ton eb tu' max chaon is lobej yin no xajanbal yet Pascua, palta man axcaok wal tz'ibelaycanok, yujtol maj wal watx'nej ba eb atac'ala' yalon ley. Palta max txajli cham rey Ezequías yuj eb bay Jehová axca ti': Mamin Jehová co Diosal ach yetok eb jichmam, tol miman a camc'ulal. Ak' tanil is yobtakil mac chi el wal yin c'ul jayoc ayach, caxc'al mi maj watx'nej wal ba, atac'ala' leyal a templo, ẍi cham.

²⁰Max cha' wal yab Jehová is tewilal cham rey Ezequías, xan max yak' tanil is yobtakil eb conob.

²¹Yuj tu xin, xan ukeb c'ual max ayji ec' eb israel tu' bay Jerusalén, yin tzalojc'ulal max chaon eb k'inal ixim pan c'am yich. Axa eb sacerdote c'al yetok eb levita, ayc'al oc eb yin bitnen watx' k'anej bay Jehová yin junjun c'u, yetok masanil mitx'k'abej yin música caw wal watx', tol yet Jehová yayji.

²²Axa cham Ezequías, max yal yuj diosalil bay eb levita yuj tx'oxon el eb is jelanilal yin yak'wi serbil eb bay Jehová. Yin ukeb c'ual max low eb, max yak'on eb xajanbal yet junc'ulalil, c'al yalon eb watx' k'anej bay Jehová is Diosal eb yetok yichmam.

²³Lajwi tu' max yalon eb conob masanil, tol chi yak' ukebokxa c'ual k'in. Caw wal yin tzalojc'ulal max yun chaon eb k'in tu'.

²⁴A Ezequías reyal Judá max sa' 1,000 no ach'ej wacax, yetok 7,000 no calnel, c'al no chiwo bay eb conob. Axa masanil eb yajaw bay junjun conoblak max sa' eb 1,000 no ach'ej wacax, yetok 10,000 no calnel, c'al no chiwo. Caw wal xiwil eb sacerdote max watx'nej oc ba.

²⁵Masanil eb anima aj Judá tu', max tzalojbi aj eb, cay c'apax tu' eb sacerdote, c'al masanil eb levita, masanil eb max tit bay Israel, yetok masanil eb tx'ok conobal max jayoc cajan bay yul tx'otx'al Israel, c'al eb cajan bay yul yet Judá.

²⁶Caw wal xiwil tzalojc'ulal max uj bay Jerusalén, yujtol atax yul tiempoal Salomón, c'ajol cham David reyalben Israel, c'amtoc'al bay max uj axca jun tu' bay Jerusalén.

²⁷Max lajwi tu', max aj lecan eb sacerdote c'al eb levita yin k'anon eb watx'c'ulal Jehová yiban eb conob. Max ablaytac'al is txaj eb tu' bay satcan, a ton bay cajan Dios.