Read Q'anjob'al 2 Cr 32 Bible Online

2 Cr 32 - Q'anjob'al bible

2 Cr 32

¹A yet mayal yun cham Ezequías masanil juntzan ti', yuj yak'wi serbil bay Dios yin bayc'al ijanil, max jayoc Senaquerib reyal Asiria, max yoymanej aj conoblak yul yet Judá, tol watx' cawxi, yuj yion ec'ok.

²A yet max yilon Ezequías tol t'inanxac'al chi jay Senaquerib yak'on ayc'ay Jerusalén,

³max naon yetok eb yajaw yayji, c'al eb soldado tol chi mukil eb nuk'lak a' aej ay bay yinlak conob tu'. Max cha c'ul eb tzet max wajan alnej tu'.

⁴Caytu' max yun wajban xiwil anima, max mukon el eb nuk'lak a' aej tu', yetokc'al a' aej chi el yakan cawilal tu', yet watx' a yet chi jayoc eb asirio c'amxa aej chi ilchaj yuj eb.

⁵Max yak' wal cham rey Ezequías yip watx'nen aj murallail conob bay uchbil ayok. Max watx'nen c'apax aj juntzan torre bay yibanlak muralla c'al junxa yaliẍ muralla bay yinlak. Max yaoc yip muralla bay mukbil el jobe bay conob David. Xiwilxa lanza c'al makbal julbalej max watx'nej.

⁶Max yaon oc yikbej juntzanxa winak yoc yin yajawilal yin masanil conob, max wajnaj oc eb bay puertail conob, cax max yiptzen eb. Max yalon axca ti':

⁷Caw wal tec'an che yut e ba, manchak ex xiwi, tamwal cabax aj e c'ul satak cham reyal Asiria, c'al bay jun miman bulan soldado ajun yetok, yujtol miman jipalil yintak eb tu'.

⁸A cham tu', a eb is soldado ayoc yipok c'ul; a pax ayon ti', a Jehová co Diosal ayoc jetok, a' ok ak'on owal juj, ẍi cham bay eb. A wal yet max yaben eb conob tu' is k'anej cham rey Ezequías, caw wal max yi' yip is nabal eb.

⁹Yak'ban ayoc Senaquerib reyal Asiria yin yak'on owal yin conob Laquis, yetok masanil is soldado, max chektok juntzan eb is chekbej bay Jerusalén, yet chi toj yal eb bay Ezequías reyal Judá, c'al bay masanil eb aj Judá cajan bay tu' axca ti':

¹⁰A Senaquerib, reyal Asiria chi yaltek: ¿Tzet yuj xan che na' tol watx'xac'al e yayji, xan ayex can ec' bay Jerusalén; ilab tol oybil exxa ajok?

¹¹Tatol chi yal Ezequías ayex, tol a Jehová e Diosal ok ex colon el yul in k'ab, tatol axca tu', toc'al chex yetnej; tol ok ex cam yuj wajil, c'al yuj takintial yuj.

¹²Tokwal manak Ezequías tu' max uchon lajwok juntzan lugar yet ayilal bay can ayajok, c'al altar yet jun Dios tu', cax max yalon bay masanil eb anima bay Judá, c'al bay Jerusalén tol asan jun altar bay chi yak' tz'a eb incienso.

¹³¿Tom man e yojtakok tzet yetal max wun yetok eb wichmam bay juntzanxa conoblak? Tokwal max je' yuj is diosal juntzan conoblak tu' colon el eb yul in k'ab.

¹⁴¿Baytal ay junok juntzan is diosal juntzan nacionlak max yuch lajwok eb wichmam tu' max je' colon el is conob yul k'ab eb, xan tzet yuj xan che na' tol a e diosal ok ex colonok?

¹⁵Yuj tu xin, manchak e yak' e ba etnelay yuj Ezequías tu'. Manchak e yaoc yin e c'ul tzet chi yala', yujtol c'am junok is diosal juntzan conob tu' max je' yuj colon el is conob yul in k'ab, tamwal yul k'ab eb wichmam, akxa e diosal tu', ¿tom ok je' ex colon el yul in k'ab? ẍitek cham miman rey Senaquerib, ẍi eb.

¹⁶A ton juntzan ti', c'al yetok juntzanxa max yal eb chekbej reyal Asiria yin Jehová Dios, c'al yin Ezequías is chekbej.

¹⁷Maxtoc'al tz'ibej Senaquerib carta yuj yalon buchwal k'anej yin Jehová Diosal Israel. A yin tx'an tu' max yal axca ti': Axca juntzan is diosal juntzanxa nacionlak, tokwal max je' yuj colon el ba yul in k'ab, axca tu' c'apax is diosal Ezequías, ¿tom ok je' yuj colon el is conob yul in k'ab? ẍitok yin tx'an.

¹⁸Caytu' max yun yawji c'apax tok eb chekbej Senaquerib yin eb anima bay Jerusalén, a ton bay eb ayic' yiban muralla; yip wal eb yel yaw yin hebreo, yet chi xibtelay eb yuj eb, axca tu' ok yun yayc'ay conob tu' yuj eb yaloni.

¹⁹Chi lajbaj wal eb is Diosal Jerusalén yetok is diosal juntzanxa nacionlak tol watx'nebil yuj anima.

²⁰A yuj jun k'anej tu xin, xan a cham rey Ezequías yetok Isaías chekbej Dios, c'ajol Amoz, max txajli eb. Max k'anon eb colwal bay Jehová.

²¹Yuj tu xin, max chektok Cham jun yángel yet max toj ak'lay lajwok masanil eb soldado, eb capitán, c'al eb comandante yet is campamento cham reyal Asiria. Yinxac'al q'uixawil max yun meltzojcantok jun rey tu' bay is conob. Axa yet max octok bay yul templo is diosal, a bay tu' max teklay cam yuj cawanok eb is c'ajol.

²²Caytu' max yun colon el Jehová Ezequías, yetokc'al masanil eb anima cajan bay Jerusalén, yul is k'ab Senaquerib reyal Asiria. Max col-lay c'apax el eb yul k'ab juntzanxa nacionlak; junc'ulalxac'al max yun yayji ec' yetok conoblak cajan bay is cawilal tu'.

²³Yuj tu xin, xiwil mactxel max yitek yofrenda bay Jerusalén yuj yak'on eb bay Jehová, cax max yak'on eb sabalej caw wal ay tojol bay Ezequías reyal Judá. Atax yet tu' max aj can is mimanbilal satak juntzanxa nación.

²⁴A yet jun tiempoal tu' max yabi ay cham Ezequías, ijan max cami; palta max txajli bay Jehová, axa Cham max tx'oxon jun yechelej bay, tol ok watx'jok pax c'ul.

²⁵Caxc'al xiwil watx'il tzet max cha' Ezequías, palta maj tx'ox watx'c'ulalil bay Jehová, a ti' yet tol max maynej ba. Yuj wal tu' xan max tit yowal Jehová yin, yetok yin Judá c'al yin Jerusalén.

²⁶Axa yintakil tu' max yiay ba Ezequías bay Dios yetokc'al eb cajan bay Jerusalén, caytu' max yut c'apax ba eb. Yuj tu' xan majtoc'al yatok Jehová yowal c'ul yiban eb yak'ban iquisto ec' Ezequías.

²⁷A cham Ezequías caw wal beyom, mimanbil max yunej. Caw wal xiwil ch'en plata c'al ch'en oro max wajbaj ec'ok, c'al yetok ch'en ch'en can tojol, yetok perfume, yetok makbal julbalej, c'al yetok masanil tzet yetal tol ay is tojol.

²⁸Max watx'nej aj is nail bay chi c'uay ixim trigo, yetok vino c'al yetok aceite. Max watx'nej c'apax aj corral yet no wacax, no calnel, c'al no chiwo.

²⁹Max yak'on c'apax watx'nelay aj aldealak, yujtol xiwil is wacax, xiwil c'apax is calnel, caw wal xiwil is beyomal max yak' Dios.

³⁰A ton cham Ezequías ti' max chekon makchelay el a' nuk' aej bay yiban, a ton bay yet Gihón, axa bay yalan tx'otx' max ca yec'oc a', a ton bay yetc'ulal yayub c'u bay conob David, a tu' max apni oc a'. Watx'c'al max yun yeloc Ezequías yin masanil tzetak max yunej.

³¹Axa eb yajaw bay Babilonia max chektek eb is chekbej, yet max ul k'anlej eb tzet yayji jun milagro c'ayubtakxac'al max uj bay Judá. Max beklay Ezequías yuj Dios yunen bay chi cha c'ul, yuj yak'lay porobal c'al yilon Cham tzetbil yayji is nabal.

³²A jantakto is yabixal Ezequías yuj tzetak max yunej, c'al is yikemal bay Dios, a tu' tz'ibbilcan bay tz'ibbil tzet yetal max yil Isaías, c'ajol Amoz, c'al yul tx'an yunal yabixal eb reyal Judá c'al Israel.

³³A yet max cam Ezequías, a tu' max mukay bay tzalan bay ay mukbanil eb yinatil David. Masanil eb Judá, c'al eb cajan bay Jerusalén caw wal watx' max yun mukon eb, axa Manasés is c'ajol max occan is q'uexelok yin reyal.