Read Q'anjob'al 2 Cr 35 Bible Online

2 Cr 35 - Q'anjob'al bible

2 Cr 35

¹Max cha' Josías k'in Pascua bay Jehová bay Jerusalén. A yet 14 waay babel xajaw max ak'lay cam no calnel yin xajanbalil yuj k'in.

²Max yaon oc eb sacerdote yin yopiso, max iptzelay eb yuj yet chi oc eb yin yopiso tu' bay templo Jehová.

³Max ak'lay c'apax is cuybanil eb levita ayoc yin serbilal bay Dios, tol meẍtol yayji eb xol yet israelal. Max yalon axca ti': Aek octok te caẍail trato Jehová bay yul templo max watx'nej Salomón c'ajol David, reyal Israel. Manxa ok e batxic'ok. A tinani', occanek yin serbilal bay Jehová co Diosal, c'al bay eb jet israelal tol conob on Cham.

⁴Aek oc e ba yin txolilal, cax che yak'on e turno atac'ala' tz'ibelaycan yuj cham David reyal Israel, c'al yuj Salomón is c'ajol.

⁵Pojek ec' e ba bay templo, yet watx' a' ayex, ayex ec' bay tu' chex colwaj yetok junjunok makan eb e yet israelal tol yicanc'al ba.

⁶A ex ok e yak' cam no xajanbal yet k'in Pascua. Yuj tu' xan watx'nejek e ba, atac'ala' yalon ley, cax che watx'nen masanil tzet yetal, yet watx' chi je' yiken eb jet israelal masanil tzet max yalcan cham Moisés yuj Jehová, ẍi cham rey.

⁷Lajwi tu', max pojon el cham rey Josías xiwil no no' xol is jobbejal no', cax max yak'on bay eb conob, yet watx' ay no no' bay tu', yet chi chalay k'in Pascua. No calnel yetok no chiwo: 30,000 no' yin masanil, yetok 3,000 no ach'ej wacax.

⁸Yetok c'apax eb ayoc yin yajawilal yetok cham rey max yak' c'apax eb sabalej bay eb conob, bay eb sacerdote, c'al bay eb levita. Axa pax cham Hilcías, cham Zacarías c'al yetok cham Jehiel, a ton eb chi ilon is templo Jehová, max yak' eb 2,600 no calnel yet chi chalay k'in Pascua, yetok 300 no ach'ej wacax.

⁹A Conanías, yetok eb yuẍtak, a ton Semaías c'al Natanael, yetok c'apax Hasabías, Jehiel c'al Josabad, max yak' eb 5,000 no calnel c'al no chiwo, yuj chalay k'in Pascua, yetok 500 no ach'ej wacax yuj yoc yin xajanbalil yuj eb levita.

¹⁰A yet watx'xa yayji yet chi chalay k'in tu', a eb sacerdote max oc eb bay is lugar; axa eb levita max txolon oc ba eb yin is turno, axca max yun yalon cham rey.

¹¹Caytu' max yun yak'on cam eb no no' yin xajanbalil yet k'in Pascua. A yet lanan k'olon el eb levita tu' no xajanbal, chi yak'on eb chiq'uil no' bay eb sacerdote. Axa eb tu' chi txijon ay is chiq'uil no' bay yiban altar.

¹²Max pojon ec' eb sacerdote tu' is seboal no no' t'inan chi tz'a yin xajanbalil, cax max yak'on bay junjun makan yicanc'al ba, yet chi yak'on eb bay Jehová, axca wal yalon bay yul tx'an un yet cham Moisés. Ac'ala' axca tu' max yut c'apax eb no wacax.

¹³Lajwi tu xin, max bolon eb no' Pascua tu', axca tz'ibelaycanok. Axa juntzanxa no' xajanbal max txic eb bay yulak xij, c'al yulak ẍaltin. Yinxac'al aymanil max yun pojon ec' eb no' xol conob.

¹⁴Lajwi tu xin, max watx'nen eb levita tzet yetal tol yet eb yayji yet c'apax eb sacerdote yetok eb, yujtol a eb sacerdote yinatil cham Aarón eb, ay wal oc yiban eb yak'on tz'a xajanbal tu' yetok c'apax seboal no' masantac'al max yal yaj ak'bal. Yuj wal tu' xan a eb levita max watx'nej el eb yet, c'al yetok yet eb sacerdote.

¹⁵Axa pax eb chi bitni, a ton eb yinatil Asaf, a eb ti' ay c'apax oc yin yopiso atac'ala' yayjican yuj cham rey David, yetok Asaf, Hemán, c'al Jedutún, tol is chekbej Dios yayji eb tu' bay cham rey David tu'. Axa eb taynem puerta xin, ayic' eb yilon yopiso; c'am wal junok eb tu' tol max bekcan is lugar, yujtol a eb yet levitail, a eb tu' max watx'nen el yet eb taynem puerta tu'.

¹⁶Caytu' max yun yak'lay serbil Jehová yet c'ual k'in Pascua, c'al yak'lay tz'a xajanbal satak Cham bay altar, atac'ala' max yun yalon cham rey Josías.

¹⁷A masanil eb Israel ayic' yet jun tiempoal tu', max cha eb k'in Pascua yin ukeb c'ual; a ton yet tu' max lo' eb ixim pan c'am yich ay ocok.

¹⁸C'am bay max chalay junok k'in Pascua axca jun tu' yettax is tiempoal cham Samuel is chekbej Dios. C'am wal junokxa reyal Israel max chaon k'in Pascua axca max yun chaon cham rey Josías, yetok eb sacerdote, yetok eb levita, c'al yetok masanil eb anima bay Judá, yetokc'al eb Israel ayic' yet tu', yetok c'apax eb cajan bay Jerusalén.

¹⁹A yet 18 abilxa yoc Josías yin reyal max chalay jun k'in Pascua tu'.

²⁰Yet maxax ca watx'nej aj cham rey Josías templo, axa Necao reyal Egipto, max toj bay a' Éufrates yin yak'on owal bay conob Carquemis. Axa toj cham rey Josías makon sat Necao tu'.

²¹Axa cham Necao tu' max chektok chekbej yet chi yal bay: Manchak ak' owal win, ach reyal Judá, yujtol manak en chin toj wak' owal, palta a yin conob tol lanan wak'on owal yetok, yujtol a Dios max alon ayin tol chi wak' wip yin owal ti'. Yuj a watx'ilok, bek a teyelen a ba yetok Dios, yet watx' c'am chach yak' c'ayilok, yujtol a Cham ayoc wetok, ẍitok bay.

²²Palta a Josías majc'al meltzojok, palta tol max q'uex ba yuj yak'on owal yin. Maj wal cha yab tzet yetal max yal Necao, caxc'al a Dios max ak'on yala'. Caytu' max yun yoc yin owal bay jobeal yet Meguido.

²³A eb julwajwom max julwaj eb yin Josías, axa yalon cham bay eb is chekbej tu': Iek in el cayti', yujtol caw wal miman max yun in lajwi, ẍi.

²⁴Axa yion eltek eb is chekbej bay yul carruaje tu', max yaon octok eb bay yul junxa yet is cab carruaje, axa yiontek eb bay Jerusalén. A bay tu' max camxac'al, max mukon eb bay is panteón eb yichmam. Masanil eb aj Judá c'al eb aj Jerusalén max ok' eb yuj is camichal cham rey Josías.

²⁵Axa Jeremías max watx'nej jun poesía yuj nalaytek is camichal cham, chitoc'al binaj yet jun c'ual ti' tinani'. Masanil eb winak chi bitni, c'al eb ix ix chi bitni chi natek eb jun bit yet is camichal cham rey Josías, yet chi bitnen eb juntzan bit yet eb camnak. A jun bit tu' max ocxac'al is beybalok eb Israel, ayoc tz'akilok juntzan bital eb camnak.

²⁶A janic'okxa yabixal cham Josías, yetok is mulnajbal, tol caw wal watx' chalen ba axca tz'ibelaycan bay yul tx'an yunal ley Jehová,

²⁷c'al masanil tzetak yetal max yun yettax yichbanil c'al lajubal, a tu' tz'ibbilcan bay yul tx'an yunal yabixal eb reyal Israel c'al Judá.