Read Q'anjob'al 2 Cr 36 Bible Online

2 Cr 36 - Q'anjob'al bible

2 Cr 36

¹A masanil eb anima bay Jerusalén max aon oc Joacaz, c'ajol cham Josías yin reyal bay Jerusalén q'uexelok is mam.

²23 abil is k'inal Joacaz yet max chaon el yich yak'on reyal, cax oxebnej xajaw max yak' reyal.

³A cham reyal Egipto max ion el bay is trono bay Jerusalén, cax max yaon oc jun tojlabal yiban conob, 75 quintal ch'en plata, c'al oxeb arroba ch'en oro.

⁴Axa Eliaquim yuẍtak Joacaz max oc yin reyal bay Judá, c'al bay Jerusalén yuj cham reyal Egipto. A cham Necao tu' max q'uexon is bi Eliaquim, max yak'on yik Joacim; axa Joacaz max yitok bay Egipto.

⁵25 abil is k'inal Joacim yet max oc yin reyal tu', 11 abil max yak' reyal bay Jerusalén. Palta caw wal yob tzet max yun satak Jehová is Diosal.

⁶Axa cham Nabucodonosor, reyal Babilonia max jayoc yin, max c'alban yetok ch'en cadena bronce, yuj yiontok bay Babilonia yaloni.

⁷Max yiontok Nabucodonosor tu' juntzan mitx'k'abej yet templo Jehová, max yaon octok bay yul templo is diosal bay Babilonia.

⁸A janic'okxa is yabixal Joacim c'al is beybal tol yob, c'al tzetak max yunej, a tu' tz'ibbilcan bay yul tx'an yunal yabixal eb reyal Israel c'al eb yet Judá. Axa Joaquín is c'ajol max occan yin reyal is q'uexelok.

⁹18 abil is k'inal Joaquín yet max chaon el yich yak'on reyal; oxeb xajaw yetok lajoneb c'u max yak' reyal bay Jerusalén, palta caw wal yob is beybal satak Jehová.

¹⁰A yet babel xajaw yet jun abil tu', max yalon cham rey Nabucodonosor tol chi ilaytok bay Babilonia, yetok juntzan mitx'k'abej tol caw wal can tojol bay templo Jehová. Max yaon oc Sedequías, yican Joaquín yin reyal bay Judá, c'al bay Jerusalén.

¹¹21 abil is k'inal Sedequías yet max oc yin reyal, 11 abil max yak' reyal bay Jerusalén.

¹²Palta caw wal yob tzet max yun satak Jehová. Maj wal yikej bay tzet max yal Jeremías is chekbej Dios.

¹³Max yut c'apax ba tenomtakil bay cham rey Nabucodonosor, a ton jun bay max yak' is ti', tol junnej ok yut is nabal yetok. Junelnej tol max yak' pitbok el c'ul, majxa yal c'ul max meltzoj bay Jehová is Diosal Israel.

¹⁴Yetok c'apaxok, a masanil eb yajaw yayji bay Judá, eb sacerdote, yetok masanil eb conob, max aj wal can eb yin yobtakil. A wal is beybal juntzanxa nación chi beybalnej eb, cax max yetnentok eb templo Jehová, a ton jun is lugar max sic'can el bay Jerusalén.

¹⁵A is Diosal eb yetok yichmam, max ak'on c'al tenchebal bay eb yuj eb is chekbej, yujtol caw wal ay is camc'ulal yiban is conob, c'al yin is cajlobal.

¹⁶Palta a eb tu', toc'al max tzewi eb, c'al buchwaj yin eb is chekbej Dios tu', masantac'al max yal wal yayc'ay is yowal c'ul Cham yiban is conob, cax majxa tenchajok.

¹⁷Max chektek Jehová cham reyal eb caldeo yak'on owal yin eb, max teklay cam eb ach'ej yul makbej templo, c'am wal jabok yabenc'ulal yin eb ach'ej c'al yin eb k'opoj, tamwal yin eb icham anima tol c'amxa yip. Masanil max yak' Jehová yul k'ab jun rey tu'.

¹⁸Masanil mitx'k'abej yet templo Dios, mimek ma coc'takil, c'al jantak is beyomal templo, masanil beyomal cham rey yetok yet eb ayoc yin yajawilal yetok, max yitok Nabucodonosor bay Babilonia.

¹⁹Max yak'on tz'a eb caldeo is templo Dios, max yuchon ay eb murallail conob Jerusalén, max yaon oc eb k'ak'al mimek nalak, max yuchon lajwok eb masanil tzet yetal tol ay wal is tojol.

²⁰Max lajwi tu xin, max ilaycantok bay Babilonia eb maj cam xol owal. Max occan eb tu' yin mosejal bay cham rey Nabucodonosor, yetokc'al bay yinatil, masantac'al yet max yi' wal yip nación Persia.

²¹Caywal tu' max yun yion ba tzet max yal Dios yuj Jeremías is chekbej. Caytu' max yun xew tx'otx'; majxac'al oc mulnajil sat tx'otx' yin 70 abil, yak'ban aycantok eb anima bay Babilonia.

²²A yet babel abil yoc cham Ciro yin reyal bay Persia, max yunencan el is k'anej Jehová albilcan el yuj Jeremías is chekbej. A Jehová max iptzen cham rey Ciro yin yalon el jun chekbanilej bay masanil yul is makbej yin k'anejal, c'al yin unal

²³axca ti': A Jehová Diosal satcan, a' max aon oc masanil nacionlak bay sat tx'otx' ti' yul in k'ab. A' max alon ayin tol chin watx'nej aj junok is templo bay Jerusalén bay yul yet Judá. Yuj tu xin, tzanc'al mactxel ex, ex conobal Jehová, colwajokab Jehová e Diosal e yetok. A tinani' asek bay tu', ẍitok cham Ciro.