Read Q'anjob'al 2 Cr 6 Bible Online

2 Cr 6 - Q'anjob'al bible

2 Cr 6

¹Max yalon cham rey Salomón axca ti': Mamin Jehová, ach wal max ala' tol ayach ec' bay xol k'ek asun.*fn*

²Palta ayin ti', max in watx'nej aj jun templo ti' yet chach cajay yul, a ton jun lugar tu' bay ok ach ayjok ec' yin tojbalk'inal, ẍi cham rey bay Dios.

³Lajwi tu' max toj pax t'anan cham rey bay ayic' masanil eb israel is yet conob, lecan aj eb masanil. Max yalon watx' k'anej yiban eb.

⁴Max yalon axca ti': Al-layokab watx' k'anej yin Jehová co Diosal ayon israel on ti', yujtol mayal yun bay max yak' is ti' bay in mam, yet max yalon axca ti' bay:

⁵Atax yet jun c'ual yet max wieltek in conob bay Egipto, c'am junok conob max in siq'uil bay xol is tribual Israel, yet chi watx'ji aj junok templo bay chin ayji ec'ok, tokwal ay c'apax junok winak max in siq'uilok, yet chi yikbaj in conob Israel ti'.

⁶Palta a tinani' xin, max in siq'uil conob Jerusalén, yet chin ayji ec' bay tu'. Max ach in sic' c'apax elok yet chach oc yin yajawilal xol in conob ti', ẍi Jehová bay in mam.

⁷A in mam max yochej c'ul max watx'nej aj junok templo yuj yion aj can Jehová, co Diosal ayon israel on ti'.

⁸Yuj tu' xan max yal c'apax Jehová: Caw wal watx' tzet max a na', yujtol max a na' a watx'nen aj jun templo,

⁹palta manak ach ok a watx'nej ajok, palta a jun a c'ajol, a jun tu' ok watx'nen aj jun in templo tu', ẍi Jehová Dios.

¹⁰Axa tinani' xin, mayal yun bay max yak' Jehová is ti'. Axca wal max yun yalon tu', caytu' max yun woccan q'uexelok in mam tu' yin reyalil. Max in ay chotan bay trono ti', mayal in watx'nej aj jun templo bay Jehová co Diosal.

¹¹Max waon c'apax octok te caẍa bay ayaytok is trato Jehová max watx'nej jetok ayon israel on ti', ẍi cham Salomón.

¹²Lajwi tu xin, max oc waan cham rey Salomón satak altar yet Jehová satak masanil conob Israel, max yion aj k'ab can yin txaj.

¹³A tu' ayajtok bay yiban jun plataforma naba bronce max chek watx'nelay nan xol yamak'il, cab metro yetok 25 centímetro is k'atil. Ac'ala' axca tu' c'apax sat, jun metro yetok 35 centímetro ayaj is tel can. Satak wal eb conob Israel tu' max ay jajanok, cax ayaj is k'ab bay satcan.

¹⁴Max yaloni: Mamin Jehová ach co Diosal ayon israel on ti': Tokwal ay junokxa Dios bay satcan, c'al bay sat tx'otx' ti' lajan etok ach ti'. Ach ti' chi yun a trato, cax cha tx'oxon a camc'ulal yin mactxel chach ak'on serbil yetok masanil is c'ul.

¹⁵Mayal yun oj bay max ak' a ti' bay in mam. A wal tinani', tz'akan max yuncan el bay max ak' a ti' tu'.

¹⁶Yuj tu xin Mamin Jehová co Diosal, yunokab bay max ak' a ti' bay cham a chekbej David in mam, axca max yun aloni: C'am bak'in tol c'am junok enatil man ok oc yin reyalil yin conob Israel in satak, tatol ok taynej ba eb yin is beybal, cax ok yiken eb in chekbanil axca max yun ekeni, cachi bay in mam.

¹⁷Yuj tu xin, Mamin Jehová co Diosal, yunokab bay max ak' a ti' bay in mam a chekbej tu'.

¹⁸Palta xin, ¿chi mi wal je' a cajay ec' yetok eb anima bay sat tx'otx' ti'? Yujtol a satcan, yelxac'al miman yayji ocok, palta tokwal chi yab pax bay chach ayji, akxa ch'an jun templo max in watx'nej aj ti'.

¹⁹Palta xin Mamin, chaab in tewilal. Ab c'apax yet chi aj waw ayin a chekbej in ti' yuj in k'anon a watx'c'ulal.

²⁰Manchak e el a sat yin jun templo ti' yet c'ualil, c'al yet ak'balil, a ton bay jun lugar tol max ala' tol ayachc'al ec'ok. Yuj tu' xan ab wal in txaj ayin a chekbej in ti'.

²¹Ab wal in tewilal, c'al is tewilal a conob Israel ti' yet chon txajli ayach bay jun lugar ti'. A bay satcan tu' bay cajan ach, chab co txaj, cax chak'on tan co yobtakilal on.

²²Tatol ay mac chi ablay yin tol ay is yobtakil bay junok yet animail, cax chi ak'lay pural ul yak'on ti' bay satak altar bay jun a templo ti',

²³atac'al bay satcan tu' chabej, cax cha watx'nen el yin tojolal yiban eb a chekbej. Chak' paktzebal axca wal is mojalil bay mac ay is yobtakil, chi oc yailal yiban yuj wal is yobtakil tu', cax cha bekon el mac c'am is mul, atac'ala' tzetbil wal yayji ocok.

²⁴A yet ok on ayc'ay ayon a conob Israel on ti' yuj co yobtakil, cax chon can yul k'ab eb ajc'ul, ta ok naba co c'ul, ok ach jak'on binaj yin txajil, c'al chon tewi ayach bay a templo ti',

²⁵elok yin a c'ul abentac'al bay satcan tu', cax chak'on tanil co yobtakil on, axa on ak'on meltzoj bay co tx'otx'al max ak' bay eb jichmam on.

²⁶Ta ok yak' waresma bay co conobal ti' yuj co yobtakil on ayach, ta ok ach jak' binaj yin txaj, t'anan ontek yin jun lugar ti', cax ok naon ba co c'ul yin co yobtakil yuj jun yailal tu',

²⁷elok yin a c'ul, abentac'al bay satcan tu' co tewilal ayon a chekbej on ti', cax chak'on tanil co yobtakil on, cha tx'oxon watx' beybalej yet chi co beybalnej. Lajwi tu' cax chaontek nab bay yiban tx'otx' tx'otx' max ak' co sataknej ayon a conob on ti'.

²⁸Ma xin, ta ay wajil, ma ilya' bay co conob ti', ma chi tz'atok awoj yuj k'ak', ma chi jayoc junok yabil awoj, ma chi jay no chapulín, ma junokxa makan c'aj no' chi ak'on lajwok awoj, ma xin, chi jayoc oyan eb ajc'ul yak'on owal yin junok conob yul co makbej ti', tzanc'al tzet chon oni,

²⁹elok yin a c'ul aben is txaj c'al tewilal yalc'al mactxel ok tewok ayach, ma tewilal ok jun co masanil on ayon a conob on ti', a yet ok jilon tol ayon oc yin yailal. Ta ok co mojbajtok co k'ab ayach bay yetc'ulal jun templo ti', abtek co tewilal bay satcan bay cajan ach ec'ok, axa ak'on tan co yobtakil on tu'. Paktzej ayon junjun on atac'ala' tzet chi co beybalnej on, yujtol ach ti' ojtak wali, tzetbil yili co nabal, c'al tzet chi ec' yul co c'ul junjun on.

³¹Yet watx' mimanokab elapnok co satak on c'al yikem on ayach yak'ban iquis on ec' bay jun tx'otx' max ak' bay jichmam on.

³²Yetok c'apaxok, ta a junok tx'ok conobal tol man a conobok, chi tit bay junok lugar najat, yujtol caw wal miman a binaji, c'al yujtol miman yayji oc epalil, cax chi txajli bay jun templo ti',

³³elok yin a c'ul abentektac'al bay satcan tu' bay cajan ach. Ak' masanil tzet yetal ok k'anlay ayach, yet watx' chach yojtaknej el masanil nacionlak bay yulyibank'inal ti', cax chi oc eb ach yion aj can axca chi jun ayon a conob Israel on ti'. Catatu' ok yojtaknen el eb, tol a bay jun templo max in watx'nej aj ti', a tu' chi oc tewilal ayach.

³⁴A yet ok on eltok ayon a conob on ti' yin owal yin eb jajc'ul, yalc'al bay ok on a chektok, ta ok on txajloktek ayach bay yetc'ulaltek jun lugar max a sic'can elok, a ton bay ay jun templo max in watx'nej aj ti',

³⁵elok yin a c'ul abentek co txaj on bay satcan tu', c'al co tewilal on ayach, cax chon a colon bay tu'.

³⁶Ta ok oc co mul on ayach xin, (yujtol c'am mactxel tol c'am chi oc is mul) axa ton tit yowal a c'ul jin on tu', xan ok on aoc yul k'ab eb jajc'ul, axa co tojcan on yin presoal bay tx'ok conobal bay najat ma cawil, elok yin a c'ul aben co txaj on.

³⁷Ta a bay jun nación bay chon tojcan tu', a tu' chi na ba co c'ul, cax chi meltzoj co nabal on junelxa ayach, axa co tewi tu', c'al jojtaknen el on, tol max oc co mul ayach; abwaltek co tewilal on xin.

³⁸Ta chon meltzoj yin masanil co c'ul, c'al yetok masanil co nabal ayach, yet ayon ec' bay jun nación bay chon ilaytok yin presoal tu', axa co txajlitek on bay yetc'ulal jun tx'otx' max ak' bay eb jichmam on ti', bay jun conob sic'bil el oj ti', c'al bay yetc'ulal jun templo max in watx'nej aj ti',

³⁹ok ab wal co txaj on, c'al co tewilal on bay satcan bay cajan ach ec' tu', colwajan jetok on, ak' tanil co mul ayon a conob on ti' max oc ayach.

⁴⁰Ach in Diosal, ab wal txaj chi occ'al ayach bay jun lugar ti'.

⁴¹Ajan wan xin ach Jehová co Diosal, cax chach cajaycan yin junelnej bay jun lugar ti' yetok a caẍa chi tx'oxon el epalil. Mamin, colc'al eb sacerdote chach ak'on serbil, axa eb et, ayokab tzalojc'ulal eb yuj a watx'c'ulal.

⁴²Manchak in entaknej ayin rey in max in a sic'can el ti'. Natek a camc'ulal yin in mam a chekbej, ẍi cham rey Salomón.