Read Q'anjob'al Esd 5 Bible Online

Esd 5 - Q'anjob'al bible

Esd 5

¹A eb is chekbej Jehová Dios, a ton Hageo, c'al Zacarías is c'ajol Iddo, max oc ijan eb yalon bay eb aj Judá, yetokc'al bay eb aj Jerusalén, tzet chi yal Jehová is Diosal bay eb.

²Yuj tu xin, max oc Zorobabel is c'ajol Salatiel, c'al Josué is c'ajol Josadac, yin mulnajil junelxa yin ca watx'nen templo Dios bay Jerusalén, cax max oc eb chekbej Dios yiptzen eb.

³Axa pax Tatnai gobernador yayji bay yayubc'ual a' Éufrates, c'al Setar-boznai yetok eb yetbi ba yetok, max bet eb yala': ¿Mac max alon ayex tatol che ca watx'nej jun templo ti', cax che yaon c'apax oc is teal?

⁴¿Tzet is bi eb chi watx'nen jun miman na ti'? ẍi eb.

⁵A Dios max occ'al yetok eb israel ayoc yin ikbajwomal tu', xan maj tenlay oc wanaj eb mulnajwom yuj cham gobernador yetok eb ajun yetok. Asan tol max tz'ibejtok eb junok un bay cham rey Darío, cax max yechbanen eb tzet ẍi cham.

⁶A ton jun ti' is copiail tx'an carta max yatok Tatnai gobernador bay cham rey Darío, c'al pax Setar-boznai, c'al eb yet gobernadoral, a ton eb yajaw yayji bay yayubc'ual a' Éufrates tu'.

⁷Axca ti' max yun yaloni: Chi yochej co c'ul on mamin rey, tol watx'c'ulalokab ayach.

⁸A wal jun ti' chi jaoc yul a k'ab. Max on betic' bay Judá, max jilon is templo cham Dios, cham miman yayjiocok, tol lanan ca watx'nelayi. Ayoc mimek josbil ch'en yin, yetokc'al te mimek patzab. Caw wal yelc'ulal yak'on eb, xan lananxa watx'ji yuj eb.

⁹Max co k'anlej bay eb israel tu' mac max chekon eb, xan chi watx'nej eb, c'al yaon oc eb is patzabil,

¹⁰c'al tzetak is bi eb yajaw yayji oc yin tu', cax ok co tz'ibentok ayach jaloni.

¹¹Max yalon eb ayon: Tolab chi oc eb ayilal bay Dios aj satcan, c'al aj sat tx'otx' ti', xan lanan ca watx'nen aj eb jun templo max watx'nej jun miman rey bay Israel yet payxa.

¹²Max yalon eb tol a eb is yichmam eb max tx'emontek yowal c'ul cham Dios aj satcan. Yuj tu' xan, a Cham max aon oc eb yul is k'ab cham Nabucodonosor, reyal Babilonia, yinatil eb caldeo. A' max uchon ay jun templo tu', cax max yiontok eb anima bay Babilonia.

¹³Yinxa tzunanil, yet max oc Ciro yin reyal bay Babilonia, max chekon cham tol chi ca watx'nelay aj jun templo tu'.

¹⁴Max yak'on cham rey Ciro juntzan net tol oro c'al plata junelxa, juntzan max yitok Nabucodonosor bay is templo Dios bay Jerusalén, cax max yaon octok bay templo is diosal. Max yak'on cham rey Ciro tu' juntzan net tu' bay Sesbasar, a ton cham max aon oc yin gobernadoral bay Jerusalén.

¹⁵Max yalon cham rey Ciro bay Sesbasar, tol chi yitok juntzan net tol oro tu' yuj yaon octok yul templo, cax chi ca watx'nelay templo Dios bay Jerusalén bay ayc'alta'a.

¹⁶Catatu' max apni oc Sesbasar, cax max yaon ay yich is templo Dios bay Jerusalén. Ataxc'al yet tu' max chail yich ca watx'nelayi, cax c'amtoc'al chi lajwi tinani'.

¹⁷Yuj wal tu xin, chi co k'an ayach tol chi saylay yulak archivo bay palacio Babilonia tu', ta yel max chek cham rey Ciro tol chi ca watx'ji is templo Dios bay Jerusalén tu'. Lajwi tu' cax chalon jabej tzet ẍi a nabal yin jun ti', ẍitok eb yin is yun tu'.