Read Q'anjob'al Esd 6 Bible Online

Esd 6 - Q'anjob'al bible

Esd 6

¹Max yalon cham rey Darío tol chi saylay bay yulak archivo bay Babilonia bay chi c'ubelay masanil un ay yopiso.

²Palta a bay yul palacio bay conob Ecbatana, bay yul yet Media, a tu' max ilchaj jun un bay tz'ibbilcan tzet yetal nabilcanok, bay chi yal axca ti':

³A yet babel abil yoc Ciro yin reyal, max yaloni: A yuj is templo Dios bay Jerusalén: Watx'nelayokab ay yich cax chi watx'ji aj templo yuj yak'lay xajanbal yul; 27 metro chi aj tel can, ac'ala' 27 metro chi yun c'apax yul txiquin.

⁴Ox txol mimek ch'en josbil, chi oc yin, cax chi oc jun txolok te te' caw wal ac' yiban. A bay is tesorería cham rey chi eltek is gastoal.

⁵Axa juntzan net tol oro c'al plata ibiltek bay yul templo bay Jerusalén yuj Nabucodonosor, max yitek bay Babilonia ti', ilayokab meltzoj bay templo bay Jerusalén, cax chi alay octok bay yul yatut Dios, bayc'alta' ayic'ok, ẍi cham, ẍi jun chekbanilej tu'.

⁶Lajwi tu' max chekon cham rey Darío yal-lay bay Tatnai gobernador bay yayubc'ual a' Éufrates, c'al bay Setar-boznai c'al bay eb yetbi ba yetok, a ton eb ayoc yin opiso bay jun lugar tu' axca ti': Besek el e ba bay templo tu',

⁷cax manchak e tenchanej is gobernadoral eb israel, c'al eb ikbajwom yayji oc yin watx'jubal aj templo Dios bayc'alta' ay is lugar.

⁸Ayin chi wala' tol chex colwaj yetok eb israel ayoc ikbajwomal yuj watx'jubal aj templo Dios, chi tojlanelay is gastoal yuj ch'en tumin chi chalay yuj tojlabal bay yayubc'ual a' Éufrates, c'amokab chi ec' tiempo yak'layi, yet watx' c'am chi oc wanaj yoc mulnajil.

⁹Masanil tzet chi oc yopiso junjun c'u, c'amokab chi majax aj bay eb sacerdote ayic' bay Jerusalén, axca chi yun k'anon eb: no ach'ej wacax, ma no icham calnel, ma no ach'ej calnel, yet chi oc no' yin xajanbalil bay Cham Diosal satcan, yetok c'apax trigo, atz'am, vino, c'al aceite,

¹⁰yuj yak'lay xajanbal chi yochej Dios, c'al k'anlay in cawil yetok wuninal.

¹¹Ayin chi wal c'apaxok, ta ay mac chi tenon jun tzet chi wal ti', chi ilay aytek junok patzabil is yatut, cax chi locbelay oc bay xial chon te', axa yatut tu' chi cancan axca bay chi bul-lay k'alem.

¹²A Dios max sic'on el Jerusalén yet chi oc ayilal bay tu'; yuj tu' aokab chi c'ayon el eb rey, c'al is nación eb chi tenon jun k'anej chi wal ti', ma chi yetnejtok jun is templo bay Jerusalén tu'. Ayin Darío in ti', chi wak' jun chekbanilej ti', yowalil chi ikelay yin aymanil masanil tzet chi tz'ibbelaycan ti', ẍi jun un tu'.

¹³Yuj tu', a Tatnai gobernador bay yayubc'ual a' Éufrates, c'al Setar-boznai, c'al eb yetbi ba yetok, max oc eb yin yikeni, axca yalontek cham rey Darío.

¹⁴Yuj tu xin, a eb israel ikbajwom yayji oc yin mulnajil tu', max je' yuj eb lajoncan watx'ji templo axca max yun yalon eb cham chekbej Dios, a ton Hageo c'al Zacarías c'ajol Iddo. Caytu' max yun lajwican watx'ji templo axca max yun yalon Jehová is Diosal Israel, c'al axca chekbanilej yet eb reyal Persia, a ton cham Ciro, cham Darío, c'al cham Artajerjes.

¹⁵Oxebxa c'ual waay xajaw Adar yet-xa is wak abil yoc Darío yin reyal bay Persia max lajwi watx'ji templo tu'.

¹⁶A eb israel, mawal eb sacerdote, c'al eb levita yetok masanil eb paxnaktek bay Babilonia max cha eb k'inal templo Dios yin tzalojc'ulal.

¹⁷A yet jun tiempoal tu' max yak' eb xajanbal: 100 no ach'ej wacax, 200 no icham calnel, 400 no ach'ej calnel, c'al lajcawc'on no mam chiwo, junjun no chiwo tu' yet junjun tribual eb israel, yet chi tancan el is mul masanil conob.

¹⁸Max lajwi tu xin, cax max alay oc eb sacerdote yin is turno, axa junjun makquiltakil eb levita max oc eb yin yopiso bay templo Dios bay Jerusalén axca yayjican bay tx'an un yet cham Moisés.

¹⁹Max cha' c'apax eb meltzojnaktek bay Babilonia, k'in Pascua yet 14 waay babel xajaw.

²⁰Maxax watx'nej ba eb sacerdote c'al eb levita, atac'ala' yalon ley. Yuj tu' xan a masanil eb watx'xa yayji. Axa mak'on cam eb levita no xajanbal yet Pascua yuj masanil eb meltzojnaktek bay Babilonia, a ton eb yet conob eb, c'al eb sacerdote, yetokc'al eb yet levitail ba.

²¹Masanil eb israel meltzojnaktek bay Babilonia, max chi' eb no xajanbal yet Pascua tu'. Ac'ala' masanil eb max yaoc ba yetok eb, a ton eb max yiel ba yin is yobtakil eb anima cajan bay yinlak eb, max wajbaj oc ba eb yetok eb israel yuj yoc eb yin ayilal bay Jehová is Diosal Israel tu'.

²²Yin ukeb c'ual ayoc eb yin tzalojc'ulal yuj chaon eb k'in yet ixim pan c'am yich ayocok, yujtol a Jehová max aon oc tzalojc'ulal yin is nabal eb, yujtol max k'anjab Dios yin is nabal cham reyal Asiria*fn* yuj colwaj yin watx'jubal templo is Diosal Israel.