Read Q'anjob'al Esd 8 Bible Online

Esd 8 - Q'anjob'al bible

Esd 8

¹A ton listail eb yajaw yayji xol eb yican ti', atac'ala' tz'ibelay eb yin junjun yinatil, a ton eb max tit wetok bay Babilonia yul tiempoal rey Artajerjes:

²Gersón, yin yinatil Finees; Daniel, yin yinatil Itamar; Hatús, yin yinatil Secanías, a ton yin yinatil David; Zacarías, yin yinatil Paros; 150 winak tz'ibbil bay is lista eb ajun yetok eb.

⁴Elioenai c'ajol Zeraías, a ton yin yinatil Pahat-moab, 200 winak ajun yetok.

⁵Secanías c'ajol Jahaziel, yin yinatil Zatu, 300 winak ajun yetok.

⁶Ebed c'ajol Jonatán yin yinatil Adín, 50 winak ajun yetok.

⁷Jesaías c'ajol Atalías, yin yinatil Elam, 70 winak ajun yetok.

⁸Zebadías c'ajol Micael, yin yinatil Sefatías, 80 winak ajun yetok.

⁹Obadías c'ajol Jehiel, yin yinatil Joab, 218 winak ajun yetok.

¹⁰Selomit c'ajol Josifías, yin yinatil Bani, 160 winak ajun yetok.

¹¹Zacarías c'ajol Bebai, yin yinatil Bebai, 28 winak ajun yetok.

¹²Johanán c'ajol Hacatán, yin yinatil Azgad, 110 winak ajun yetok.

¹³Elifelet, Jeiel c'al Semaías xol yinatil Adonicam. Yin tzunanil max meltzojtek eb yetok 60 winak.

¹⁴Utai c'al Zabud, yin yinatil Bigbai, 70 winak ajun yetok.

¹⁵Ayin Esdras in ti', max in wajbaj oc eb ti' bay ti' jun a' aej chi yik Ahava. Oxeb c'ual max on ec' bay tu'. A yet max in k'anlen ec' xol eb anima tu', c'al eb sacerdote, c'am junok levita max ilchaj wuj.

¹⁶Yuj wal tu' xan max wawtejtek eb mimek winak yayji ocok: a ton Eliezer, Ariel, Semaías, Elnatán, Jarib, Elnatán, Natán, Zacarías c'al Mesulam, yetok c'apax eb meẍtol, a ton Joiarib c'al Elnatán.

¹⁷Max in chektok eb toj il-lay Iddo, a ton yajaw yayji bay jun lugar chi yik Casifia. Max walon masanil tzet yetal tol yowalil chi al-lay bay Iddo tu', c'al bay masanil eb ayic' yetok bay tu', yetokc'al eb yinatil eb max ak'wi serbil bay templo, cajan bay Casifia tu', yet watx' chi yitek eb eb anima chi je' colwaj jetok bay templo co Diosal.

¹⁸Yuj is colwal Dios max ilaytek Serebías yuj eb, yujtol a jun winak tu' caw wal jelan, yinatil jun levita chi yik Mahli. A jun tu' max titc'al yetok yuninal c'al yetok yuẍtak. Ay waxaklajonwan eb yin masanil.

¹⁹Max yion c'apaxtek eb Hasabías c'al Jesaías. A eb tu' yinatil Merari eb; yetokc'al yuninal eb, c'al yuẍtak eb, ay junc'alwan eb yin masanil.

²⁰Max jay c'apax oc 220 eb yinatil eb max ak'wi serbil bay templo. Atax cham rey David yetok eb ayoc yin opiso yetok, max aon can oc eb yin colwajwomal yetok eb levita. Masanil juntzan eb ti', tz'ibbil is bi eb bay jun lista.

²¹Lajwi tu' max waloni tol chon oc yin c'ajbanc'ulal bay ti a' aej Ahava, yet watx' chi jiay co ba satak co Diosal, c'al co k'anon c'apaxok tol chon yitok Cham yin watx'il, yetok eb juninal, c'al yetok masanil tzet yetal ay ayon.

²²Ayin ti' max in q'uixwi in k'anon soldado bay cham rey, a ton eb soldado toc'al chi beyi, yetok soldado chi aj yiban chej, yet chon is taynej eb bay eb ajc'ul bay yulak be. Ilab tol mayal jal bay cham rey tu', tol a co Diosal chi taynen mactxel tol a bay Cham chi yal ba, palta chi ya wal tok yowal c'ul yiban mactxel chi bekoncanok.

²³Yuj wal tu xin, xan max on oc yin c'ajbanc'ulal c'al co tewi bay Dios. Caw wal max yab Cham co tewilal.

²⁴Lajwi tu' max in sic'on el lajcawan eb ikbajwom xol eb sacerdote: a ton Serebías, Hasabías c'al yetok lajonwanxa ajun yetok eb.

²⁵Lajwi tu' max wechen ch'en plata c'al ch'en oro yetok ch'en mitx'k'abej, a ton juntzan ch'en max yak' cham rey, yetok eb chi ak'on nabal cham, c'al yetok eb ayoc yin opiso yetok, yetokc'al masanil eb jet israelal ayic' bay tu'. Max wak' juntzan sabalej yet templo co Diosal tu' yul k'ab eb lajcawan sacerdote tu'.

²⁶Max wechej ch'en plata max wak'on bay eb: 500 quintal ch'en yetok juntzan mitx'k'abej tol plata, 75 quintal yalil, yetok 75 quintal ch'en oro;

²⁷yetok 20 sec' ch'en oro, tol ay 17 libra yalil, yetok cab mitx'k'abej tol bronce caw wal watx' cawxi, lajan is tojol axca mitx'k'abej oro.

²⁸Lajwi tu' max walon bay eb axca ti': Ayex ti' sic'bil exxa el yin e yoccan yul k'ab Jehová, ac'ala' yet-xa Cham ch'en oro, ch'en plata, c'al masanil mitx'k'abej tol max salay bay Cham, a ton co Diosal yetok eb jichmam.

²⁹Taynejek wal ch'en masantac'al ok echelay ch'en satak eb yajawilal eb sacerdote, c'al satak eb levita, c'al satak eb yajaw yayji xol yican xol eb jet israelal, a ton bay yulak is cuartoal templo bay Jerusalén, quin chi bay eb.

³⁰Caytu' max yun chaon eb sacerdote c'al eb levita tu' ch'en plata c'al ch'en oro, yetokc'al mitx'k'abej tol mayal echelay tu'. Max yiontok eb bay Jerusalén bay is templo Jehová co Diosal.

³¹A yet 12 waay yet babel xajaw max on el bay ti a' aej Ahava yet t'inanxac'al max juttek co ba bay Jerusalén ti'. A co Dios max on colon el bay eb ajc'ul, c'al bay eb elk'om bay yulak be.

³²A yet max on jayoc bay Jerusalén ti', oxeb c'u max on xewi.

³³Axa yet is can c'ual xin, max con toj bay templo co Diosal yuj yechelay ch'en plata c'al ch'en oro, yetokc'al jantak mitx'k'abej yet templo co Diosal. Lajwi tu' max ak'lay bay cham sacerdote chi yik Meremot, c'ajol Urías. Ay c'apax ec' Eleazar yetok, a ton is c'ajol Finees, yetok eb levita, a ton Jozabad c'ajol Josué, c'al Noadías c'ajol Binuy.

³⁴A yet jun c'ual tu', max echelayi c'al bislay masanil, tz'akan yayji; caytu' max yun tz'ibelaycan ch'en masanil.

³⁵Lajwi tu xin, a masanil eb meltzojnaktek yin presoal max yak'on eb no no' tol chi tz'a yin xajanbalil bay co Diosal ayon israel on ti'. Max ak'lay lajcawc'on no ach'ej wacax, yuj chi ak'lay tz'a juj co masanil, yetok 96 icham calnel, yetok 77 no ach'ej calnel, yetok c'apax lajcawc'on no mam chiwo, yuj xajanbal yuj yak'lay tan mulej. Masanil juntzan tu' max ak'lay tz'a satak Jehová.

³⁶Lajwi tu' max ak'lay tx'an un yet cham rey bay eb ayoc yin yajawilal bay yetc'ulal yayubc'ual a' Éufrates, xan axa jun eb max colwaj jetok yin mulnajil yin templo co Diosal.