Read Q'anjob'al Neh 1 Bible Online

Neh 1 - Q'anjob'al bible

Neh 1

¹A jun ti' is yabixal Nehemías c'ajol Hacalías. Junc'alxa abil yoc Artajerjes yin reyal, yet xajaw Quisleu, ayin Nehemías in ti', a tu' ayin bay Susa capital yet Persia,

²a yet max apni oc jun wuẍtak chi yik Hanani yetok juntzanxa eb max tit bay Judá. Cax max in k'anlen bay eb tzetbil yayji Jerusalén yetokc'al eb betnak ec' preso bay Babilonia.

³Max yalon eb ayin: A eb jet conob tu' ayic' eb bay Judá caw wal yob yayji ec' eb, ayoc eb yin q'uixwilal. A Jerusalén xin, uchchajnaktok is murallail cax tz'anaktok is puertail, ẍi eb.

⁴A wal yet max waben axca tu' cax max in ay chotan ok'ok. Ay wal jayeb c'ual cusc'ulal c'al wayji. Max in oc yin c'ajbanc'ulal, cax max in txajli bay cham Diosal satcan.

⁵Max waloni: Mamin Jehová Diosal satcan, tol miman yayji a mayk'ak'al, chic'al yun a trato yetok eb chach ocheni c'al eb chi iken a chekbanil.

⁶Chin k'an ayach tol cha cha ab in txaj chi wak' ayach yet junjun c'u c'al junjun ak'bal, juj ayon a conob Israel on ti' tol a chekbej jayji. Chi wal co mul on ayach. Ayin ti' yetokc'al eb wichmam, max oc co mul on ayach.

⁷Caw wal yelxac'al yob max jut co ba a satak. Majc'al jikej a chekbanil c'al a ley, c'al tzet max alcan ayon yuj a chekbej Moisés,

⁸xan natek tzet max al bay a chekbej tu': Ta man ok e yikej tzet max wala', ok ex in saklemnejtok bay masanil yulyibank'inal.

⁹Palta tatol ok ex meltzoj pax junelxa ayin, cax ok e yiken in chekbanil, caxc'al mi baytal ayexcantok bay lajubal yulyibank'inal ti', ok ex in wajban paxtek junelxa bay jun lugar tol sic'bil el wuj, bay chi oc ayilal ayin, cachi bay a chekbej Moisés.

¹⁰Ayon ti' a chekbej on, ayon a conob on, max on a colil yuj epalil.

¹¹Chin k'an ayach Mamin, tol cha cha ab in txaj ayin a chekbej in ti' c'al yetok is tewilal juntzanxa a chekbej tol chi jochej chach jiaj can. Cax chin k'anon pax ayach tol chak' ayin yet chi je' wuj yet chi oc t'anan cham rey yin tzet ok wal bay, quin chi. Ayin oc yin batxomalok is vino cham rey Artajerjes.