Read Q'anjob'al Neh 6 Bible Online

Neh 6 - Q'anjob'al bible

Neh 6

¹Axa yet max yaben aj Sanbalat, Tobías, Gesem aj Arabia, c'al yetok juntzanxa ajc'ul oc jin tol mayal watx'ji aj muralla, c'amxa bay jakan, caxc'al mi yel tol c'amto chi oc is puertail,

²max yatek Sanbalat c'al Gesem tu' jun chekbej ayin yuj yaloni tol chi co waj co ba yetok eb bay junok aldea bay ac'al yet Ono. A jun chi na eb tu' a yuj yak'on eb junok yobc'ulalil win.

³Yuj tu' xan max in chektok in chekbej yalon bay eb: C'am in colil, tol caw wal witz'an in yin jun mulnajil caw wal miman yelapnok. Yuj tu' xan c'am chi je' in toji, yujtol ta chin toji, a jun mulnajil ti' chi occan waanok, quin chitok.

⁴Canel wal max chek eb ul al-lay jun k'anej tu' ayin, palta ac'ala' max wut in paktzen bay eb.

⁵Yinxa oyel xin, a wal caw jun is chekbej Sanbalat tu', max chektek ul yak'on jun carta tol jakan,*fn*

⁶bay max yal axca ti': Chi bey k'umal xol anima, cay c'apax tu' yalon Gesem, tol ach ti' yetok eb et israelal lanan e naoni tol ok e pojil e ba yul k'ab reyal Persia, yuj tu' xan lanan e watx'nen aj muralla. Atac'ala' chi yun yel k'umal, tolab ach ok ach oc yin reyal.

⁷Mayal ab aoc eb chekbej Dios yuj yalon el eb tol rey achxa bay Jerusalén c'al bay Judá. A jun e k'umal chi el tu' toc'alta' ok apnok oc bay cham rey Artajerjes, yuj tu' xan titan, cax chon k'anjab wal etok, ẍi Sanbalat yin jun carta tu'.

⁸Lajwi tu xin, max waontok paktzebal bay eb, max waloni tol a juntzan k'anej tu' caw wal man yelok, palta a juntzan tu' toc'al cha na ajok, quin chitok.

⁹A eb tu' max na eb axca tu' yuj on xibten aj eb. Chi mi na eb tol ok cabax aj co c'ul cax c'amxa chi yi ba jun co mulnajil ti'. Palta max in txajli axca ti': Mamin ak' in tec'anil, quin chi.

¹⁰Lajwi tu' max in betic' bay yatut Semaías, c'ajol Delaía, is yitxiquin Mehetabel. A jun tu' mayal makchejtok ba yul yatut. Max yalon ayin axca ti': Co c'ubaj co ba bay templo Dios, cax chi co makchen wal is puertail, yujtol a yet jun ak'bal ti' chi na eb ach ul mak'on camok, ẍi ayin.

¹¹Palta max in tak'wi bay axca ti': ¿Tom in moj chin c'ubaj el in ba in makchen octok in ba bay yul templo yet chin col in ba? Xan man ok in octok bay yul templo tu', quin chi bay.

¹²Max nachaj el wuj tol a jun tu' c'am chi k'anjab axca wal tzet chi yal Dios. A juntzan tu' max yal yuj yak'on yobc'ulal win, yujtol a Sanbalat c'al Tobías mayal yak' eb tumin bay.

¹³Max tojlanej eb yuj in xibtelay aj yuj, yet chi oc in mul yalon eb, yet watx' caw wal yob in binaji, cax chi el in q'uixwil.

¹⁴Xan max in txajli axca ti': Ach in Diosal, natek yuj aon oc yailal yiban Sanbalat yetok Tobías yuj tzet max yun eb. Na c'apax tek xal Noadías yalomal el a k'anej yaloni, c'al yetok juntzanxa eb chekbej chi yochej eb chin xibtej ajok, quin chi yin in txaj.

¹⁵Max lajwi watx'ji muralla yet 25 waay xajaw Elul; 52 c'ual max oc mulnajil tu'.

¹⁶A yet max yaben masanil eb ajc'ul oc jin yetokc'al masanil juntzanxa nacionlak ayic' co cawilal, caytu' max yun xiwaj eb, c'al yaytek is maynejbail eb, yujtol max nachaj el yuj eb, tol a jun mulnajil ti' max yi ba juj yuj is colwal co Diosal.

¹⁷A yet juntzan c'ual tu' xiwilxa carta max tz'ibejtok eb winak mimek yopiso aj Judá bay Tobías, max jayc'al is paktzil.

¹⁸Yujtol xiwil juntzan winak tol mimek yopiso watx' yak'on yetok Tobías, yujc'al tol niej jun tu' bay cham Secanías, c'ajol Ara, c'al Johanán is c'ajol Tobías max nupay yetok is cutz'in Mesulam, a ton is c'ajol Berequías.

¹⁹Yuj tu' xan watx'xac'al tzet chi yal eb yin jun tu' in satak, cax chi yalon eb bay Tobías tu' masanil tzet yetal chi wal ayin ti'. A pax Tobías xin, max yatek carta ayin yin in is xibten ajok.