Read Q'anjob'al Neh 9 Bible Online

Neh 9 - Q'anjob'al bible

Neh 9

¹A yet c'ual 24 yet is suk xajaw tu', max wajbaj oc ba masanil eb israel yin yoc eb yin c'ajbanc'ulal, c'al pichon ba eb yetok el pichilej, c'al yaon ajtok eb pokok yiban jolom.

²Max pojon el ba eb xol eb tx'ok conobal. Max aj lecan eb yin yalon eb is mul, c'al yetok is mul eb yichmam eb.

³Yak'ban ayic' eb bay is lugar tu', oxeb wal hora max awtelay aj tx'an yunal ley Jehová xol eb, axa yin oxebxa hora, max yal eb is mul c'al yion ay ba eb bay Cham.

⁴A eb levita, a ton Josué, Binuy, Cadmiel, Sebanías, Buni, Serebías, Bani, c'al Quenani max ajtok eb bay can, axa yaj yaw eb yin ipejal bay Jehová Dios.

⁵Axa yalon eb levita, a ton Josué, Cadmiel, Binuy, Hasabnías, Serebías, Hodías, Sebanías c'al Petaías axca ti': Ajanek wanok che yalon watx' k'anej bay Jehová co Diosal yin tojbalk'inal. Ach Mamin, al-lay okab watx' k'anej en yin bital, yujtol caw wal mimanbil a binaji.

⁶Mamin Jehová, asannej ach toc'al ta ayach ec'ok, c'am junokxa. Ach ti' max a watx'nej satcan tol txequel, c'al man txequelok, masanil waycan ach max a watx'nej. Ach max a watx'nej c'apax tx'otx' tx'otx' ti' c'al yetok masanil tzet yetal ay bay. Max a watx'nej c'apax a' mar yetokc'al masanil tzet yetal ay bay a'. Ach wal chak' yiquisal masanil tzet yetal, yuj tu' xan chi oc eb ángel yin ayilal ayach.

⁷Mamin Jehová, ach ton wal max a sic'can el Abram. Ach max eiltek bay Ur bay conob eb caldeo, cax max ak'on yik Abraham.

⁸Max ela' tol yikemc'al ayach, xan max a watx'nej jun a trato yetok. Tol ok ak' bay is yinatil cham tx'otx' tx'otx' yet eb cananeo, eb hitita, eb amorreo, eb ferezeo, eb jebuseo c'al eb gergeseo. Mayal ak' yun a k'anej yujtol chi yunc'al bay chala'.

⁹Max el c'apaxok tzetbil max yun yaben yail eb jichmam on bay Egipto, max aben yaj yaw eb bay ti a' Cakyin Mar.

¹⁰Max a watx'nej milagro c'ayubtakxac'al yin cham reyal Egipto, c'al yin masanil eb is chekbej, c'al yin masanil anima ay bay yul is conobal, yujtol max ela' tzet wal max yun yetnelay eb jet israelal yuj is ch'aanilal eb. Cay wal tu' max yun eon a mimanbilal chi binaj tinani'.

¹¹Max a pojay nan a' mar tu' satak eb, max ec'tok eb bay takin tx'otx'. Axa eb tzakan oc yintak eb tu xin, max tojcan eb yich a' axca wal chi yun tojcan junok ch'en ch'en bay najabil yich a'.

¹²Lajwi tu' max ekban eb yet c'ualil yetok jun miman asun, axa yet ak'balil yetok jun miman k'ak'ej max ekbaj eb, a ton yuj jun tu' max a tzektanej is be eb bayc'al max ca toj eb.

¹³Lajwi tu xin, max ach tit bay satcan max ach ayol bay jolom witz Sinaí, axa a k'anjab aytek bay eb. Max ak'on ley tol tojol bay eb, c'al cuybanilej tol caw wal yel, yetokc'al chekbanilej caw wal watx'.

¹⁴Max a cuyon eb tol chi yikej eb c'ual xewilal yuj ach yion aj can eb, max ak'on chekbanilej c'al cuybanilej bay Moisés, axa cham max alon bay eb.

¹⁵Max ak'on loj yet satcan bay eb yet ay wajil eb, c'al aej max eltek sat ch'en yet max ec' takintial eb yuj. Lajwi tu' max alon bay eb tol chi octok cajan eb bay tx'otx' tx'otx' max ak' a ti' ak'on bay eb.

¹⁶Palta a eb jichmam on tu' caw wal ch'aan eb, pit max yut ba eb, tokwal max cha yab eb a chekbanil.

¹⁷Maj yikej eb c'al naontek eb masanil jantak mimek tzet yetal max on yuj is watx'ilok eb. Caw wal pit max yut ba eb. A ti' yet eb, tol max yaoc eb jun is yajawil yet max ikbelay meltzoj eb yin mosejal bay Egipto junelxa yaloni. Palta ach ti' Dios tol ak'om ach mimanc'ulal, Dios ach tol c'un cusaj a c'ul. Miman a c'ul. Ay wal a camc'ulal, maj wal yal a c'ul max a bekcan eb.

¹⁸Toltax a yet max watx'nen eb jun ch'en yechel wacax, max yalon wal eb tolab a jun tu' is diosal eb max ion eltek eb bay Egipto, cax max yaon wal oc eb is mul yelxac'al yob,

¹⁹palta ach ti' yetok a mimanc'ulal, majc'al a bekcan eb bay takin tx'otx'. A jun miman asun maj el satak eb yet c'ualil yuj yikbelay eb yuj bay yulak be, tamwal jun miman k'ak'ej maj el satak eb yet ak'balil yuj tzektelay eb yuj bay max ca toj eb.

²⁰Max ak' a Espíritu Watx' bay eb yuj cuylay eb yuj. A maná max ak' lo eb; c'am jabok max majax aj bay eb, max ak'on aej yuc' eb yuj yec'tok takintial eb.

²¹Max ak'c'al lobej eb bay takin tx'otx' yin cawinak abil. C'am wal jabok tzet yetal max majax aj bay eb, maj lajwok el is pichil eb yin, tamwal max malaj yakan eb yuj beyil.

²²Max ak' wal conoblak c'al nacionlak bay eb. Max a pojon ec' is parcela eb, max chaon eb satak bay Hesbón, a ton bay jun nación tu' bay ayoc Sehón yin reyal, c'al bay Basán, a ton c'apax bay ayoc Og yin reyal.

²³Max ak'on xiwil yuninal eb axcaxac'al bisil waycan bay satcan, max eontok eb yin chaon is satak bay max ak' a ti' ak'on bay eb jichmam on.

²⁴Max oc eb yuninal eb yion tx'otx' Canaán. Ach max ak' ayc'ay eb cajyom bay jun tx'otx' tu' satak eb. A eb rey c'al eb anima bay jun makan tx'otx' tu' max aoc yul k'ab eb, max utlay wal eb cananeo tu' yuj eb jichmam on, axca bay max el yin c'ul eb.

²⁵Max yion c'apax eb conoblak tol caw wal watx' cawxi, c'al tx'otx' tx'otx' caw wal watx' chi yun yawojal, c'al na tol caw wal nojnak yuj tzetak yetal watx'. Max yion c'apax eb uc'bala', uva, olivo, c'al juntzanxa te te' tol chi yak' sat. Max low eb masantac'al max yal noj c'ul eb, max bak'echbi el eb, max yak' wal tzalojbok eb c'ul yuj a watx'c'ulal.

²⁶A eb jichmam on pit max yut ba eb, max oc eb tenomtakil ayach, max yintaknej el eb a ley. A eb a chekbej, tol chi tenchanen eb c'al yaloni tol chi yaoc ba eb yul a k'ab max mak'lay cam eb yuj eb. Yelxac'al miman max yun yoc mul eb ayach.

²⁷Yuj wal tu' xan max aoc eb yul k'ab eb ajc'ul, a ton eb tu' max etnen eb. A wal yet ayoc eb yin somc'ulal, max k'anon eb a colwal, axa pax ach xin, yuj wal a miman yabenc'ulal max ab is tewilal eb tac'al bay satcan. Max ak'on eb winak tol max colon el eb bay eb chi etnen eb tu'.

²⁸Axca tu xin, a yet ayoc eb yin junc'ulal junelxa, cax chi meltzoj pax eb yunen yobtakil a satak. Yuj tu' xan max a bek pax ayc'ay eb yul k'ab eb is yajc'ul, a ton eb tu' max aon oc eb yin yailal. Lajwi tu' max k'anon pax eb a colwal. Yujtol ay a yabenc'ulal max aben pax tewilal eb tac'al bay satcan. Xiwil el max a colcan el eb.

²⁹Max alon bay eb tol chi yikej eb a ley. Palta ch'aanc'al max yut ba eb, xan maj yikej eb a chekbanil. Max yetnen el eb a ley tol chi ak'on is cawil eb chi ikeni. Tenomtak eb, pit max yut ba eb, majc'al cha yab eb.

³⁰Xiwil abilal max ak'c'al mimanc'ulal yin eb, max ak'onc'al yojtaknej el eb yuj a Espíritu c'al yuj eb a chekbej. Palta majc'al cha yab eb. Yuj tu' xan max acan oc eb yul k'ab juntzanxa nacionlak.

³¹Palta xin, yuj wal a yabenc'ulal xan maj ak'xac'al lajwok el eb masanil, tamwal max a bekcan eb, yujtol ach ti' Dios ach tol ay a yabenc'ulal, c'al a watx'c'ulal.

³²Yuj wal tu', ach co Diosal tol miman ayji ocok, ay epalil, a moj tol ay co xiwc'ulal ayach, tol c'amc'al chi toj c'ayc'ulal a trato oj yuj a miman camc'ulal. Manokab yaynakilok yayji oc yul a sat is yatakilal eb co reyal on, c'al eb co yajawil on, eb sacerdote, eb a chekbej, c'al eb jichmam on c'apaxok, c'al yetok masanil eb jet conob on. Max yabc'al yail eb yettaxc'al yul is tiempoal eb reyal Asiria masantac'al yet tinani'.

³³Palta c'amc'al tzet yetal man watx'ok chon yin tzet yetal chi ec'tok jiban. Ach ti' watx'c'al tzet chonej, xal on xin, caw wal yobc'al tzet chi jun on.

³⁴A eb co reyal on, eb co yajawil on, c'al eb sacerdote, yetokc'al eb jichmam on, majc'al cha yab eb, tamwal max yikej eb a chekbanil axcac'al max yun yal-lay bay eb.

³⁵Palta axa wal max yun xin, a bay is makbej eb, maj wal oc eb yin ayilal ayach, tamwal max bekcan eb is yob beybalil, caxc'al mi tol xiwil tzet yetal max ak' bay eb, cax max ak'on miman tx'otx' tx'otx' tol caw wal yax sat ti' bay eb, bay jun nación max ak' bay eb tu'.

³⁶Ilab wal jili tinani', mayal wal on meltzoj oc yin mosejal bay tx'otx' tx'otx' max ak' bay eb jichmam on yet chi lo eb sat yawoj.

³⁷A wal sat awoj tol xiwil chi yak'a' yet eb rey yayji ocok, a ton eb max acan oc jiban on yuj wal co mul chi oqui. Chi yun eb tzet chi yochej c'ul jin on, c'al yin co jobbejal no' on, yuj tu' xan caw wal ayon oc yin bilc'ulal tinani'.

³⁸Yuj wal tu' xan ayon ti' chi jak' co ti' chi tz'ibelaycanok tol ok jikej wal yin yel, yuj tu' xan a tx'an un tu' chi oc sello c'al is bi eb co yajawil, eb levita c'al eb sacerdote yin, ẍi eb yin is txaj.