Read Q'anjob'al Est 1 Bible Online

Est 1 - Q'anjob'al bible

Est 1

¹A jun abix ti' max uj yet wal ayoc cham Asuero yin reyal yin jun nación tol 127 departamentoal yayji, chi tojtac'al bay India masantac'al bay Etiopía.

²A bay conob Susa, a tu' ay wal is despacho.

³A yet max lajwi oxeb abil yoc cham Asuero yin reyal, max yak'on cham jun miman loj bay eb mimek winak ayoc yin yajawilal yetok, eb soldado bay Persia c'al bay Media, c'al yetok eb yajaw c'al eb mimek winak yayji yul junjun departamento.

⁴Nan wal abil max yak' yin tx'oxon el is beyomal c'al is mimanbilal bay eb, a ton is mimanbilal yayji oc yikbej.

⁵Max lajwi tu' cax max chaon cham rey jun k'in tu' yin ukeb c'ual, bay yamak'il is palacio tu'. Masanil eb wajan ec' bay conob Susa, axca eb mimek yelapnok c'al eb yaynakil, max awtelay eb.

⁶Watx'xac'al yili jun amak' tu' yetok sak k'ap, c'al yax k'ap, axa an púrpura ayoc is tx'anilok cax mitx'bil aj locan yetok ch'en argolla naba plata, axa yoyal mitx'nej ajok naba mármolxac'al elok. Ay c'apax oc oro c'al plata yinlak ẍila, axa sat amak' tu' ayay ch'en ch'en manxa watx'ilok yili, sak c'al k'ek.

⁷A yulak vaso oro chi yuc'a' eb, tx'ok tx'okc'al yili junjun vaso tu'; caw wal xiwil vino tol max el wal yin c'ul cham rey tu' yak'oni.

⁸Max yak' cham rey orden bay eb yilomal is na, tol c'am chi ak'lay pural eb yuq'uen vino; chi je' yuq'uen junjun atac'ala' is beybal c'al jantak chi yochej c'ul.

⁹Axca tu' max yun c'apax xal reina Vasti, max chek c'apax xal watx'nelay loj bay eb ix ix yul yatut cham rey Asuero.

¹⁰A wal yet is suk c'ual caw wal tol chi tzaloj c'ul cham rey yuj vino, yuj tu' max chekon cham ukwan eb yak'omal serbil ayoc yipok c'ul, a ton Mehumán, Bizta, Harbona, Bigta, Abagta, Zetar c'al Carcas,

¹¹yet chi toj eb yiontek xal reina Vasti satak cham rey yetok is corona toxac'al chi jopopi, yet chi tx'oxlay is watx'il yili xal satak masanil conob c'al satak masanil eb mimek yajaw, tol caw wal watx' yili xal.

¹²Palta xal reina tu' maj cha' c'ul xal axca is chekbanil cham rey max toj yal eb chekbej tu', xan maj tit xal. Yuj wal tu xin, xan caw wal max tit yowal cham rey.

¹³Atac'ala' beybalej, xan max k'anlej cham rey bay eb cuywinak yin ley tzet chi yun cham yuj maj yikej xal reina tita.

¹⁴A eb tol ay wal oc yipok c'ul cham rey, a ton Carsena, Setar, Admata, Tarsis, Meres, Marsena c'al Memucán, a ton ukwan winak tu' tol sat yajaw yayji bay Persia c'al bay Media ti', a ton eb chi oc yin k'umbalba yetok cham rey.

¹⁵Max k'anlej cham rey bay eb axca ti': —Atac'ala' ley ¿tzet yetal yowalil chi utlay xal reina Vasti yujtol maj yikej in chekbanil max in chek bet yal eb nak in chekbej bay? ẍi cham.

¹⁶A satak masanil eb wajan ec' yin k'umbalba tu', max yal Memucán axca ti': —A xal reina tu' man asanok a satak mamin rey, max oc is tenomtakil, palta caw yob c'apax tzet max yun xal co satak co masanil ayon mimek yajaw on ti', c'al bay masanil eb winak yul is makbej cham rey.

¹⁷A tzet max yun xal tu' ok yojtaknej el masanil eb ix ix, cax ok cuyontok eb ix yet tol c'amxa yelapnok is yichamil eb ix yul sat, cax ok mi yalon eb bay yichamil axca ti': A cham rey Asuero max awtelay xal reina Vasti yuj, palta maj yikej xal toji, ẍi mi eb.

¹⁸Mawal axca eb xal yetbi eb cham mimek yajaw bay Persia c'al bay Media, a wal yet ok yaben eb xal tzet max yut ba xal reina ti', ok yal eb xal jun ti' bay is yichamil. A yuj jun tu' ok mi yintaknej el eb xal yichamil, cax mi ok tit yowal eb yin eb xal.

¹⁹Yuj tu' ta watx' chab mamin rey, chak' junok ley, cax chi tz'ibelay can yul leyal Persia c'al Media, tol c'amxa chi q'uexlay junelxa: Tol c'amxa yechel chi jayoc xal reina Vasti a satak, axa junokxa ix ix ec'ban watx'il yintak xal tu', chi oc reinail is q'uexelok.

²⁰A jun ley tu' yowalil chi ojtaknelay el bay masanil yul a nación. Axca tu' masanil eb ix ix caw wal ok yikej bay yichamil tzanc'al tzet makanil anima, ẍi cham Memucán tu'.

²¹A jun nabalej max yak' cham Memucán tu' caw wal max cha c'ul cham rey yetokc'al masanil eb chi lajtinen k'anej yetok, cax max ocxac'al yopiso yuj cham rey.

²²Yuj tu' xan max yatok carta bay junjun departamento yul is makbej, max tz'ibelaytok yin is ti' junjun conob. Max yalontok yul tx'an tol ayokab yikbej eb winak yul yatut, asannejokab eb chi alon tzet chi yunej.