Read Q'anjob'al Est 3 Bible Online

Est 3 - Q'anjob'al bible

Est 3

¹Lajwi yuj juntzan tu xin, max yaon oc cham rey tu' is yopiso Amán, is c'ajol Hamedata yin sat yajawil yin juntzanxa eb yajaw bay yul nación. Yinatil Agag, Amán ti'.

²Masanil eb chi ak'on serbil cham rey bay is despacho tu', yowalil chi ay jajan eb c'al yay nojan eb satak Amán bay chi eq'ui, yujtol axca tu' max yun yalon cham rey; axa pax Mardoqueo xin, maj yikej jun chekbanilej tu'.

³Axa eb ayoc yin yajawil yuj cham rey tu', max k'anlen eb bay Mardoqueo tzet yuj xan c'am chi yikej jun chekbanil tu'.

⁴Junjunc'al c'u chi yal eb bay, palta c'am chi cha yab Mardoqueo bay tzet chi yal eb tu', yujtol mayal yal bay eb tol israel. Catatu' max toj yalon eb bay Amán, yet watx' ok yila' ta toc'al ok can yuj axca tu'.

⁵A yet max yilon wal Amán tol yel toni c'am chi ay jajanok c'al yay nojan Mardoqueo tu' bay is satak yet chi eq'ui, yuj tu' xan max tit wal yowal sic'libil.

⁶Yujtol mayal yal Mardoqueo tu' tzet conobal, xan max na' Amán tol man k'okbilok tol asan Mardoqueo chi alay oc yailal yiban, palta max na c'apaxok tzetbil wal chi yun lajwi el masanil eb israel cajan bay yul is makbej cham rey Asuero.

⁷A yet babel xajaw yul abil, a ton xajaw Nisán, yet lajcawebxa abil yoc cham rey Asuero yin reyal, max alay oc suerte satak Amán yin tzet c'ual c'al tzet tiempoal chi yi ba jun tzet chi na tu'. Axa max yun xin, a suerte tu' max ayc'ay yin 13 waay yet is lajcaweb xajaw, a ton chi yik Adar.

⁸Yuj tu' xan max yal Amán bay cham rey axca ti': —A bay masanil conob ay yul a makbej mamin rey, ay jun makan anima tx'ok yeli. Tx'ok yel is ley yintakc'al juntzanxa conob, tol c'am chi yikej a ley mamin rey. Man is mojok chi cajay ec' eb bay yul a makbej ti'.

⁹Yuj tu' xan ta chi cha a c'ul mamin rey, ailtok junok ley xin, yet chi yab masanil conob tol chi lajwi el eb israel tu' masanil, axa ayin ti' ok wak' junok 7,500 quintal ch'en plata bay a tesorería, ẍi.

¹⁰Xan max yiel cham rey is colk'ab bay ayoc sello, max yak'on bay Amán, a ton jun ajc'ul yin eb israel,

¹¹max yalon bay axca ti': —A ch'en plata max al tu' canokabc'al ch'en ayach, yetokc'al jun makan anima tu', et chi yuncanok, chi je' cha watx'nej tzet chi cha a c'ul yin eb, ẍi bay.

¹²A yet 13 waay babel xajaw yul abil, max awtelay masanil eb yajtz'ib cham rey, yuj tz'iben eb orden max yak' Amán yet chi toj bay masanil eb yajaw bay junjun conob yul makbej cham rey Asuero. A jun orden tu' max tz'ibelay yin is ti' c'al yin is letrail junjun conob. Max oc sello cham rey yin, yujtol ajun cham chi aloni.

¹³Yin aymanil max alaytok yin correo bay masanil yul is makbej cham rey tu'. Max yal yin tx'an orden tu' tol yin junnej c'ual chi c'aylay el masanil eb israel, chi yal elapnok masanil eb winak c'al eb ix ix, eb icham anima c'al masanil eb unin, cax chi ilay can ec' masanil is tzet yetal eb. A jun c'ual max nalay tu', a ton yet 13 waay yet 12 xajaw, a ton xajaw Adar.

¹⁴Max toj is copiail jun ley tu' bay masanil is makbej cham rey, max al-lay el yin k'anejal xol conob yet watx' naanxac'al yuj masanil anima yet jun c'ual tu'.

¹⁵Ayman max saklemtok tx'an ley tu' yuj correo atac'ala' orden cham rey. Ayman max al-lay el jun k'anej tu' bay yul conob Susa. Yak'ban chi uc'wi an cham rey yetok Amán, axa anima bay conob Susa tu', caw wal sombinak ay c'ul eb yuj jun k'anej tu'.