Read Q'anjob'al Est 7 Bible Online

Est 7 - Q'anjob'al bible

Est 7

¹Max toj cham rey yetok Amán bay jun miman loj tu'.

²Axa yet jun c'ual tu' yet lanan yuc'wi vino eb, max yalon cham rey bay xal Ester axca ti': —K'an tzet yetal chi yochej a c'ul, cax ok wak'on ayach, caxc'al mi a nanok in makbej ti' cha k'ana', ẍi cham.

³Max tak'wi Ester axca ti': —Ta ay a camc'ulal win xin mamin rey, ta watx' in yul a sat, a tzet yetal chi yochej in c'ul chin k'an ayach tol chak' mimanc'ulal win yetok in conob tol c'am chon cami.

⁴Yujtol ayin ti' yetokc'al in conob max on txonlayi yet chon ak'lay lajwok yin junelnej. Matawal tol toc'al chon txonlaytok yin mosejal yetok in conob ti', man mi mojok tol chi wiec' a tiempo, akxa xin, tol ok on c'aylayxac'al el junelnej, ẍi xal.

⁵Axa k'anlen cham rey Asuero axca ti': —¿Mactxel jun tu'? ¿Baytal ayoc jun mac chi naon jun tzet yetal tol ayxa may yayji oc tu'? ẍi cham.

⁶Max yalon Ester axca ti': —A jun ajc'ul tol yob is nabal tu', a ton jun Amán ti', ẍi. A wal yet max yaben Amán jun k'anej tu', sakxac'al max yun yili sat yuj xiwilal bay satak cham rey c'al satak xal reina Ester tu'.

⁷Max aj wan cham rey Asuero yetok yowal, max eltek bay yul nail bay chi oc loj tu', max eltok bay ay an xumac ti' despacho. Axa Amán xin, a yet max yiloni tol ok alay oc camich yiban, max cancan bay yul nail bay chi oc loj tu' cax max tewi oc yin xal reina Ester tol chi yak' mimanc'ulal yiban.

⁸Lajwi tu xin, max meltzoj pax octok cham rey yul na bay chi oc loj tu', max yiloni tol max bekay telan ba Amán bay is tx'at Ester yuj k'anon mimanc'ulal tu'. Max yalon cham rey axca ti': —¿Tom chi yochej a c'ul chon yobtakil yin xal reina ti' bay yul watut ti'? ẍi cham. A yet max yalon cham rey juntzan k'anej tu', ayman max makchelay el sat Amán tu' yuj eb is chekbej cham. Max yalon jun is chekbej chi yik Harbona bay: —A bay yatut Amán ti' ay jun te te' tol jun wal tx'anil is tel, tol a' max chekon watx'nelayok bay t'inan chi aj locan Mardoqueo yaloni, a ton jun watx' tzet max yun ayach, mamin rey, ẍi. —A yin jun te' tu' che locbaj ajok, ẍi cham rey.

¹⁰Yuj tu xan, max aj locan Amán tu' yin jun te' max watx'nej aj tu', tol yet Mardoqueo yaloni. Caytu' max yun yec'tok yowal c'ul cham rey tu'.