Read Q'anjob'al Est 8 Bible Online

Est 8 - Q'anjob'al bible

Est 8

¹A wal yet jun c'ual tu', max yak'on cham rey bay xal Ester is yatut c'al masanil tzetak yetal Amán a ton jun is yajc'ulben eb israel. Axa cham Mardoqueo max apni oc satak cham rey, yujtol mayal yal xal Ester tol yican ba yetok cham.

²Max yion el cham rey ch'en colk'abej max yican ec' bay Amán, max yak'on bay cham Mardoqueo. Axa pax xal Ester xin, max yacan oc masanil is tzetak yetal Amán yul is k'ab cham Mardoqueo tu'.

³Max apni pax xal reina Ester junelxa bay satak cham rey, max ay jajanok, max c'oli yok'i, max k'anoni tol chi ak'lay lajwok jun orden caw wal yob max watx'nej Amán yinatil Agag, tol c'amokab chi yun tzet chi yal tu' yin eb israel.

⁴Max yaontek cham rey is k'okoch naba oro yet yikbej bay, axa yaj wan xal Ester tu' satak cham rey.

⁵Max yalon axca ti': —Ta watx' in yul a sat mamin rey, cax ta tojol yoc tzet chin k'an ti' chabej, cax ta caw wal yel ay a camc'ulal win mamin rey, tol chak' tz'ibelay junok orden yet chi ak'lay lajwok tzet chi yal tx'an carta max yatok Amán c'ajol Amedata bay masanil yul a makbej bay chi yala' tol chi mak'lay cam masanil eb wet conob.

⁶Yujtol man ok techaj wuj wilon tzet yetal t'inan ok tit yiban eb wet conob c'al yiban masanil eb wican tol t'inan chon c'ayil co masanil, ẍi xal.

⁷Max yalon cham rey Asuero bay xal Ester c'al bay cham Mardoqueo axca ti': —A Amán tu' mayal aj locanok yujtol yob tzet max na' yin eb e yet conob cax mayal wak' masanil is tzet yetal ayach Ester.

⁸A tinani' tz'ibejektok axca chi yochej e c'ul yuj is watx'ilok masanil eb e yet conob tu', cax chi oc in bi c'al selloal wikbej yin tx'an, yujtol a junok tx'an un bay ayoc in bi c'al in sello yin, c'am chi je' tenlay tzet chi yala', ẍi cham.

⁹Ayman max awtelaytek eb yajtz'ib cham rey, yet wal 23 waay yet is yox xajaw, a ton jun xajaw Siván. Masanil tzet max yal Mardoqueo max tz'ibelaytok bay masanil eb israel c'al bay eb gobernador, c'al bay eb capitán yetokc'al bay masanil eb yajaw ayoc bay 127 departamento chi tojtac'al bay India masantac'al bay Etiopía. Max tz'ibelaytok yin is ti' c'al yin is letra junjun conob. Max tz'ibelaytok yin is ti' eb israel c'apaxok.

¹⁰Max oc c'apax is sello cham rey Asuero yin tx'an orden tu' yuj tx'oxoni tol ajun cham chi aloni. A eb correowom, a yiban no chej jelan beyi, a ton no chej cham rey ayic' bay caballeriza max oc eb, cax max toj eb yak'on tx'an un tu'.

¹¹A yin tx'an chi al-laytok is yikbej eb israel yalc'al tzet conobal bay cajan eb, tol chi wajbaj ba eb yuj taynen ba eb, cax chi mak'on cam eb eb ajc'ul c'al yak'on lajwok eb. Axa eb chi ion can masanil is tzetak yetal eb ajc'ul tu', eb tol caw wal ay is mitx'k'ab yin owal, yalc'al tzet conobal chi oc ajc'ulal yin eb. A eb chi oc ajc'ulal yin eb tu' tojolc'al cami, c'amxa yelapnok eb ix ix c'al eb unin.

¹²A masanil juntzan tu', junnej c'ual chi yunej bay masanil yul is makbej cham rey Asuero; a ton yet jun c'ual tol txequelxa yayji, yet 13 waay yet is lajcaweb xajaw, a ton jun xajaw Adar.

¹³A copiail tx'an orden tu', yowalil chi toj bay masanil departamento cax chi al-lay el xol masanil conob tol ley yayji ocok, yet watx' a yet jun c'ual tu', a masanil eb israel naanxac'al yuj eb yuj pakon ba eb bay eb ajc'ul tu'.

¹⁴Yin aymanil chi toj eb yiban chej tu' atac'ala' yalon cham rey. Max al-lay c'apax el jun ley tu' bay conob Susa, babel conob yayji yul is makbej.

¹⁵A yet max eltek cham Mardoqueo bay yul despacho, ayoc yax c'al sak pichilej yuj axca yet eb rey. Ayaj jun miman corona oro yin is jolom yetok jun k'utilej lino púrpura yili ayoc yuj. A yet tu' masanil eb aj conob Susa max awji eb yuj tzalojc'ulal.

¹⁶Yuj tu' a eb israel caw wal max el lenaj max yil eb, yet tu' manxa tzalojc'ulalok, max ilay wal can eb max yabej.

¹⁷A yet max apni oc jun ley tu' bay masanil lugar c'al bay masanil conob, a masanil eb israel caw wal max tzalojbi aj eb. Max chaon eb k'in, max oc mimek loj yuj eb. Xiwilxa eb anima aj conoblak max yaoc ba yin israelal yuj xiwc'ulal bay eb israel tu'.