Read Q'anjob'al Ex 1 Bible Online

Ex 1 - Q'anjob'al bible

Ex 1

¹A ton is bi eb c'ajol cham Israel ajun yetok ti' yet max apni oc bay Egipto, yetokc'al is yuninal junjun eb:

²Rubén, Simeón, Leví, Judá,

³Isacar, Zabulón, Benjamín,

⁴Dan, Neftalí, Gad c'al Aser.

⁵70 chi cha ba is yinatil cham Jacob tu' yet max apni oc bay Egipto; axa pax cham José xin, ayxac'alta' ec' cham bay tu'.

⁶A cham José tu', c'al masanil eb yuẍtak, c'al eb ajun yetok cham Jacob tu', max cam eb masanil.

⁷Palta xiwilto yinatil eb max elcanok, cax max aj wal can bisil eb. Yelxac'al ay is may max yun eb. Max nojil masanil yul nación Egipto tu' yuj eb.

⁸Axa max yun xin, yinxa tzunanil, max oc junxa cham rey bay Egipto tol manxa ojtakbilok cham José yuj. Max yalon cham bay masanil conob:

⁹Chi mi e yil tinani' tol xiwil juntzan israel ti', yelxac'al ay is may eb jintak.

¹⁰A tinani xin, yowalil chi co na' tzet chi yun eb, yet watx' man ok ajxac'al can is bisil eb, yujtol ta ay bak'in ay mac chi tit yak'on owal jin, cax chi yaon oc ba eb yetok eb jajc'ul, axa yoc eb nak yin owal jin tu', cax mi chi elcan eb cayti', ẍi cham rey tu'.

¹¹Yuj tu xin, xan max alay oc yilomal eb nak israel yin mulnajil; max alay oc eb yin mulnajil caw wal yatak. Max cheklay watx'nej eb cab mimek conob, a ton Pitón c'al Ramsés. A bay juntzan conob tu' max c'ubaj cham rey ixim trigo.

¹²Caw wal chi etax eb israel yuj eb aj Egipto, palta yelxac'al chi aj can is bisil eb; yuj tu' xan max xiwaj eb aj Egipto bay eb.

¹³Max occan eb israel yin mulnajil yatak yuj eb aj Egipto.

¹⁴Ec'om ya' chi yun eb winak tu' yin mulnajil. Max alay oc eb yin tec'oj tz'otz'ew c'al watx'nej xan. Mannejc'alnak tu', palta a eb chi ilon mulnajil yin awoj trigo, c'al juntzanokxa tzet mulnajilal, ac'al eb nak chi iloni. Caw wal ok'bal c'ul max utlay eb israel tu'.

¹⁵Ay wal junxa max utlay eb yuj cham rey tu'; max k'anjab cham bay xal Sifra c'al xal Fúa, a ton eb xal partera yayji xol eb ix hebrea (ma israel), max yalon cham axca ti':

¹⁶—A yet che yilon watx'ji c'ul eb ix hebrea ti', a wal yet chi jay jun yaliẍ unin tu' cax che yiloni, ta ix, ch'ibokabi, palta ta winak, che mak' camok, ẍi cham. A ton jun chekbanilej ti' max yak' cham rey bay eb xal.

¹⁷Palta xin, a eb xal partera tu' chi xiw eb xal bay Dios. Maj yikej eb xal axca max yal cham reyal Egipto tu', toc'al chi yiloc eb xal yet chi jay eb winak unin tu'.

¹⁸A yet max yaben cham rey jun tu xin, max awtelay eb xal yuj cham, cax max yalon bay eb: —¿Tzet yuj xan toc'al che yiloc juntzan winak unin chi alji tu'? ẍi cham. Max yalon eb xal:

¹⁹—Yujtol man lajanok eb ix hebrea yetok eb ix aj Egipto, tol ay yip is mimanil eb ix hebrea tu', c'amtoc'al chon apni oc on, chi watx'jinaj c'ul eb ix, ẍi eb.

²⁰A yuj tzet max yun eb xal partera tu' xan caw wal max aj can bisil eb israel, yelxac'al ay is may eb.

²¹Yujtol ay yelapnok Dios yul sat eb xal tu', xan max yak' Cham is watx'c'ulal yiban eb c'apaxok, xan max yak' yune' eb xal.

²²A yet max yilon cham rey tol c'am chi je' axca tu', cax max yalon cham bay eb is conob axca ti': A masanil eb winak unin chi chaloj e yuj xol eb hebreo ti', che k'okaytok yul a', axa pax eb ix unin xin, ch'ibokab eb, ẍi cham rey.