Read Q'anjob'al Ex 11 Bible Online

Ex 11 - Q'anjob'al bible

Ex 11

¹Maxax yal Jehová bay Moisés: —Okto watek junokxa yailal yiban jun rey ti' c'al yiban masanil nación Egipto. Ok lajwok jun ti' xin, man asannejok tol ok ex beklay el yuj, palta tol a wal caw ok ex ukten el cayti' yin junelnej.

²Yuj tu xin, al bay masanil israel, eb winak c'al eb ix, tol chi k'an eb oro c'al plata bay eb aj Egipto cajan is cawilal, ẍi Cham.

³Axa Jehová max k'anjab yin is nabal eb anima aj Egipto, yet chi yak'on eb is watx'c'ulal bay eb israel. Ac'ala' eb nak ay yopiso yetok cham rey, max yalon eb tzetbil tol miman yelapnok cham Moisés yul sat eb. Ac'ala' axca tu' yalon masanil eb anima bay Egipto.

⁴A yet c'amto chi eltek Moisés, maxto wal yal bay cham rey: —Axca ti' yalon Jehová: A yet ok oc chuman ak'bal, ok in ec' bay masanil yul yet Egipto ti'

⁵yin wak'on cam masanil eb babel unin bay junjun nail eb aj Egipto; chi chail yich yin a babel c'ajol, nak t'inan yoccan a q'uexelok bay a despacho, masantac'al chi cam c'apax is babel unin eb ix chekbej chi mulnaj yin ca', cax ok cam c'apax no babel yune' no no'.

⁶A bay masanil yul yet Egipto, manxa ok'ilok ok ujok, c'amc'al bay max uj yet yalantok, tamwal okto uj junelokxa.

⁷Palta c'amc'al tzet ok on eb israel, yuj e yojtaknen elok tol ayin ton wal Jehová in, cax che yojtaknen elok tol ay is q'uexanil eb israel yintak eb a conob yul in sat, tol xajan eb israel ti' wuj; tamwal ok chiwaj junok no tx'i' yin junok eb israel, tamwal yin junok is jobbejal no' eb, ẍi Jehová.

⁸Cata wal tu' ok jayoc juntzan winak ay yopiso etok ti' in ul yiloni, cax ok ayxac'al jajan eb, cax ok k'anon eb ayin: Asek, yetok masanil mac tzunan oc entak, ẍixac'al eb. Yuj tu xin, ato yet tu' cax chon tojxac'al on, ẍi Moisés. Caw wal ow Moisés yet max eltek satak cham rey.

⁹Maxax yal Jehová bay Moisés: —Manc'alta' ok cha yab cham rey bay ok e yala'; yuj tu xin, xiwil toc'al tzet c'ayubtak ok wun bay Egipto ti', ẍi Cham.

¹⁰A Moisés, c'al Aarón max yun eb tzetak yetal maxax al-lay ti' tol c'ayubtak bay satak cham rey, palta tutun wal a Jehová max ak'onc'al pitbok el is nabal, xan c'amc'al chi beklay el eb israel yuj cham bay yul is nación.