Read Q'anjob'al Ex 12 Bible Online

Ex 12 - Q'anjob'al bible

Ex 12

¹Cax max yalon pax Jehová bay Moisés c'al bay Aarón bay Egipto axca ti':

²A jun xajaw ti' miman yelapnok ayex, babel xajaw yul junjun abil chi yuncanok.

³Alek bay masanil eb israel jun chekbanilej ti': A yet 10 waay jun xajaw ti', junjunc'al winak ok yitek junok no yune' calnel, ma junok no yune' chiwo yet chi chi' yetok masanil eb cajan yetok.

⁴Tatol c'am wal tx'ial anima yul is na xin, c'am chi tzakay eb chion no', chi je' yawten nak aj na tu' mac cajan is cawilal yet chi colwaj eb chion no' yetok, chi pojlay ay no' atac'ala' jantak bisil anima ma jantak chi chi' junjun eb.

⁵A no no' tu' ach'ej calnel ma ach'ej chiwo, yowalil tol jun abil is k'inal, cax c'am jabok is tacnakil no'.

⁶Che pojcan el no' masantac'al yet 14 waay jun xajaw ti', cax ok mak'lay cam no' yet jun c'ual tu', junejc'al ok yun cam no' yet k'ekbintakil.

⁷Masanil anima ok bonoc is chiq'uil no' yin marcoal puertail na, yin te' yiban, c'al yinlak te' bay is tz'eyil, a ton te' na bay ok chilay no' tu'.

⁸A yet jun ak'bal tu', ok chion eb anima no chibej tu', palta toc'al ok bol-lay no' cax ok chion eb c'a itaj yetok no', c'al ixim loj pan c'am yich ok lo eb.

⁹C'am wal junok bijan no' che chi' yin yaxil, tamwal tol chi txiclay yul xij. Masanil no no' tu' tol ok bol-lay no', a is jolom no', c'al yakan no', c'al no yulc'ulej, bolbilc'al chi yunej, cax che chioni.

¹⁰C'amxa che yak'can jabokxa no' yet junxa c'u yecal. Ta wal ayto no' c'am chi lajwi e yuj xin, ak'ek can tz'aok.

¹¹A yet ok ex low tu', c'alanokab e nan, ayokabxac'al oc e xanab, cax lacbilokabxac'al oc e k'okoch e yuj, cax yinxac'al aymanil ok yun e chion no'. A yet tu' che chaon k'inal, yujtol chin ec' tilak e na, yet chin e yiaj can ayin Jehová in ti'.

¹²Ayin Jehová in chi wala' tol a wal yet jun ak'bal tu' cax ok in ec' yul yet Egipto masanil, yin in mak'on cam masanil babel unin bay junjun nail, c'al no babel yune' no no'; cax ok wak' ayc'ay masanil is diosal eb aj Egipto ti'.

¹³A is chiq'uil no no' tu' che bon oc yin is puertail ti' e na bay cajan ex ec' tu'. A' ok tx'oxonok, tol a yet ok in ec' in mak'on cam masanil eb babel unin yet eb Egipto, c'am junok ex ayex ti' ok ex camok. A yet ok wilon oc chic' tu', bec'al weq'uelok.

¹⁴A ton wal jun c'ual tu' miman chi yuncan yul e sat cax che chaon junok miman k'in yet chin e yion can ayin Jehová in, masanil tiempo che natek, c'al eb e yuninal ok natek eb jun ti'. Ley chi yuncan jun ti' e xol yin tojbalk'inal.

¹⁵A ixim pan che lo' yin ukeb c'u, c'amokab yich aytok xol. Yuj tu' xin, a yet babel c'ual che yieltek masanil yanil yich pan bay e yatut junjun ex. Ta ay junok mac chi loon ixim pan tol ay yich yet juntzan c'ual tu', cax chi c'aylay el xol e conob.

¹⁶A yet babel c'ual che wajbaj oc e ba cax chex oc yin ayilal ayin. Axca tu' che yun c'apax yet is suk c'ual, ac'ala' che wajban c'apax oc e ba. A yin cab c'ual tu' c'am mac chi mulnaji, asan yin e watx'nen low e ba chi je'.

¹⁷Yowalil che yikej jun k'in yet ixim pan tol c'am yich, yujtol a yet jun c'ual tu', ok ex wieltok yin txolilal e masanil bay yul yet Egipto ti'. Junjunc'al abil che chaon jun k'in tu'. Ley chi yuncanok, yet ok beyc'altok yiken eb e yinatil.

¹⁸Chi el yich e loon ixim pan c'am yich tu', yet 14 waay babel xajaw yet k'ekbintakil masantac'al yet 21 waay jun xajaw tu' yet yayc'ualil.

¹⁹A yin ukeb c'ual tu' c'am junok mac ayic' yich pan bay is yatut. Ta ay junok mac chi loon ixim pan tol ay yich yet juntzan c'ual tu', chi c'aylay el xol e conobal, caxc'al junok tx'ok conobal cajan ec' e xol, ma junok israel ex, chi c'ayilok.

²⁰Xan c'am che lo' tzet yetal ay yich bay cajan ex ec'ok, asanc'al ixim pan c'am yich che lo', ẍi Jehová, cachi, ẍi Cham.

²¹Max yawtej cham Moisés eb nak yajawil conob xol eb yet israelal, max yalon cham: Asek, che yieltek junjunok no' colantak calnel, ma no chiwo yet che chi' yetok eb cajan e yetok yul e yatut. Che mak' cam no' cax che chaon k'in Pascua.

²²Cax che chaon is chiq'uil no' yul junok palangana. Che yiontek junok yuchan k'ablak te hisopo, che laon aytok xol chiq'uil no no' tu', cax che bonon oc yin is marcoal e puerta yiban, c'al tz'eyil-lak. C'am junok ex chex eltek yul e puerta yet ak'balil.

²³A yet ok ec' Jehová yet ak'balil tu', yet ok mak'on cam eb anima bay Egipto, cax ok yilon oc Cham chic' yin ti' puertail e na tu' yet watx' bec'al yeq'uel Cham, cax man ok chaoctok Cham jun ángel ok mak'on cam eb babel unin yul e yatut.

²⁴A jun k'anej ti' tol ok e yikejc'al, cax ok yikenc'al eb e yinatil, axca ley c'am is lajubal chi yuncanok.

²⁵Caxc'al yet ayexxa ec' sat tx'otx' tx'otx' max yak' Jehová is ti' yak'on ayex, yowalil tol ok e chac'al jun k'in ti'.

²⁶A yet ok k'anlen eb e yuninal ayex: ¿Tzet yelapnok jun k'in ti'? ta ẍi eb.

²⁷Axa ayex ti' ok e yal bay eb axca ti': Yuj jun k'in ti' xan chi co natek c'ual Pascua yet max cam no calnel yin xajanbalil bay Jehová, tol a yet jun c'ual tu' max mak'cam Jehová eb anima bay Egipto; axa tilak co na xin, toc'al max ec' Cham. Cay wal tu' max yut coloncan el Cham juninal yet jun tiempoal tu', quex chi bay eb, ẍi cham Moisés. A yet max lajwi yalon cham juntzan ti', cax max ay nojlabok eb israel yin ayilal satak Jehová.

²⁸A wal yet jun bek tu' max toj eb yiken axca wal yalon Jehová bay cham Moisés tu' c'al bay cham Aarón.

²⁹A yet chuman ak'bal, max ec' Jehová mak'on cam eb babel unin bay Egipto. Max cam is babel c'ajol cham rey, nak tol t'inan ok occan is q'uexelok bay is despacho, c'al is babel c'ajol eb nak ayic' bay yul preso. Ac'ala' axca tu' max yut pax Cham is babel yune' no no'.

³⁰Masanil anima bay Egipto max aj wan yet jun ak'bal tu'. Chi ok' cham rey, yetokc'al eb ay yopiso yetok, chi ok' eb, c'al masanil anima bay yul yet Egipto, yujtol c'amxa junok na tol c'am camnak bay.

³¹A wal yet jun ak'bal tu' max yawtej cham rey tu' cham Moisés yetok cham Aarón, max yalon bay eb: —A tinani' asek, iektok masanil eb e yet conob, besek el e ba xol eb wet conob ti', cax chi toj e yaon ay e ba bay Jehová axca e yalon tu'.

³²Iektok masanil no e jobbejal no': no calnel, c'al no wacax, c'al no chiwo, axca max e yut e yalon tu'. Asek, cax chex tewi pax bay Jehová wuj, ẍi cham rey tu'.

³³Ajun eb aj Egipto tu' max chekon el eb israel, yet chi el eb yin aymanil yul is conobal, yujtol max na eb talaj chi cam eb masanil.

³⁴A ixim pan mayal alay oc yal, yinxa xilanil yayji aytok yul is cajonal, c'amto chi somlaytok yichpanil; toxac'al max pich oc eb yul sábana yetok is cajonal, max yikontok eb.

³⁵Cax max yiken eb tzet max yal cham Moisés. Max k'anon eb israel tu' oro, plata, c'al pichilej bay eb aj Egipto.

³⁶A Jehová max k'anjab yin is nabal eb aj Egipto tu', cax watx'xac'al max yut eb is c'ul. Max yak'on eb tzetak yetal bay eb israel. Axca wal tu' max yun yion el eb israel is tzetak yetal eb.

³⁷Max el eb israel bay Ramsés cax max apni oc eb bay Sucot. Ay mi 600 mil eb nak tol tiempo wal yoc yin soldadoal, c'am chi oc eb ix ix c'al eb coc'altak unin is bisilok.

³⁸Caw wal xiwil is calnel eb max yitok, c'al no chiwo c'al no wacax, cax xiwil anima tx'ok conobal max toj yetok eb.

³⁹C'amxa tiempo yet max watx'nej eb is lobej, yujtol yinxac'al aymanil max uktelay el eb yuj eb aj Egipto, xan toxac'al max watx'nej eb pan yetok ixim ibil oc yuj eb tol c'amto yich.

⁴⁰Yin 430 abil max ayji ec' eb israel bay Egipto.

⁴¹A wal yet jun c'ual max tz'aknaj 430 abil tu', cax max el is conob Jehová bay tu'.

⁴²A wal yet jun ak'bal tu', max mulnaj Jehová yet chi yion eltek is conob, xan a yet jun ak'bal tu' yin junjun abil chi el is wayan masanil eb israel yet chi yion can eb Jehová yin tojbalk'inal.

⁴³Max yalon Jehová bay cham Moisés c'al bay cham Aarón: A ton is leyal k'in Pascua chi walcan ayex ti': C'am junok eb tx'ok conobal chi je' chion no xajanbal.

⁴⁴A eb e chekbej tol manbil e yuj, chi je' chion eb no', asan tatol ak'bilxa circuncidar eb nak.

⁴⁵A pax junok eb conoblak anima ayic' e xol xin, ec'jabwom ma mulnajil chi yun e xol, c'am chi je' chion eb no'.

⁴⁶Asan yul na bay chi watx'nelay ti' chi je' chilay no', c'am chi je' chi ilaytok no' bay junokxa na, c'am c'apax chi je' mak'lay poj is bakil no'.

⁴⁷A jun ley ti' masanil eb israel ok ikenok.

⁴⁸Ta c'uxan ay junok tx'ok conobal chi yochej chi cha' k'in Pascua e xol yet chin yion can, babel chi ak'lay circuncidar eb nak winak bay jun nail anima tu'; catatu' chi je' chion eb no Pascua tu' axca tol e yet conobxa yayji. A pax junok nak tol manto ak'bilok circuncidar xin, c'am chi je' chion no xajanbal tu'.

⁴⁹A jun ley ti', yowalil chi yikej eb anima chi alji e xol ti', c'al eb anima tx'ok conobal cajan ec' e xol, ẍi Jehová.

⁵⁰Masanil tzet max chek Jehová yal cham Moisés c'al cham Aarón, max yikej eb anima tu'.

⁵¹A wal yet jun c'ual tu', max yieltek Jehová eb israel bay nación Egipto yin txolilal.