Read Q'anjob'al Ex 17 Bible Online

Ex 17 - Q'anjob'al bible

Ex 17

¹Cax max el masanil eb israel bay takin tx'otx' yet Sin, cax c'ojanc'ulal max yun bey eb, atac'ala' chi yun tx'oxon Jehová. Max lajwi tu xin, cax max apni oc eb bay Refidim, palta c'am a' aej chi je' yuq'uen eb bay tu'.

²Yuj tu' max tit pax yowal eb yin cham Moisés: —A tinani' ak' ja' juq'uej, ẍi eb. —¿Tzet yuj xan chex awji oc win? ¿tzet yuj xan che yak' porobal Jehová? ẍi cham.

³Palta eb conob caw wal chi cam eb yuj takintial, xan max aj yaw eb bay cham Moisés, max yalon eb: —¿Tzet yuj xan max on eiltek bay Egipto? ¿Tom asan yuj co cam yuj takintial yetok eb juninal, c'al yetok co jobbejal no'? ẍi eb.

⁴Caw wal max tac is c'ul cham Moisés, cax max oc pax tean cham yin Jehová: —¿Tzet wal chi wut eb anima ti'? Ijan wal chin is k'okch'ennej eb, ẍi cham.

⁵Cax max tak'wi Jehová bay cham: —A tinani', babjantok satak eb anima, cax cheontok jaywanok eb yicham winakil conob ti' etok; cax cheon c'apaxtok te' a k'okoch, te' max ak'balnej a mak'on sat a' Nilo.

⁶Ayin ok in babjok a satak bay ch'en ch'en bay Horeb, axa yet chach apni oc xin, cax cha mak'on sat ch'en yetok a k'okoch, cax ok elol aej bay sat ch'en, axa yuq'uen a' eb anima tu', ẍi Jehová. Caytu' max yut cham Moisés satak eb yicham winakil conob Israel.

⁷Cax max yak'on yik jun lugar tu' Meriba, yujtol yob max yal eb yin cham Moisés. Cax max yak'on c'apax yik Masah, yujtol max yak' porobal eb Jehová, max yalon eb: Ma tol wal ayic' Jehová co xol, ma tol wal c'amak xin, ẍi eb.

⁸A yet ayic' eb israel bay Refidim, a yet tu' cax max apni oc eb amalecita yak'on owal yin eb.

⁹Yuj wal tu xin max yal cham Moisés bay Josué: —Siq'uil jaywanok eb co soldado yet chi toj eb ak'oj owal yin eb amalecita. Yet yecal yet puch k'inibalil chin toj bay chon tzalan, cax ibil oc te k'okochej wuj, te' chi k'anbalnej Dios, ẍi cham.

¹⁰Max yikej Josué tzet max yal cham Moisés, max toj yak'on owal yin eb amalecita. Axa cham Moisés yetok cham Aarón c'al yetok cham Hur, max toj eb bay chon tzalan tu'.

¹¹A yet chi yion aj cham Moisés is k'ab can, cax chi ayc'ay eb amalecita yuj eb israel. Axa yet chi yion ay cham is k'ab xin, cax ijan chi ayc'ay eb israel.

¹²Palta tutun caw wal chi c'unbi is k'ab cham Moisés yaj q'uetxan can, xan max say Aarón c'al Hur jun ch'en ch'en bay max ay chotan cham, axa eb max mitx'on aj k'ab cham, junjunc'al eb bay is tz'eyil, masantac'al yet max toj c'u.

¹³Axca wal tu' max yun yak'on lajwok Josué eb amalecita.

¹⁴Lajwi tu xin, max yalon Jehová bay cham Moisés: —Tz'ibelayokab juntzan ti' bay yul junok un yet ok nalaytek. Al c'apax bay Josué tol ayin ok in c'ayil masanil eb amalecita yin junelnej, c'amxa bay ok nalaytek eb, ẍi Cham.

¹⁵Max lajwi tu', cax max watx'nen aj cham Moisés jun altar, cax max yak'on yik: A ton Jehová in bandera.

¹⁶Max yalon axca ti': ¡Max yiaj Amalec is k'ab yin is trono Jehová, xan a Cham ok yak'c'al owal yetok Amalec yin tojbalk'inal! ẍi cham.