Read Q'anjob'al Ex 19 Bible Online

Ex 19 - Q'anjob'al bible

Ex 19

¹A wal tz'aknaj oxeb xajaw yel eb israel bay Egipto, max apni oc eb bay takin tx'otx' yet Sinaí.

²Petoj eb bay Refidim yet max apni oc eb bay tu'; max watx'nej eb is campamento bay satak jolom witz Sinaí.

³Cax max ajtok Moisés k'anjab yetok Jehová bay jolom witz tu', yujtol a Cham max awtentok Moisés bay tu', max yalon axca ti': —Al juntzan k'anej ti' bay eb is yinatil Jacob, a ton eb et israelal:

⁴Max cam e yilon tzet max wut eb anima bay Egipto, c'al tzet max ex wut wion eltek, yin ex wiontek bay ayin ec' ti', axcaxac'al tol yiban is xic' junok no miman tx'acbaj ayex ajtok, max ex jay cayti'.

⁵Yuj wal tu xin, ta yikemc'al che yut e ba ayin, cax che yikenc'al in trato, in conob ex tol sic'bil ex el wuj xol juntzanxa conoblak, yujtol wet masanil tx'otx' tx'otx'.

⁶Axa ayex ti', jun conobal sacerdote che yuncanok yin in e yak'on serbil, jun conobal anima tol wet yayji ocok, ẍi Jehová, cachi bay eb, ẍi Cham.

⁷Max lajwi tu xin, max paxaytek cham Moisés bay jolom witz Sinaí, cax max yawten cham eb yicham winakil conob Israel. Max c'oli yalon cham tzet max yun yalon Jehová bay.

⁸Masanil eb israel max tak'wi eb axca ti': —A masanil tzet chi chek Jehová junej ok junej, ẍi eb. Lajwi tu xin, cax max bet yalon pax cham Moisés tzet max yal eb conob bay Jehová.

⁹Max yalon Jehová bay Moisés: —A tinani', ok in tx'ox in ba ayach xol jun miman k'ek asun, cax ok in k'anjab ayach, yet watx' ok yab eb anima tol ok in k'anjab etok. Axca tu' ok yun yaon oc eb is c'ul en yet ok beyc'altok ti', ẍi Jehová. Max yalon cham Moisés tzet max yut yalon eb conob tu'.

¹⁰Max yalon pax Jehová: —Asi', al yab eb anima tu' tol chi watx'nej ba eb tinani', c'al yetok yecal, yet ok oc eb ayilal in satak, chi tx'aj eb is pichil.

¹¹Axa yet cabej tu' ok in ayolok, cax ok in tx'oxon in ba bay masanil conob bay jolom witz Sinaí.

¹²Chaay yechel bay yichlak witz tu', cax chalon bay eb tol mimanokab yelapnok jun witz tu' yul sat eb, cax c'am chi na eb yajtek bay jolom witz ti', c'am wal chi jitzxac'altek ba eb, yujtol ta ay junok chi jitzxac'altek ba, tojolc'al cami.

¹³Tojolc'al k'oklay camok ma jul-lay camok. C'am mac chi matxan k'ab eb yin, c'amc'al yelapnok tac'al junok anima ma junok no no', tojolc'al cami. Ato yet ok xulay yuc'a' calnel, cata wal tu' chi je' jitzontek ba eb anima bay cawilal witz ti', ẍi Jehová.

¹⁴Max lajwi tu xin, cax max paxaytek cham Moisés bay jolom witz tu', max ul yalon bay eb israel tu', tol chi watx'nej ba eb yet ok oc eb yin ayilal, c'al tx'ajon el eb is pichil.

¹⁵Max yalon cham Moisés bay eb: —A tinani' watx'nejek c'al e ba yet ok ex oc yin ayilal yet cabej. Che yiklej e ba, c'am chex way yetok e yetbi yet cab c'ual ti', ẍi Cham bay eb.

¹⁶Axa yet max sakbi el yet cabjial xin, ay rayo c'al mak'waj c'u, cax ay jun miman k'ek asun bay jolom witz tu'. Lajwi tu xin, cax max yaben eb anima yok' jun ch'en trompeta bay jolom witz yin ipejal. Masanil eb anima ayic' bay yul campamento tu' max xiwaj eb.

¹⁷Max lajwi tu xin, cax max yiontok cham Moisés masanil eb anima bay yintak eltok campamento tu', max toj eb chaon Dios; max cancan oyan eb bay cawilal yich witz.

¹⁸Caw wal chi aj is mubal witz Sinaí, yujtol max ayol Jehová bay xol xak k'ak'ej. Axca wal yaj is mubal junok horno, caywal tu' yaj is mubal, caw wal max bilaj jun witz tu'.

¹⁹Axa ch'en trompeta xin, junjuntak el chi xulay ch'en, chi tec'al aj can nuk', a ton yet tu' max k'anjab Moisés yetok Dios, caw wal ip chi yut tak'wok ba Cham bay.

²⁰A bay yelxac'al can ayaj jolom witz tu', a tu' max ayol Jehová. Max yalon Cham bay Moisés tol chi ajtok cham bay ayic' Jehová, xan max ajtok cham.

²¹Max yalon Jehová bay cham: —A tinani' ayantok bay yich witz tu', cax chi toj alon bay eb anima tol c'am chi ec'tek eb quin yiloni, axa talaj chi yunej, xiwil eb chi cami.

²²Ac'ala' eb sacerdote tol chi occ'alta' in cawilal, yowalil chi sakbanej ba eb; ta c'amak, axa talaj chi yunej, chi wak' lajwok el eb, ẍi Jehová.

²³Max tak'wi Moisés bay Jehová: —A eb conob tu', c'am chi je' yajtek eb yin witz Sinaí ti', yujtol ach max ala' tol chi ay yechel bay chi je' yapni oc eb, yuj tx'oxoni tol ya yili, ẍi cham.

²⁴Max yalon pax Jehová bay Moisés axca ti': —Ayanpaxtok junelxa, axa yet chach ajolok, ibilokabxa oc Aarón oj yet ok ach ajolok. Axa eb sacerdote, c'al yetok masanil eb conob, c'am chi k'axpoj ec'tek eb bay aycan ay yechel oj tu', yuj jayoc eb bay ayin ec' ti', axa talaj chi yunej, chi wak' c'ayil eb, ẍi Jehová.

²⁵Max aytek cham Moisés xin, max ul yalon cham bay eb conob Israel tzet max yal Jehová.