Read Q'anjob'al Ex 2 Bible Online

Ex 2 - Q'anjob'al bible

Ex 2

¹A yet jun tiempoal tu', ay jun nak winak titnak yin yinatil Leví max ion jun ix ix ac'ala' titnak c'apax yin yinatil Leví tu'.

²Max jay jun is winak unin ix, axa yet max yiloni tol caw wal watx' ch'an yili, max c'ubaj el ix jun unin tu' yin oxeb xajaw.

³Axa yet c'amxa chi je' c'uban el ix jun yaliẍ unin tu xin, max yiontek ix jun xuc, max yaon oc ix juntzan k'ol axca asfalto yin bay chi nublej ba, yet watx' c'am chi octok a' aej yul. Lajwi tu' max yaon aytok ix nak yaliẍ unin tu' yul, cax max bet yaoncan ix xol juntzan te te' axq'uijan aj bay is ti a' miman aej Nilo.

⁴Najattac'al max can jun is yanab nak unin tu' yin tayneni.

⁵Axa max yun xin, max apni xal cutz'in cham rey achin bay ti a' tu'. Yak'ban chi ec'jab eb ix is chekbej xal bay is tilak a' tu', max yilontok xal xol juntzan te' axca aj tu', tol ay jun xuc bay tu', cax max chekontok xal jun ix is chekbej yet chi toj yi' ix jun xuc tu'.

⁶Axa yet max jakon aj xal jun xuc tu', max yiloni tol nene' unin ch'an jun ayaytok yul, cax lanan yok'i, cax max cus c'ul xal yin, max yaloni: —Yet eb ix hebrea jun unin ti', ẍi xal.

⁷Max jayoc is yanab nak unin tu' bay xal, cax max k'anlen bay: —¿Chi mi yal a c'ul chi toj wawtej junok ix hebrea yet watx' chi yak' txutxwok ix jun yaliẍ unin ti' ayach? ẍi ix.

⁸—Asi', awtej junok ix xin, ẍi xal bay ix unin tu'. Yuj tu' xan max toj ix yawtej is txutx. A yet max jay xal txutxej tu xin, max yalon xal is cutz'in cham rey tu' bay axca ti':

⁹—Itok jun yaliẍ unin ti' cax chelon ch'ibok, cax ok wak'on a tojol, ẍi xal. Axa yiontok xal txutxej tu' nak yaliẍ unin, max yilon ch'ibok.

¹⁰Axa yet watx'xa nak xin, cax max bet yak'oncan xal nak bay xal cutz'in cham rey tu', cax axca wal yune' xal max yutej. Moisés*fn* max yak' xal yika', max yalon xal: A bay yul a' max wiajtek, ẍi.

¹¹A yet ayxa k'inal Moisés xin, max naoni tol chi toj yil eb yet conob, cax max yiloni tol caw wal yatak mulnajil bay ayoc eb. C'uxanc'al lanan mak'lay jun nak is yet conob tu' yuj jun nak aj Egipto.

¹²Max c'oli yec' t'ananok Moisés tu' ta c'am mac t'anantek. Yujtol c'am mac chi iloni, xan max mak'cam nak aj Egipto tu', cax mukoncan aytok bay xol arena.

¹³Axa yet junxa c'ual max toj pax yilon eb yet conob tu' junelxa; axa max yunej, lanan wal yak'on cawan eb nak yet conob tu' owal. Cax max k'anlen bay nak max mak'waj tu': —¿Tzet yuj xan cha mak' nak et conob ti'? ẍi Moisés.

¹⁴Cax max tak'wi nak tu': —¿Mac max ach aon oc yin yajawilal c'al juezal co xol on? ¿Ma tol chi yochej a c'ul chin a mak' cam axca max ot nak aj Egipto ewi? ẍi nak. A yet max yaben Moisés tzet max yal nak tu', max xiwajok, yujtol max nachaj el yuj tol max abchaj aj yuj max mak' cam nak aj Egipto.

¹⁵Axa yet max apni oc is k'umal jun tu' bay cham rey, max toj is sayomal yet chi mak'lay cam Moisés tu' yalon cham rey. Yuj tu' xan max toj elajok, cax max tojcan bay yul yet tx'otx' Madián. A yet max apni oc bay is ti' jun a' uc'bala', max ay chotan bay tu'.

¹⁶Ay jun cham sacerdote chi yik Reuel cajan bay jun lugar tu', ay ukwan is cutz'in. Max bet eb ix tu' bay a' uc'bala' tu', yuj yak'on noj eb ix te jucub yet chi yuc'a' no calnel is mam eb.

¹⁷Max jayoc juntzan eb nak ilom calnel, max yukten el eb nak eb ix bay tu', max aj lemnaj Moisés toj colwaj yetok eb ix yin yak'on yuc'a' no calnel tu'.

¹⁸Axa yet max apni eb ix bay is mam tu', max k'anlen cham bay eb: —¿Tzet yuj xan max ex pet meltzoj tinani'? ẍi cham.

¹⁹Cax max tak'wi eb ix: —Ay jun nak aj Egipto max on colon bay eb nak ilom calnel, toltax max yiajtek nak aej yuc' no calnel ti', ẍi eb ix.

²⁰Max k'anlen cham mamej tu' bay eb ix: —¿Baytal max can nak e yuj? ¿Tzet yuj xan maj e yitek nak cayti'? Lim, asek, awtejektek nak lowok, ẍi cham mamej tu'.

²¹Axca tu' max yun yapnican oc Moisés bay yatut cham Reuel tu'. Axa yet max ec'tok janic' tiempoal xin, cax max yak'on cham Reuel jun is cutz'in yetbiok Moisés tu', a ton ix Séfora.

²²Max lajwi tu xin, cax max jay jun is yune' ix. Max yak'on Moisés tu' yik Gersón,*fn* yujtol max na': Tx'ok conobal wayji bay jun tx'otx' ti', ẍi.

²³Payxatax tu', max cam cham reyal Egipto. Axa pax eb israel xin, max yabc'al eb yail yin mosejal bay Egipto tu'. Catatu bian, max yaben Dios is cusc'ulal c'al is yailal eb.

²⁴Max yaben Cham is yok'ilal eb, max naontek is trato yetok cham Abraham c'al yetok cham Isaac, c'al yetok cham Jacob,

²⁵cax max oc t'anan Dios, max ok' is c'ul yin eb.