Read Q'anjob'al Ex 26 Bible Online

Ex 26 - Q'anjob'al bible

Ex 26

¹Chemlayokab lajoneb jenan k'ap chi oc yin in cajlobal. A lino caw wal watx' tol tx'umbil chi oc yin, yetok yax tx'al, c'al tx'al púrpura, c'al yetok cak tx'al; cax chi tz'islay oc yechel querubín yin an, yuj junok mactxel jelan tz'isoni.

²Masanil juntzan tu', lajanc'al chi yunej: nan yoxlajoneb metro chi yun is tel, cab metro chi yun is sat.

³Cax chi tz'islay yin oyeb jenan, cax junxanej chi yunej, ac'ala' chi yun c'apax oyebxa tu'.

⁴Cax chi oc xoyjab yax tx'al is mitx'banilok yin jun pac'ok is ti' jun jenan an babel; ac'ala' caytu' chi yun c'apax junxa jenan an yet tzunanil tu'.

⁵A ton yin an babel jenan, yetok c'apax an yet is cab, yowalil chi watx'ji oc xoyjab junok 50 juntzan yax tx'al tu', chi yal elapnok tol junejc'al chi yun chalen ba.

⁶Cax chi watx'ji c'apax 50 gancho naba oro, yet chi je' mitx'len ba an cab jenanil, caytu' chi yun watx'ji el junok jenan yiban in cajlobal.

⁷Chemlayokab c'apax 11 jenan is xil no chiwo yet chi oc yiban in cajlobal tu'.

⁸Masanil juntzan tu', lajanc'al chi yunej, nan is canlajoneb metro chi yun is tel; axa sat xin, cab metro chi yunej.

⁹Chi lajwi tu', cax chi tz'islay ay oyeb, cax yin junnej jenan chi yunej, wakeb chi yun pax junxa jenan. A nanok jun yet is wak jenan tu', a tu' chi aytek pakan bay satak mantiado tu'.

¹⁰Chi watx'ji c'apax oc xoyjab junok 50 mitx'banil yin jun pac'ok is tilak jun babel jenan tu', cax chi oc c'apax junokxa 50 mitx'banil yin jun pac'ok ti' yet is cab jenan.

¹¹Chi watx'ji c'apax 50 gancho naba bronce, yet chi je mitx'len ba cab jenanil, cax junxanej jenan chi yuncan elok.

¹²Yujtol 11 jenan yayji xil no chiwo tu', xan ayto nan jenan chi aycan pakan yintak, axca yayji bay is satak.

¹³A jun tu', ec'ban jun metro is tel yintak an yalan, nan metro ec'ban bay junjun tilak, a ton chi makchen el is tilak an aycan yalan.

¹⁴Chi watx'ji c'apax ay tz'umal no calnel bonbil yetok cak, yet chi oc yiban jun jenan xil chiwo tu'; yetok junokxa makan tz'um caw wal lababixac'al yet chi oc yiban jun tu'.

¹⁵Watx'jokokab c'apax juntzanok te chemte' tol acacia chi oc yin in cajlobal, waan chi yun yoqui.

¹⁶Nan is so' metro chi yun is tel junjun te chemte' tu'; axa sat xin, 65 centímetro chi yunej.

¹⁷Chi cancan cabcabok yuc'a' junjun te chemte' tu' bay ok ay waanok, lajanc'al chi yuncan xol.*fn* Caytu' chi yun masanil te chemte' chi oc yin in cajlobal tu'.

¹⁸A yet ok watx'nelay te' tu', 20 te' ok oc bay yetc'ulal sur.

¹⁹40 ch'en plata chi watx'ji ay batxlubok te' 20 tu', cabcab chi yun cancan yalan junjun te', junjunc'al bay junjun is yuc'a' te'.

²⁰Axca tu' chi yun c'apax bay jun pac'xa, chi yal elapnok a ton bay yetc'ulal norte; 20 c'apax te chemte' tu' chi watx'ji elok.

²¹Ac'ala' 40 ch'en plata chi oc batxlubok, cabcab ch'en chi aycan yichok junjun te'.

²²Axa bay jun pac'xa bay yetc'ulal yayub c'u, wakeb te chemte' tu' chi watx'ji.

²³Chi watx'ji c'apax el cabokxa te' ok oc bay txiquinlak bay jun pac' tu'.

²⁴A juntzan chemte' tu', nububi chi yun bay yich masantac'al chi ajapnok bay chi junanej ba yuj junok argolla, caytu' ok yun c'apax bay junxa txiquin.

²⁵A yuj cabxa te tu' xan waxakeb te chemte' tu' yin masanil, yetok 16 is batxlub, chi yal elapnok tol cabcab is batxlub junjun te'.

²⁶Watx'jokokab oyeb te regla tol naba acacia, ok oc yin te chemte' bay jun pac'ok in cajlobal.

²⁷Oyeb c'apax te' ok oc yin te chemte' bay junxa pac', oyeb c'apax te' ok oc bay jun pac'xa yintak, a ton bay yetc'ulal yayub c'u.

²⁸A te regla chi oqui, a bay is nan te chemte' tu' chi oqui, junnejc'al yayji te', masantac'al bay junjun txiquin.

²⁹Chi lajwi tu', cax chi oc oro yinlak te chemte' tu', cax chi oc c'apax argolla naba oro bay chi eq'uel te regla tu'. Chi oc c'apax oro yin te regla tu'.

³⁰Chi watx'ji aj in cajlobal, axca yayji yechel chin tx'ox ayach bay jolom witz ti'.

³¹Watx'jokokab c'apax junok an cortina yetok yax tx'al, an tx'al púrpura, cak tx'al, c'al yetok an lino tx'umbil, tz'isbil oc yechel querubín yin an tu' yuj junok jelan tz'isoni.

³²Chi lajwi tu', cax chi aj locan yetok gancho naba oro yin caneb te oy tol acacia. A te oy tu', yowalil chi oc c'apax oro yin te'; chi oc c'apax caneb batxlubal naba plata.

³³Chi lajwi tu', cax chi aj locan an cortina tu' yalan yetc'ulal bay ayoc ch'en gancho oro ayoc yin tu' yiban, axa bay yintak octok an cortina tu', a tu' chaoctok te caẍail trato. Axca tu xin, a an cortina tu' chi oc makilok jun lugar chi yik Wet yayji, yetok junxa lugar chi yik Asannej in ay wet.

³⁴Chi lajwi tu', cax chaon oc is makil te caẍail trato bay chi ak'lay tan yobtakil, a tu' ay bay lugar asannej in ay wet.

³⁵A satak eltek an cortina tu', a tu' cha watx'nej ay te meẍa, bay yetc'ulal norte bay in cajlobal tu'; axa pax bay yetc'ulal sur, a tu' cha watx'nej ay jun batxlub candil bay satak te meẍa.

³⁶Axa bay ti' in cajlobal tu xin, a tu' chi watx'ji oc junok an cortina yetok yax tx'al, an tx'al púrpura, cak tx'al, yetok an lino tx'umbil; tz'isbil c'apax oc is yelbub yuj junok jelan tz'isoni.

³⁷Chi watx'ji c'apax oyeb te oy naba acacia, cax chi oc oro yin. A yin te' ok aj locan an cortina tu', cax chi oc c'apax gancho oro yin. Chi watx'ji c'apax ay oyeb batxlub bay ok ay te oy tu', naba bronce chi oc yin.