Read Q'anjob'al Ex 31 Bible Online

Ex 31 - Q'anjob'al bible

Ex 31

¹Max k'anjab pax Jehová bay cham Moisés, max yalon bay axca ti':

²Ilabi, a bay is tribual Judá, max in sic'can el Bezaleel, c'ajol Uri, is yitxiquin Hur.

³Mayal wak' Wespíritu yin is nabal, yet watx' ay is jelanil yin ojtakbilal, c'al yajnabalil, yet ok je' watx'nen aj tzanc'al tzetak yetal,

⁴c'al naon aj watx'nen yechel jantak mulnajil ok ujok, axca yin oro, yin plata c'al yin bronce,

⁵c'al yin watx'nen aj ch'en ch'en watx' yili, c'al watx'nen te te' yin tzanc'al tzet mulnajilal.

⁶Axa Aholiab, c'ajol Ahisamac max waoc is colwajwomok, a tu' titnak yin tribual Dan. A bay masanil eb aj nabal max wak'can jelanil eb, caywal tu' ok yun watx'nen eb masanil tzet yetal max wal ayach:

⁷A ton an mantiado bay chin chalej in ba e yetok, te caẍail in trato, c'al is makil te caẍa tu' bay chi ak'lay tan yobtakil, yetokc'al masanil is mitx'k'abil bay yul mantiado tu',

⁸yetok te meẍa, c'al jantak is mitx'k'abil, yetokc'al jun batxlub candil naba oro, c'al is mitx'k'abil; yetok c'apax altar yet incienso,

⁹c'al altar bay chi tz'a xajanbal, c'al is mitx'k'abil, yetok c'apax jun miman palangana, yetokc'al is batxlub yich,

¹⁰c'al an pichilej tol chembil, chi yal elapnok a ton is pichil cham sacerdote Aarón, tol miman yelapnok; yetokc'al yet eb is c'ajol, a ton chi k'an eb yin yopiso,

¹¹yetok aceite chi k'anlay yet chi occan junok wetok, c'al incienso manxa watx'ilok chi k'anlay bay in cajlobal. A juntzan tu', yowalil chi watx'nej eb axca wal max yun walon ayach, ẍi Jehová bay cham Moisés.

¹²Max yalon Jehová bay cham Moisés:

¹³Al bay eb et conob tol yowalil chi yikej eb jun c'ual xewilal, yujtol wet yayji ocok; yujtol a jun c'ual tu' yechel co trato yayjican oc co nan co xol e yetok yin tojbalk'inal, yet watx' che yojtaknej elok, tol ayin Jehová in ti' max ex in sic'can elok.

¹⁴A jun c'ual xewilal tu', mimanokab yelapnok yul e sat. A mac c'am chi yikej xew yet jun c'ual tu', yowalil chi cami.

¹⁵Asan yin wakeb c'ual chi oc mulnajil; axa yet is suk c'ual xin, c'ual xewilal, wetc'al yayji. Tzanc'al mactxel chi mulnaj yet jun c'ual xewilal tu', tojolc'al cami.

¹⁶Yuj tu xin, yowalil tol che yikej jun c'ual xewilal tu'. A jun ti', yechel co trato chi yuncan yin tojbalk'inal co nan co xol e yetok, ẍi Jehová. Yujtol a Jehová max watx'nen satcan, c'al sat tx'otx' ti' yin wakeb c'ual; axa yet is suk c'ual xin, majxa mulnajok, palta tol max xewi.

¹⁸A yet max lajwi k'anjab Jehová yetok cham Moisés bay jolom witz Sinaí, max yak'on cab jenan ch'en bay cham Moisés, bay tz'ibbil oc is trato, tol a wal caw Dios max tz'ibeni.