Read Q'anjob'al Ex 36 Bible Online

Ex 36 - Q'anjob'al bible

Ex 36

¹Yuj wal tu xin, a cham Bezaleel, yetok Aholiab, yetokc'al juntzanxa eb nak winak tol ay is jelanil yuj Jehová yin watx'nen tzetak yetal tol watx' yili, yet chi oc yin watx'jubal is cajlobal Jehová, ok watx'nej eb axca yalon Cham, ẍi cham Moisés.

²Max yawtej cham Moisés cham Bezaleel yetokc'al Aholiab, yetokc'al masanil eb nak ay jelanil is nabal ak'bil yuj Jehová yin watx'nen tzanc'al tzet yetal, a ton eb chi el yin c'ul colwaj yin jun mulnajil tu'.

³A eb nak tu' max chaon bay cham Moisés masanil ofrenda max yitek eb conob Israel, yet chi el yich mulnajil yuj watx'ji is cajlobal Dios. Axa eb chi el yin c'ul yak'on is yofrenda, junjunc'al k'inibalil chi yitek eb is yofrenda tu'.

⁴Axa max yunej, a eb nak mulnajwom tu', max bekcan eb nak is mulnajil, cax max toj eb nak yalon bay cham Moisés:

⁵Mayal ec' yiban yiontek eb anima, majxa lajwok masanil tzet max yitek eb ti' yin mulnajil max yal Jehová tol chi watx'ji, ẍi eb nak.

⁶A yet max yaben cham Moisés axca tu', max yalon el xol anima bay campamento, tol c'amxa mactxel chi yitok ofrenda yuj is watx'jubal is cajlobal Dios, xan caytu' max yun yoc wanaj yiontok eb is yofrenda.

⁷Yujtol mayal tz'aknaj jantak ok oc yin, cax ayto tzet man ok lajwok.

⁸A eb aj nabal xol eb, a eb chi mulnaj yin watx'nen aj is cajlobal Dios, max watx'nej eb lajoneb jenan lino tx'umbil, yetok an yax tx'al, c'al an tx'al púrpura, c'al yetok cak tx'al. A yin juntzan tu' max tz'is oc eb yechel querubín.

⁹Junjunc'al jenan tu', ay nan yoxlajoneb metro is tel, yetok cab metro sat, lajanc'al max yun yechel masanil.

¹⁰Oyeb jenan an max tz'islay ayok, yin junxanej jenan max yunej. Ac'ala' caytu' max yun tz'islay ay oyebxa jenan.

¹¹Max lajwi tu', max tz'islay oc xoyjab yax tx'al yin is ti' an babel jenan tu' yuj mitx'banilok. Ac'ala' caytu' max yun yoc c'apax yin is ti' junxa jenan yet is cab tu'.

¹²Max oc xoyjab 50 yax tx'al yin jun pac' is ti', cax junjunc'al jenan an lajanc'al max yun chalen ba.

¹³Cax max watx'ji c'apax junok 50 ch'en gancho naba oro, yet chi je' junanen ay ba an cab jenan tu', yet watx' junxanej chi yuncanok.

¹⁴Max watx'ji usluq'ueb jenan xil chiwo, a ton jun tu' max oc makilok yiban is cajlobal Dios,

¹⁵nan is canlajoneb metro is tel, yetok cab metro is sat. Lajanc'al yechel masanil.

¹⁶Max tz'islay ay oyeb jenan yin junxanej jenan, axa wakebxa xin, max tz'islay c'apax ay yin junxanej jenan.

¹⁷Cax max occ'al xoyjab 50 mitx'banil yin jun pac' is ti' jun babel jenan. Max oc c'apax junokxa 50 yin is ti' junxa yet is cab jenan tu'.

¹⁸Cax max watx'ji c'apax junok 50 gancho naba bronce, yet chi junanej ay ba cab jenan tu'.

¹⁹Max watx'ji junxa is makil yiban cajlobal Dios yetok tz'umal calnel tol bonbil yetok cak, yetok c'apax junxa tz'um lababixac'al max oc makilok yiban yin lajubal.

²⁰Max watx'ji c'apax oc te chemte' acacia yin is cajlobal Dios tol waan max yun yoqui.

²¹Nan is so' metro is tel junjun te chemte' tu', 65 centímetro sat te';

²²cax max cancan cabcab is yuc'a' te' bay chi ay waanok, lajanc'al max yuncan xol. Lajanc'al max yun watx'ji masanil.

²³20 max oc bay jun pac' bay yetc'ulal sur,

²⁴cax 40 is batxlubal max watx'ji. A juntzan tu', naba plata max oc yin. Junjun chemte', cabcab is batxlubal, yujtol junjunc'al bay chi ay batxan junjun yuc'a' tu'.

²⁵Cay c'apax tu' max yun bay jun pac'xa, chi yal elapnok, a ton bay yetc'ulal norte, xan 20 te chemte' tu' max watx'ji,

²⁶yetokc'al 40 is batxlubal tol naba plata, yet watx' cabcab batxlubal chi oc yalan junjun chemte'.

²⁷A bay jun pac' yintak yetc'ulal bay yayub c'u, wakeb te chemte' max oc yin;

²⁸cabto te' max oc yinlak is txiquinlak bay yintak tu'.

²⁹A juntzan chemte' tu', nububi max yun bay yich, masantac'al chi ajapnok bay max junanej ba yuj junok ch'en argolla. Caytu' max yun c'apax bay junxa txiquin.

³⁰Waxakeb chemte' max oc yin masanil, yetok waklajoneb batxlubal naba plata, cax cabcabc'al chi oc yalan junjun chemte'.

³¹Max watx'ji c'apax oyeb te regla acacia max oc yin jun pac' is cajlobal Dios.

³²Oyeb c'apax regla max oc yin te chemte' bay jun pac'xa, cax max oc c'apax oyebxa bay jun pac'xa bay yetc'ulal yayub c'u.

³³Axa te regla chi oc nan yul, a bay is nan te chemte' tu' max oqui, junnejc'al te' chi oqui masantac'al bay junjun txiquin.

³⁴Cax max oc oro yin te chemte' tu', max watx'ji c'apax argolla oro yet chi ec'tok k'atan te regla tu' yul, ayxa c'apax oc oro yin te regla tu'.

³⁵Max watx'ji c'apax jun an cortina, yetok yax tx'al, tx'al púrpura, cak tx'al, c'al yetok an lino tx'umbil; max tz'islay oc yechel querubín yin yuj junok jelan tz'isoni.

³⁶Max oc c'apax gancho naba oro yin an cortina tu', cax max aj locan yin caneb oy, a ton te acacia ayoc oro yin, ay c'apax oc yiban caneb batxlubal naba plata.

³⁷A bay chon octok yul jun mantiado tu', a tu' max oc c'apax jun an cortina, yax tx'al, tx'al púrpura, cak tx'al, c'al lino tx'umbil max oc yin, cax max tz'islay c'apax oc is tz'ibil yuj junok jelan tz'isoni.

³⁸Max watx'ji c'apax oyeb te oy yetok oyeb gancho oro. Max watx'ji c'apax oyeb batxlubal tol bronce, cax max oc oro yinlak juntzan te oy tu'.