Read Q'anjob'al Ex 37 Bible Online

Ex 37 - Q'anjob'al bible

Ex 37

¹Max watx'nej Bezaleel te caẍail trato yetok te acacia, jun metro yetok 10 centímetro max yun is k'atil, axa is sat xin, 65 centímetro max yunej. Ac'ala' 65 centímetro max yun yaj c'apax is tel.

²Max oc oro yin c'al yul, cax max oc c'apax oro yin tilak bay yiban, bay tzalan ajok.

³Max watx'ji c'apax caneb argolla naba oro chi oc yin yakan canebal, cax cabcab yin junjun pac'.

⁴Max watx'nej c'apax juntzanok te batxbanil naba acacia, cax max oc oro yin.

⁵Max lajwi tu', max jul-lay ec'tok yul ch'en argolla ayxa oc yin te caẍail trato tu', yet watx' chi je' batxlayi.

⁶Max watx'ji c'apax jun makilej tol naba oro bay chi ak'lay tan yobtakil, jun metro yetok 10 centímetro is k'atil, yetok 65 centímetro is sat.

⁷Ay cab yechel querubín tol chac'bil yetok martillo ayoc bay yiban tilak is makil tu'.

⁸Junejc'al max yun jun makilej tu' yetok cab yechel querubín tu': Junjun querubín ay bay cab tilak jun makilej tu'.

⁹Ac-'omba chi yunej. A tu' chi toj t'anjab bay yiban jun makilej bay chi ak'lay tan yobtakil tu'. Axa is xic' xin, jenantok yiban makil caẍail trato tu', cax axca tol yenel yayji ocok.

¹⁰Max watx'nej c'apax Bezaleel jun meẍa. A te acacia max oc yin te'. 90 centímetro max yun is k'atil; axa sat xin, 45 centímetro max yunej; axa is tel xin, 65 centímetro max yun yaji.

¹¹Max oc naba oro yin, cax max oc c'apax oro yin tilak.

¹²Max watx'nej c'apax aj oyan yin tilak bay yiban, tol ukeb centímetro max aji. Max oc c'apax oro yin is tilak bay yiban.

¹³Max watx'ji c'apax caneb argolla naba oro, cax max oc yin caneb txiquin bay ayoc caneb yakan,

¹⁴junej chi can juntzan argolla tu' yetok jun oyan aj tilak tu'. A bay tu' chi oc is batxbanil yet chi je' batxlay jun meẍa tu'.

¹⁵A te batxbanil tu', a ton te acacia max oc yin, cax max oc c'apax oro yin.

¹⁶Max watx'nen c'apax mitx'k'abej oro chi k'anlay bay meẍa tu'; tixtak ch'en max k'anabax ti': ch'en plato, cucharón, ẍalu, c'al sec', a ton chi k'anlay yet chi seclay ay ofrenda yin aejal.

¹⁷Max watx'nej c'apax Bezaleel jun batxlub candil naba oro, chac'bil yetok martillo. A yich bay chi ay batxanok, is teal yetok is xumaquil, cax junnejc'al max yunej.

¹⁸Oxox is k'ab max eltek bay cab is tz'eyil.

¹⁹Junjunc'al juntzan is k'ab tu', ay oxeb is xumaquil axca yet almendro.

²⁰A jun is teal tu', ay c'apax caneb is xumaquil axca yet almendro.

²¹A bay yalan, bay ayiltek junjun mojan is k'ab tu', ay junjun xumaquil.

²²A is xumaquil tu', c'al is k'ab, junejc'al yayji yetok batxlubal tu'. A jun tu', naba oro chac'bil yetok martillo.

²³Max watx'ji c'apax ukeb candil naba oro, yetok ch'en ch'en chi ion el tanil an mecha, c'al is platoal.

²⁴A yet max watx'ji jun batxlub candil tu', yetokc'al is mitx'k'abil, 75 libra oro max oc yin.

²⁵Max watx'nej c'apax Bezaleel jun altar yet incienso, yetok te acacia. Lajanc'al max yun can paq'uil, 45 centímetro c'al elok; axa pax is tel 90 centímetro max yun yaji. Ay c'apax yuc'a' bay txiquinlak, junnejc'al max yun yetok jun altar tu'.

²⁶Lajwi tu', max oc oro yin bay yiban, c'al yin is can paq'uil, yetokc'al yin is yuc'a', cax max oc c'apax oro yin is tilak.

²⁷A bay yalan is tilak, a tu' max oc cabcab argolla oro yin cab is paq'uil, cax max ec'tok te' batxbanil bay yul ch'en argolla tu', yet chi je' batxlay jun altar tu'.

²⁸A te batxbanil chi oc tu', a ton te acacia max oc c'apax oro yin.

²⁹Max watx'ji c'apax aceite chi k'anabax yet chi sic'lay el junok mactxel, ma junok tzet yetal tol chi occan yetok Dios, c'al perfume caw wal watx', axca chi yun watx'nen eb watx'nem perfume.