Read Q'anjob'al Ex 39 Bible Online

Ex 39 - Q'anjob'al bible

Ex 39

¹A pichil eb chi k'an yin yopiso bay cajlobal Dios, chembil yetok yax tx'al, c'al tx'al púrpura, yetok cak tx'al. Max watx'ji c'apax pichil cham Aarón ya' yili, axca wal max yun yalon Jehová bay cham Moisés.

²A is watx'jubal chaleco, max oc oro tx'al yin, yetok yax tx'al, c'al an tx'al púrpura, an cak tx'al, c'al yetok lino tx'umbil.

³Max chac'lay patxay ch'en oro; coc'xac'al max yun c'upon coj eb, axcaxac'al tx'al max yunej yet chi je' chemontok eb xol juntzanxa tx'al, max chemlay yuj junok tol watx' chemwi.

⁴Cax max alay oc cab patxan an chi ec'tok jolom xic' jun chaleco tu', yet chi junanen ba an satak yetok an yintak.

⁵Axa jun cincho chi c'alon oc jun chaleco tu', ac'ala' caytu' watx'ji axca tu': Oro tx'al, yax tx'al, yetok tx'al púrpura, yetok cak tx'al, c'al yetok lino tx'umbil, axca wal max yun yalon Jehová bay cham Moisés.

⁶Axa ch'en cornalina, max oc ch'en yin mitx'banilok oro, ayoc is bi eb yuninal Israel yin ch'en, axca yayji oc letrail junok sello.

⁷Cax max yaon oc Bezaleel ch'en ch'en yin jolom xic' jun chaleco tu', yet chi nalaytek eb yuninal Israel, axca max yun yalon Jehová bay cham Moisés.

⁸Axa pax an txamc'ulej xin, watx'nebil yetok tz'ibil tz'isbil oc yuj junok jelan tz'isoni, axca yet an chaleco: ayoc oro tx'al yin, c'al yax tx'al, yetok tx'al púrpura, an cak tx'al, c'al yetok lino tx'umbil.

⁹Pakbil chi yunej, cax lajanc'al yechel is tilak yet pakbilxa. 22 centímetro junjun tilak tu'.

¹⁰A jun tu', can txol max yun yoc ch'en ch'en caw wal watx' yili tu' yin. A yin jun txol babel ay jun rubí, jun crisólito, yetok jun esmeralda.

¹¹Axa yin yet is ca txol ayoc jun granate, jun zafiro, c'al yetok jun jade.

¹²Axa yin yet is yox txol ayoc jun jacinto, jun ágata, yetok jun amatista.

¹³Axa yin yet is can txol xin, ayoc jun topacio, jun cornalina, yetok jun jaspe. Oro ayoc mitx'banilok oc juntzan ch'en tu'.

¹⁴Lajcaweb bey ch'en, a ton lajcaweb is bi eb yuninal Israel; junjunc'al is bi eb lajcawan tu' ayoc yin ch'en, axca yayji oc letrail junok sello.

¹⁵A yin an txamc'ulej tu' max watx'ji oc juntzan cadena naba oro, tol paltx'onebil.

¹⁶Max watx'ji c'apax cab mitx'banil oro, yetok cab argolla naba oro, cax max oc cab argolla tu' bay cab is txiquin an txamc'ulej tu' bay yiban.

¹⁷Max oc c'apax cab cadena oro yin cab argolla tu'.

¹⁸A is txam cab cadena tu' max oc yin cab mitx'banil oro, cax max oc yin cab jolom xic' an chaleco bay satak.

¹⁹Max watx'ji c'apax cabokxa argolla naba oro, cax max oc bay yul cab is txiquin an txamc'ulej tu' bay yalan, tol junej chi can yetok an chaleco.

²⁰Max watx'ji cabokxa argolla oro, cax max oc yin txamlak chi ec'tok jolom xic' an chaleco, cax chi ayapnok bay satak. Junej max can yetok bay chi ayapnok is tz'isil, c'al yiban ajtek bay chi ec' c'alilej yin an chaleco tu'.

²¹Max lajwi tu', cax max junanelay ay ch'en argolla ayoc yin an chaleco, yetok ch'en ayoc yin an txamc'ulej tu', yetok jun yax tx'al, yet watx' a an txamc'ulej tu', chi can bay yiban ajtok jun c'alilej ayoc yin chaleco tu', yet watx' c'am chi beklej ba an, axca wal max yun yalon Jehová bay cham Moisés.

²²Masanil jun jokan pichilej ayoc yul an chaleco tu' chembil, cax yax tx'alc'al ayoc yin.

²³A bay nan yul jakan bay yolanil yet is nuk', max oc pilbanil is ti' bay nuk' tu', yet watx' c'am chi nic'chaji.

²⁴Max oc adorno yin tilak an pichilej tu' axca yechel granada max watx'nelay yetok yax tx'al, tx'al púrpura, cak tx'al c'al yetok lino tx'umbil.

²⁵Max watx'nen c'apax eb coc' campana naba oro, max oc nanlak granada ayoc yin tilak an pichilej tu'.

²⁶A ton chi k'anlay yet chi oc yin yopiso axca wal max yun yalon Jehová bay cham Moisés.

²⁷A is jokan camiẍ cham Aarón, yetokc'al yet eb is c'ajol, naba lino chembil yuj junok chemom k'ap.

²⁸Ac'ala' max watx'ji an k'oxilej tx'umbil c'al yetok junxa an k'oxilej naba linoc'al elok; axa an calzoncillo xin, lino tx'umbil max oc yin.

²⁹Ac'ala' lino tx'umbil ayoc yin jun c'alilej, tz'isbil oc is yelbub yetok yax tx'al, tx'al púrpura, yetok cak tx'al yuj junok jelan tz'isoni, axca wal max yun yalon Jehová bay cham Moisés.

³⁰Max watx'nen c'apax eb junok placa naba oro, tx'oxbanil is yikbej yin sat sacerdoteal, cax max oc juntzan k'anej ti' yin axca sello: Yet Jehová yayji ocok, ẍi.

³¹Max lajwi tu', max oc jun yax tx'al yin, yet chi je' c'al-lay oc jun placa tu' bay satak yin an k'oxilej tol bac'bil ocok, axca wal max yun yalon Jehová bay cham Moisés.

³²Caytu' max yun lajwi watx'ji aj is cajlobal Dios bay chi co chalej co ba yetok. Axca wal max yun yalon Jehová bay cham Moisés, caywal tu' max yun watx'nen eb israel tu'.

³³Tix masanil is mitx'k'abil is cajlobal Dios max yitok eb bay cham Moisés ti': A ton is ganchoal, chemteal, reglail, yoyal c'al yetok is batxbanil.

³⁴Yetok an k'ap chi oc yiban, no' tz'umal calnel bonbil oc cak yin, yetok no tz'um caw wal lababi, yetokc'al jun an cortina chi makchen el te caẍa bay ayaytok mandamiento.

³⁵Max yi c'apaxtok eb te caẍa tu', yetokc'al regla chi oc is batxbanilok, c'al yetok is makil bay chi ak'lay tan mulej.

³⁶Te meẍa yetokc'al is mitx'k'abil, yetok ixim pan chi ak'lay satak Jehová,

³⁷jun batxlub candil naba oro, yetokc'al candil ayoc yiban, yetokc'al masanil is mitx'k'abil, yetok aceite yet chi oc k'ak'al candil tu'.

³⁸Jun altar naba oro, yetok c'apax aceite chi k'anlayi, yet chi sic'lay el junok mactxel ma junok tzet yetal chi occan yetok Dios, c'al incienso watx' yoc jabil, yetok jun an cortina bay chon octok yul mantiado,

³⁹jun altar bronce, yetokc'al is rejail tol bronce c'apaxok, yetokc'al regla chi oc is batxbanilok, yetokc'al is mitx'k'abil, c'al yetok jun palangana, yetokc'al batxlubal yich.

⁴⁰An cortina ayoc yinlak amak', c'al yoyal yetokc'al is batxlubal, an cortina bay chon octok bay yul amak', yetokc'al tx'anil, c'al yestacail bay yinlak amak' tu', yetokc'al masanil mitx'k'abej chi k'anabax bay is cajlobal Jehová bay chi co chalej co ba yetok,

⁴¹yetokc'al an pichilej chi k'an eb sacerdote yin yopiso, a ton is pichil caw wal ya' yili chi yaoc cham sacerdote Aarón, yetokc'al is pichil eb is c'ajol cham chi yaoc yin yopiso.

⁴²Max watx'nej eb israel masanil axca wal max yun yalon Jehová bay cham Moisés.

⁴³A yet max yilon cham tol axca tu' max yun watx'ji el yuj eb, catatu' max yalon watx' k'anej yiban eb.