Read Q'anjob'al Ex 6 Bible Online

Ex 6 - Q'anjob'al bible

Ex 6

¹Max tak'wi Jehová bay cham Moisés: —Okto wal ela' tzet ok wut cham reyal Egipto ti'. Yetok wipalil cax ok ex bekon elok. Ayin ok wak' pural, cax ok ex yukten el yul is nación ti', ẍi Jehová.

²Max k'anjab pax Jehová yetok Moisés: —Ayin ton Jehová in.

³Max in tx'ox in ba bay Abraham c'al bay Isaac c'al bay Jacob yetok in bi, Dios Chi Je' Yuj Masanil; asan xin maj wak' yojtaknej el eb in bi tol Jehová in.

⁴Max in watx'nej in trato yetok eb, max wak' in ti' wak'on tx'otx' Canaán bay eb, a ton tx'otx' bay max ec'lej cajan eb yettax yalantok.

⁵A tinani' xin, mayal wabej tol caw wal ok'bal c'ul chi utlay eb in conob bay Egipto ti', caw wal chi etax eb yin mulnajil. Yuj wal tu xin, max tit yul in c'ul tol ay in trato yetok e yichmam.

⁶A tinani' xin chi toj al bay eb et israelal tu', tol tix wal max yut yalon Jehová ti': Ayin Jehová in, ok ex in colilok bay ayex oc yin mosejal ti', bay ok'bal ex c'ul yin mulnajil bay Egipto ti'; tol ok in tx'ox wal wipalil, cax ok waon oc mimek uchlejbail yiban jun conob ti'. Axca wal tu' ok yun ex in colon el yul is k'ab eb,

⁷cax chex waon oc in conobok; axa ex ayex ti' e Diosal in. Axca tu' ok yun e yojtaknen elok, tol ayin Jehová in, e Diosal in, chex in colcan el yul k'ab eb nak aj Egipto ti' bay ayex oc yin yailal yuj mulnajil.

⁸Cax chex wiontok bay sat tx'otx' tx'otx' bay max wak' in ti' wak'on bay Abraham, bay Isaac c'al bay Jacob; cax ayin Jehová in ti' chi wak' c'apax ayex, tol e yet ok yunej, ẍi Jehová, cachi.

⁹A masanil tzet max yal Cham, a' max yal cham Moisés bay eb conob Israel, palta c'am chi cha yab eb, yujtol caw wal ayoc eb yin somc'ulal yuj yail mulnajil.

¹⁰Lajwi tu xin, max yal pax Jehová bay Moisés:

¹¹—Asi', al bay jun reyal Egipto tu' tol chi beklay el in conob yuj bay sat is tx'otx' ti', ẍi Jehová.

¹²Cax max tak'wi cham Moisés bay Jehová: —Toltax wal c'am chi cha yab eb conob israel tzet chi wala', akxamwal cham rey, tom ok cha yabej, ilab tol c'am pax wal chi je' in k'anjabi, ẍi Moisés.

¹³Xan max yatok Jehová cham Moisés c'al cham Aarón k'anjab bay eb israel c'al bay cham rey, tzetbil tol ay chekbanilej bay eb tol chi yieltek eb eb conob Israel bay Egipto.

¹⁴Tix yoc is bi eb yajaw yin junjun conobal eb yinatil Israel: A eb is c'ajol Rubén is babel c'ajol cham Israel, a ton Hanoc, Falú, Esrom, c'al Carmi; a ton eb ti' yajaw xol is makquiltakil yinatil Rubén.

¹⁵A ton eb ti' is c'ajol Simeón, a ton Jemuel, Jamín, Ohad, Jaquín, Zohar, c'al Saúl is yune' jun ix aj Canaán; a ton eb ti' yajaw xol is makquiltakil yinatil Simeón.

¹⁶A pax Leví 137 abil max eq'ui. A is bi eb is c'ajol, chi el yich yin nak is babel, cax chi apni yin nak is lajubal, a ton Gersón, Coat, c'al Merari.

¹⁷A eb is c'ajol Gersón, a ton Libni, c'al Simei, atac'ala' is makquiltakil.

¹⁸133 abil max ec' Coat; axa is bi eb is c'ajol, a ton Amram, Izhar, Hebrón, c'al Uziel.

¹⁹Axa is c'ajol Merari, a ton Mahli, c'al Musi. A ton juntzan eb ti' is yajawil is makquiltakil yinatil Leví, yetokc'al is yuninal eb.

²⁰A Amram max yi' yanab is mam chi yik Jocabed, a ton eb ay is yuninal Aarón yetok Moisés; 137 abil max ec' Amram tu'.

²¹A eb is c'ajol Izhar, a ton Coré, Nefeg, c'al Sicri.

²²A eb is c'ajol Uziel, a ton Misael, Elsafán, c'al Sitri.

²³Axa Aarón xin, max yi' Elizabet, is cutz'in Aminadab, yanab Naasón. Axa is yuninal eb ti': a ton Nadab, Abiú, Eleazar c'al Itamar.

²⁴A eb is c'ajol Coré, a ton Asir, Elcana, c'al Abiasaf; a ton is makquiltakil yinatil Coré ti'.

²⁵A Eleazar is c'ajol cham Aarón, max yi' is cutz'in Futiel a ton is txutx Finees. A ton eb ti' yajawil yayji yin makquiltakil yinatil Leví.

²⁶Axa Aarón yetok Moisés chi binaj bay jun lista ti', a ton bay eb ti' max yal Jehová, tol a eb chi ion eltek eb israel yul yet Egipto yin txolilal.

²⁷A ton eb max betic' k'anjab yetok cham reyal Egipto yet chi beklay eltek eb conob israel yuj.

²⁸Max k'anjab Jehová bay Moisés bay Egipto, max yaloni:

²⁹—Ayin ton Jehová in. Al bay cham reyal Egipto masanil tzet chi wal ayach ti', ẍi Cham.

³⁰Max tak'wi Moisés axca ti': —Mamin, caw c'am wal chi je' in k'anjabi, ¿tzet wal chi yun yaben cham rey tzet ok wala'? ẍi cham.