Read Q'anjob'al Ex 8 Bible Online

Ex 8 - Q'anjob'al bible

Ex 8

¹max yalon Jehová bay Moisés axca ti': —Asi' as il jun rey tu', cax chalon bay: Tol chi yal Jehová: Bekil in conob yet chi toj eb oc yin ayilal ayin.

²Tatol man ok a bekil in conob ti', ok waoc yailal eban, ok wak' pitzc'oj aj no pekey bay masanil yul nación ti'.

³Ok wak' pitzc'oj no' yul a' aej masanil, axa no' ok yaoctok ba yul a despacho, c'al bay chach wayi, ok ajtok no' sat a tx'at, cax ok octok no' yulak is yatut eb ayoc yin opiso etok, c'al yulak yatut masanil anima, c'al yulak horno bay chi watx'ji ixim pan cha lo', c'al bay satlak ak'in bay chi somlay ixim.

⁴Ok ajtok no' eban, c'al yiban eb ayoc yin opiso etok, c'al yiban masanil eb a conob, ẍi Jehová, cachi bay.

⁵Max yalon pax Jehová bay Moisés: —Al bay Aarón, tol chi yatok is k'okoch yiban masanil a' aej, a' coc'lak aej, c'al a' mimek najablak, yet chi ajol bulnaj no pekey, cax chi nojcan el yul yet Egipto yuj no', cachi bay Aarón.

⁶Max yaontok Aarón is k'okoch yiban a' aej bay yul yet Egipto tu'. Lajwi tu xin cax max ajol bulnaj no pekey, cax max nojcan el masanil yul yet Egipto yuj no'.

⁷Ac'ala' axca tu' max yut c'apax eb nak tz'akan c'ul yet, yetok tzet cuybil yuj, xan max jay c'apax pekey yul conobal Egipto yuj eb.

⁸Lajwi tu xin, cax max awtelay Moisés c'al Aarón yuj cham rey, max yalon bay eb: —K'anek bay Jehová, cax chi yion el no pekey ti' co xol, cax chin bekon el a conob ti', yet chi toj eb yak'on is xajanbal bay Cham, ẍi cham rey tu'.

⁹Max tak'wi Moisés bay cham rey: —Al xin, bak'in chin txajli bay Jehová, yet chi yiel Cham no pekey ti' en, c'al yin eb ayoc yin opiso etok, c'al xol masanil anima, c'al yul e yatut. Asanxanej yulak a' aej, chi cancan no', ẍi Moisés.

¹⁰—Yet yecal, ẍi cham rey. Max yalon pax Moisés: —Axca tu' ok yunej, cax ok ojtakneni tol c'am junokxa lajan axca Jehová co Diosal on.

¹¹Axca tu' ok yun yel no' bay a despacho, c'al bay yatut eb ayoc yin yajawilal etok, c'al xolak masanil anima, asanxanej no' ay yulak a' aej ok canok, ẍi Moisés.

¹²Max lajwi tu xin, cax max eltek cham Moisés c'al cham Aarón satak cham rey tu', cax max k'anon Moisés bay Jehová ta chi el no no' tu'.

¹³Max yikej Jehová tzet max k'an Moisés, cax max camil masanil no pekey bay yulak na, c'al bay satlak amak', c'al bay xolak te'.

¹⁴Cax max wajon aj eb anima masanil no camnak pekey tu' yin bulquiltakil bay masanil lugar, yobxac'al yoc jabil yuj no'.

¹⁵Asan yet max yilon cham rey tol c'amxa yailal ayoc yiban, cax max yak'on pax pitbok el cham is nabal junelxa, cax maj yikej tzet max yal bay Moisés, c'al bay Aarón, axca wal max yut yalon Jehová.

¹⁶Max yalon Jehová bay Moisés: —Al bay Aarón, tol chi yiaj is k'okoch cax chi mak'on pokokal tx'otx' yetok, cax chi occan pokok tu' yin coc' usal bay masanil yul yet Egipto, ẍi Cham.

¹⁷Axca ton tu' max yut cham Aarón. Max mak' pokok tu' yetok is k'okoch, xan masanil pokok ay yul yet Egipto max oc yin coc' usal, cax max oc no' yin eb anima c'al yin no no'.

¹⁸Ac'ala' eb nak tz'akan is c'ul max yut c'apax eb nak axca max yut cham Aarón tu' yaloni. Max yochej eb max oc pokok tu' yin coc' usal, palta maj je' yuj eb. Axa pax no us tu' max chilay eb anima c'al no no' yuj no'.

¹⁹A yuj tu xin, max yal eb nak tz'akan c'ul tu' bay cham rey: —A jun ti', a Dios chi uteni, ẍi eb nak. Palta max pitbi el nabal cham rey, maj cha yabej tzet max yal Moisés c'al Aarón, axca yalon Jehová.

²⁰Max yalon pax Jehová bay Moisés axca ti': —A yet yecal yet puch k'inibalilto chi toj jun rey tu' bay ti a' aej, yuj tu xin, chach pet aj wanok, cax chi toj alon bay: Axca ti' yalon Jehová: Cha bekil in conob yet chi oc eb yin ayilal ayin.

²¹Palta ta man ok a bekil in conob, ok watek no aja' eban, c'al yiban masanil eb ay yopiso etok, c'al yiban masanil eb a conob. Ok nojil masanil yulak na bay Egipto ti' c'al bay masanil sat tx'otx' yuj no'.

²²A yet ok uj juntzan tu', c'am wal junok no aja' ok ec' yul yet Gosén bay ayic' eb in conob. Axca wal tu' ok yun ojtaknen elok tol ayin Jehová in, Dios in bay masanil yulyibank'inal ti'.

²³Axca tu' chojtaknej elok tol ay is q'uexanil in conob ti' yintak a conob tu' yul in sat. Yet yecal c'am chi ec' saklemtok no aja', ẍi Jehová, cachi.

²⁴Axca wal tu' max yut Jehová. Axcaxac'al mub yec' no aja' tu', max apni oc no' yul is despacho cham rey c'al bay yulak yatut eb ay yopiso yetok cham, c'al bay masanil yul is makbej Egipto. Junelnej max yetnejtok no aja' tu' yul conobal tu'.

²⁵Max lajwi tu xin, cax max yawten cham rey tu' Moisés c'al Aarón, max yalon bay eb: —Asek, ak'ek e xajanbal bay e Diosal tu'; palta c'am chex el yul yet Egipto ti', ẍi cham.

²⁶Max tak'wi cham Moisés: —C'am chi je' axca tu', yujtol a no no' chi jak' yin xajanbalil bay Jehová co Diosal on tu', miman yelapnok no' yul sat eb et conob ti'. Yuj tu xin, ta chi yil eb anima tu' co mak'on cam no no' tu' on, wal yel chon is k'okch'ennej eb.

²⁷Yuj tu xin, yowalil chon toj on bay takin tx'otx', oxeb c'ual is tec'banil bay chon toj on tu'. Ata tu' chi toj jak' co xajanbal bay Jehová co Diosal on, axca max yut yaloni, ẍi cham.

²⁸Max yalon pax cham rey: —Chi je' e toj bay takin tx'otx' tu', yet chi toj e yak' e xajanbal bay Jehová e Diosal tu', asan ta yel man najatok chex toji, cax che k'anon bay Dios tu' wuj ayin ti', ẍi cham rey.

²⁹Max tak'wi Moisés bay cham: —Asan wal chin eltok cayti', cax chin k'anon bay Jehová, tol a yet yecal chi el no aja' ti' cayti' ayach ti', c'al bay eb ay yopiso etok, c'al bay masanil nación ti', palta c'amxa chon etnejc'al, cax c'amxac'al tzet ok al ayon yin toj jak'on co xajanbal bay Jehová, ẍi Moisés.

³⁰Maxc'al wal eltek Moisés bay yul is despacho cham rey, max k'anon yin txajil bay Jehová.

³¹Cax max yaben Jehová tzet max k'ana', max yion el Cham no aja' bay cham rey, c'al bay eb ay yopiso yetok cham, c'al bay masanil eb anima; c'amxa junok no' max cani.

³²Palta ac'ala' max pitnej pax ba cham rey tu' junelxa; maj chalay el conob Israel tu' yuj.