Read Q'anjob'al Ex 9 Bible Online

Ex 9 - Q'anjob'al bible

Ex 9

¹Max lajwi tu xin, max yalon Jehová bay Moisés: —Asi' bay jun rey tu' cax chalon bay: Axca wal ti' yalon Jehová co Diosal ayon hebreo on ti': Chatok in conob ti' yet chi oc eb yin ayilal ayin.

²Ta man ok a chatok, ta ok a mitx'c'al waayok,

³ok tit wowal cax ok wak'on ilya' yiban no a jobbejal no', cax ok cam masanil no' yuj ilya' tu', a ton no chej, no wacax, no camello, no burro, c'al no calnel, yetok no chiwo.

⁴Asanc'al masanil no' e yet ayex aj Egipto ex ti' ok camok, axa pax no' yet eb israel xin, c'am junok no' ok camok, ẍi Jehová, cachi.

⁵Max yalxac'alcan Cham is c'ual, max yaloni: —Yet yecal chi watek jun yailal tu', ẍi Cham.

⁶Axa yet junxa c'ual xin, max yaontek Jehová ilya' yiban no no'. Masanil no' is jobbejal no' eb aj Egipto max cami, axa pax eb aj israel xin, c'am junok no' yet eb max cami.

⁷Yin aymanil max chek cham rey toj il-layok ta c'am no' yet eb israel tu' max cami. Caxc'al yel toni c'am junok max cami, palta max pitbi pax el cham rey tu' junelxa, cax maj beklay el eb israel tu' yuj.

⁸Max lajwi tu xin, max yalon Jehová bay Moisés c'al bay Aarón: —Asek, iektek junok wokan tik'ak'il tan bay yul junok horno, cax ok tiẍon aj Moisés satak jun rey tu',

⁹cax ok saklemcantok axca pokok bay masanil yul nación Egipto, axa yaj yabil yin anima tu', c'al yin no no' yuj tan tu', ẍi Jehová.

¹⁰Max lajwi tu xin, cax max toj Moisés yetok Aarón yiontek eb tan bay junok horno, cax max toj eb yilon cham rey. Axa yet max apni oc eb satak, max tiẍon aj Moisés tu' tik'ak'il tan satcan, axa pitzc'oj aj yaxk'ayil yabil yin masanil anima tu', c'al yin masanil no no'.

¹¹Axa eb tz'akan c'ul, majxa je' tx'oxon ba eb satak Moisés, yujtol ya'ay eb yuj yabil axca yayji masanil eb anima bay Egipto.

¹²Cax max pitbi pax el is nabal cham rey junelxa yuj Jehová, cax maj cha yab tzet max yal Moisés c'al Aarón, axca max yut yalon Jehová bay.

¹³Max lajwi tu xin, max yalon Jehová bay Moisés: —Chach pet aj wan yet yecal cax chach toj k'anjab bay jun rey tu' cax chalon bay: Cay wal ti' yalon Jehová co Diosal ayon hebreo on ti', chi yaloni: Bekil in conob yet chi toj oc eb yin ayilal ayin.

¹⁴A yet jun tiempoal ti' ok watek juntzan yailal ti' eban c'al yiban eb ay yopiso etok, c'al yiban eb a conob, yet watx' chojtaknej elok tol ayin ton miman welapnok, cax c'am junokxa lajan axca in ayin ti' bay yulyibank'inal ti'.

¹⁵Ta chi yal in c'ul, chi je' in tx'oxon wipalil ayach cax chi waon oc yailal eban c'al yiban masanil eb anima bay a nación ti', cax chi je' e c'ayxac'al el bay sat tx'otx' ti'.

¹⁶Akxa xin, c'amto chach in c'ayilok yujtol wochwan chin tx'ox wipalil en, cax ay is may in binaj bay masanil yulyibank'inal.

¹⁷Caxc'al xiwil yailal chin tx'ox ela', palta cha pitnejc'al a ba, cax c'amc'al cha bekil in conob.

¹⁸Yuj tu xin, a yet yecal yab wal axca hora ti', cax chi waon ayc'ay ch'en sakbat yiban conob ti', tol c'amto bay chi yak' junok sakbat yelxac'al miman axca jun ok ay tu' yettaxc'al max tz'unchaj nación Egipto ti'.

¹⁹Yuj tu xin, al bay tol a masanil a jobbejal no', c'al masanil tzet ay xol a mulnajil chi occantok yulak lanchu, yujtol a yet ok jay ch'en mimek sakbat tu', masanil no no' c'al masanil anima tol c'am oc yenel, ok cam yuj ch'en, ẍi Jehová, cachi.

²⁰Ay eb nak ay yopiso yetok cham rey, max xiwcan aj yet max yaben eb yuj tzet max yal Jehová. Yuj tu xin, max yaoc eb nak yenel is jobbejal no', c'al masanil is chekbej eb, max occantok yulak lanchu.

²¹Ay juntzanxa eb maj yaoc yin c'ul tzet max yal Cham, cax max cancan is jobbejal no' c'al is chekbej yin cac'al tu'.

²²Lajwi tu xin, max yalon Jehová bay Moisés: —Iaj a k'ab can, yet chi ayc'ay mimek sakbat yiban masanil anima, c'al yiban masanil no no', c'al yiban masanil awoj ay bay yul makbej Egipto ti', ẍi Cham.

²³Cata tu xin max yiaj Moisés is k'okoch can, cax max mak'waj c'u c'al yaj joplabok rayo, axa yayc'ay mimek sakbat bay masanil sat tx'otx'al Egipto tu' yuj Jehová.

²⁴C'amxa chi oc wanaj yayc'ay ch'en sakbat, c'al mak'waj c'u, c'al joplabi. C'amc'alta' bay max binaj yak'on junelok sakbat yet yalantok yul yet Egipto axca jun owal sakbat max yak' tu'.

²⁵Masanil tzetak yetal ay bay Egipto, max etaxtok yuj ch'en mimek sakbat max yak' tu'. Max cam eb anima c'al no no' aycan yina', c'al masanil tzet ay xolak mulnajil, max lajwi can el yuj ch'en, c'al masanil te te' max k'ajcantok.

²⁶Asanxanej yul yet tx'otx' Gosén bay ayic' conob Israel, c'am wal junok c'otan ch'en sakbat max ayc'ayi.

²⁷Yuj tu xin, max chekon yawtelaytek Moisés c'al Aarón, yuj cham rey tu', max yaloni: —Mayal nachaj el wuj tinani' tol ayin ay in mul yetok in conobal ti'. Palta a Jehová, caw wal jichan yayji oc yuj.

²⁸Mayal ec' yiban mak'waj c'u c'al yayc'ay mimek sakbat. Yuj tu xin, majxa wiec' e tiempo, chi je' chex toj bay chi yal e c'ul: asan xin, matawal chi el yin e c'ul che k'an bay Jehová cax chi yion el jun yailal ti', ẍi cham rey.

²⁹Max tak'wi Moisés bay cham rey: —Asan wal yet chin elcantok yul conobal ti', cax chin mojban in k'ab yin txajil bay Jehová, cax chin k'anon bay, yet chi bek yak'on ch'en sakbat ti', cax manxa ok mak'waj c'u, yet watx' chi nachaj el oj tol yet Jehová yayji masanil yulyibank'inal ti'.

³⁰Palta wojtak sic'libil, tol tamwal ach ti', tamwal eb ay yopiso etok, ayxa yelapnok Jehová Dios yul e sat, ẍi cham Moisés.

³¹A jantak tzet awbil, axca an lino c'al cebada, masanil max etaxcantok. A ixim cebada ayxa sat, ac'ala' an lino ayxa is xumaquil.

³²Axa pax ixim trigo c'al ixim centeno, c'am wal tzet max oni, yujtol tzunanxa chi elolok.

³³Axa yet max lajwi k'anjab cham Moisés yetok cham rey tu', max el bay yul conob, cax max yion aj is k'ab can, cax max txajlican bay Jehová. A wal yet jun bek tu', max oc wanaj yak'on sakbat, c'al yay nab, c'al mak'waj c'u.

³⁴Axa yet max yilon cham rey tol c'amxa chi ay nab, cax c'amxa chi ayc'ay ch'en sakbat, c'amxa c'u chi bili, ac'ala' max oc is mul cham junelxa, max pitbi pax el is nabal cham, yetokc'al eb ay yopiso yetok.

³⁵Majxa beklay el conob Israel yuj cham, axca max yun yalon Jehová bay Moisés.