Read Q'anjob'al Job 10 Bible Online

Job 10 - Q'anjob'al bible

Job 10

¹¡C'amxa chi yochej in c'ul chin iquisbi ec'ok! Ok in jakwal el in yailal, ok in k'anjab yin in k'ak'alc'ulal.

²Ach in Diosal, c'amokab chacan oc in yobtakilal wiban, al ayin bay max oc in mul.

³Ach wal max quin ak' pitz'c'oj ajok, ¿tom watx' wal chi yab pax a c'ul yin quin etneni, c'al yin in entaknen elok, c'al chach oc yetok is yob nabalil eb yobtakwom?

⁴Tokwal lajan elwi axca jilwi ayon anima on ti'.

⁵Tokwal txennej a k'inal axca ayon cambejal on ti'.

⁶Yuj tu' xan tz'akakixac'al chi yun a sayon ec' in mul c'al in yobtakil,

⁷caxc'al mi ojtak tol c'am in mul, c'am junok mactxel chi je' quin is colon el yul a k'ab.

⁸A yetok a k'ab max quin a tz'aka', axa tinani' chi yochej a c'ul chin ak' lajwok.

⁹Natek tol yin tx'otx' tx'otx' max quin a watx'nej ajok; axa tinani', ¿tom chin apaxcan oc yin pokokal junelxa?

¹⁰Tol max a watx'nej jun in mimanil ti' axca chi yun watx'ji no queso yet chi pajbi no leche.

¹¹Ach max a junanej in bakil yuj in tx'anil, max aon c'apax oc in chibejal c'al in tz'umal yin.

¹²Max ak' wiquisal, max ak'on c'apax a watx'c'ulal win, ach max in a taynej, xan iquis intoc'al.

¹³A juntzan tzet yetal tu' toc'alta' ewanc'uan yayji yin a nabal, chi nachaj el wuj tol a juntzan tu' naanc'alta' oj win.

¹⁴Ta chi oc in yobtakil, naanc'al oj, man toc'alok ok in eloc yin tol man ok in ak' cuenta.

¹⁵Ta ay in yobtakil, ok'bal in c'ul. Ta tojol in, palta c'am chi je'xac'al woc a satak yin junc'ulalil, yujtol c'amxa chi techaj q'uixawc'ulal, naanc'al in yailal wuj.

¹⁶Ta chi wiaj can in ba, axa mi quin oktenc'al ec' axca chi yun yukten ec' no coj is chibej, masantac'al mi chi yal a tx'oxon el junok tzet yetal tol c'ayubtak win.

¹⁷Chi mi a say juntzanxa testigo. Chi mi ajc'al can tit owal win; axcaxac'al mi tit bululok soldado yin yak'on owal.

¹⁸¿Tzet wal yuj xan max quin a cha aljok? Matawal max quin cam yet c'amto junok mactxel chin iloni.

¹⁹Matawal asanc'al yet max quin el yin in txutx cax max quin ilaytok bay mukbanil camnak, axca tol maj in ictzojc'alta'a.

²⁰Yak'ban tol txennej ch'an in k'inal, a in can oc yin junc'ulal. Elok wal yin a c'ul chin acan oc yin tzalojc'ulal janic'ok,

²¹yet c'amto chin toj bay cambal xol k'ekk'inal bay tol manxa ok in meltzojok.*fn*

²²A ton bay jun lugar tol ayoc ewan, c'al tol moyan yili, bay tol a sakk'inal ti' axcaxac'al k'ekk'inal yayji, ẍi cham Job.