Read Q'anjob'al Job 12 Bible Online

Job 12 - Q'anjob'al bible

Job 12

¹Max yalon Job:

²¡E… caw wal watx' ex xin! ¡Asanxanej ayex e yojtak masanil jelanil anima! ¡A yet ok ex camok ok lajwok jelanilal!

³Palta xin, ayin ti' ay c'apax in nabal, man yelokxac'al tol yaynakil in e yintak ayex ti'. ¿Mac wal junok man yojtakok masanil juntzan che yal ti'?

⁴Caxc'al ayin ti' c'am in mul cax c'am in tacnakil, caxc'al max yab Dios in tewilal yet yalantok, axa tinani', a eb wamigo chi tzewi eb win.

⁵A eb caw wal watx' yayji, chi yintaknej el eb mac ok'bal c'ul yayji, a ton mac toxa chi ayc'ayi.

⁶A eb elk'om, ay tzalojc'ulal bay cajan eb; a eb chi tx'emon yowal c'ul Dios, c'am tzet chi on eb; tamwal ay tzet chi on tzet chi yak' Dios yul k'ab eb.

⁷K'anlej bay no no' c'al bay no' tz'iquin; chi je' ach cuyon no'.

⁸K'anlej c'apax bay no sat tx'otx'al no' c'al bay no txay ay bay yulak a' mar, chi je' yak'on no' a jelanil.

⁹¿Mactax junok juntzan no ti' man yojtakok tol a Jehová max watx'neni?

¹⁰A yul k'ab Cham, a tu' ay yiquisal masanil tol iquis.

¹¹A co ti' chi ablen tzetbil cawxi co lobej; cay c'apax tu' co txiquin, chi yab tzetbil yoc k'anej.

¹²A eb icham winak, ayxa is nabal eb, yujtol mimanxa is tiempoal eb, xan chi yi eb is jelanil.

¹³Palta a Dios xin, toc'alta' tol jelan, aj nabal Cham, ay c'apax yipalil yin yunen tzet chi na'.

¹⁴A tzet yetal chi yuchay Dios, tokwal ayto mac chi je' ca watx'nen ajok; a mactxel chi makchej Dios, c'am mactxel chi je' jakon eltek.

¹⁵Ta a' chi mitx'on waay nab, masanil chi takcan elok; ta chi bekiltek Cham nab xin, chi nic'chajcantok tx'otx' tx'otx' yuj.

¹⁶A Dios ay yipalil, yojtak masanil yin yel; a yul is k'ab Cham ayic' mac chi etnewi c'al mac chi etnelayi.

¹⁷A Cham chi ak'on c'ayil is nabal eb aom oc nabalej, cax chi occan eb juez yin c'am nabalil yuj.

¹⁸Chi cancan eb rey yin tol c'amxa yikbej yuj, yin t'iranil chi tojcan eb yin mosejal.

¹⁹Chi elcan eb sacerdote yin yopiso yuj, cax chi yak'on ayc'ay eb ay yikbej.

²⁰Yetok c'apax eb aom oc nabalej tol yipc'ulej yayji, toxac'al chi tz'injican el eb yuj, cax chi yion el is watx' beyc'ulal eb icham winak.

²¹A Cham chi ak'on yunej cax chi intaknelay el eb mimek yopiso. A eb tec'an, chi elcan yip eb yuj.

²²Chi yak' wal ojtaknelay el tzet yetal tol ewanc'uan yayji yuj, cax chi yion eltek bay sakk'inal tzet yetal tol ay xol k'ekk'inal.

²³A chi ion aj can nacionlak c'al yak'on lajwok; chi saklemnelaytok eb yuj, cax chi je' wajban pax oc eb junelxa.

²⁴A chi ion el jelanil eb yajawil conob, xan axca tol chi c'aycan ec' eb bay takin tx'otx' bay tol c'amxa be.

²⁵Toxac'al chi ec' matxatxok eb axca xol k'ekk'inal, toxac'al chi k'ek'on ec' eb axca wal bey eb uq'uem an.