Read Q'anjob'al Job 13 Bible Online

Job 13 - Q'anjob'al bible

Job 13

¹Masanil juntzan ti' max cam wal wiloni, max cam wal waben c'apaxok.

²A tzet yetal e yojtak ayex ti', wojtak c'apax ayin ti'; c'am bay yaynakil wayji e yintak.

³Palta chi wochej chin k'anjab yetok Dios, a yetok Cham chi je' yuj masanil, chi wochej chin teyelej in ba.

⁴Ayex ti', toc'al che makchej el bayc'al ijanilal yetok e lek'tial; lajan ex yetok eb aj an tol c'am tzet chi yantej.

⁵Matawal chex tz'inji, asan axca tu' chi txecloji tol ay e nabal.

⁶Chaek e yab wal tzet ok wal xin, yet ok walon tzetbil wal yayji oc in nabal.

⁷¿Chi mi wal e na tol ok ex colwaj bay Dios yuj e lek'tial tu'? ¿chi mi e na tol ay tzet ok yi' Cham yin?

⁸¿Toc'al mi che yaoc e ba yetok Dios? ¿Ma che yochej chex colwaj yetok Cham yin is teyelejbail?

⁹¿Palta tzet wal ok e yuncan che na', ta chex beyc'ulnelay yuj Dios? ¿Ok mi wal je' e yetnen Cham axca che yut junok anima?

¹⁰Caxc'al toc'al che yaoc e ba yetok Dios yin ewantakil palta ok ex tzulayc'alta' yuj Cham.

¹¹A is mayk'ak'al Cham ok ex ak'on xiwajok.

¹²A juntzan cuybej titnak yuj eb jichmam, a che yalubtanej, c'am yopiso, axca tik'ak'il tan. Ta asan yin juntzan cuybej eb jichmam tu' chi jaoc co nabal, lajan wal yetok tol a tx'otx' chi jaoc co murallaok.

¹³Axa tinani xin, tz'inc'al quex chi, yujtol ok in k'anjabok; titokab wiban tzet yetal chi tit yuj juntzan in k'anej ok wal ti'.

¹⁴¿Tzet wal chi wi' yin in colon el in cawil ti'? Watx' mi chi waoc in ba yin ay is mayil.

¹⁵Caxc'al mi a Dios chin ak'on camok, palta ok wac'al oc Cham yipok in c'ul. Ok in colc'alta' in ba satak Cham.

¹⁶Talaj c'uxan a yin jun tu' ay in colbal ba, yujtol a junok yobtakwom c'am chi tec'baj ba yoc satak Cham.

¹⁷Chi cam wal e taynen e yab xin, yin tzet ok yun waloni.

¹⁸Mayal in na in colbal ba, wojtak tol watx' ok in elocok.

¹⁹Ta ay mactxel chi je' yaloni tol ay in yobtakil, chi je' in tz'inji ayok cax chin camxac'al.

²⁰Ach in Diosal, cabnej wal tzet yetal chin k'an ayach, axca tu xin, chi je' woc a satak:

²¹Bekxa wal aon oc in yailal ti', cax c'am chin a xibtej aj yetok a mayk'ak'al.

²²Awtej in, cax ok in tak'wok ayach; ma xin, ayin babel chin k'anjab ayach, tak'wan c'apax ayin.

²³Al wal ayin, ¿baytak ayoc in mul tu' c'al yobtakil max wunej? ¿baytal wal ayoc bay max in ec' yiban tu'?

²⁴¿Tzet yuj xan cha c'ubaj el a ba ayin? ¿tzet yuj xan axcaxac'al junok ajc'ul chin otej?

²⁵Lajan in axca junok xak te' chi ilaytok yuj cak'ek', ma axca ch'im c'am yelapnok, yuj tu' xan ¿tzet yuj chin a xibtej cax chin okten ec'ok?

²⁶Ow chi yun ak'on queja win, toltax yuj tzet max wun yettax wach'ejal.

²⁷Chaoc cadena yin wakan, cax occanc'al t'anan yin wakan bay chin eq'ui, txequelnej bay chi je' wec' oj.

²⁸Yuj tu' lananxa in lajwi ay axca tzet yetal chi k'atok, axca pichilej tol mayal oc yijal.