Read Q'anjob'al Job 15 Bible Online

Job 15 - Q'anjob'al bible

Job 15

¹Max yalon cham Elifaz aj Temán:

²A mactxel jelan, man mojok tol chi tak'wi yin k'anej tol c'am yopiso, tamwal chi yiaj can ba yin yalon k'anej tol toc'al chi toj xol cak'ek'.

³Man toc'alok chi k'anjabi, tamwal chi k'anbalnej nabalej c'am yopiso.

⁴Ach Job, ach ti' chala' tol c'am yelapnok xiwc'ulal bay Dios, tamwal ay yelapnok acaw ayilal.

⁵Yuj a yobtakil xan caytu' chot k'anjab a ba, chochej che aytek co sat yuj a k'anej tu'.

⁶Manchak a na tol ayinto ok walaj a mul, ac'al oc a k'anej chi ak'on low en.

⁷¿Chi mi a na tol ach babel aljinak ach? Tokwal ayachxa yet max txecloj aj mimek witz.

⁸¿Tom acan oc a txiquin yet max naon Dios tzet ok yunej? Tokwal asannej ach jelan ach bay yulyibank'inal ti'.

⁹¿Tzet yetal ojtak ach ti' tol man jojtakok ayon ti'?

¹⁰A co jelanil ayon ti' max co cuy bay eb icham winak, ay eb tol icham winakxa yintak a mam.

¹¹A Dios chi yochej chach mimanc'ulnej, ¿tzet yuj c'am cha cha abej? Ayon ti' chi jal c'apax ayach yuj Cham yetok c'ununial k'anej.

¹²¿Tzet yuj xan chach el c'atan Dios yuj a q'uixawc'ulal cax chi cakbi a sat yuj owal?

¹³¿Tzet yuj xan tol cheil yowal a c'ul yin Dios, aymanxac'al chach k'anjab yin Cham?

¹⁴Tok ay junok winak tol watx'xac'al, cax tol c'amxac'al jabok is mul.

¹⁵Toltax eb ángel c'am oc eb yipok c'ul Dios, tamwal tol watx'xac'al satcan tu' yul sat Cham.

¹⁶Akxa aon anima on ti', ¿tom ay co watx'il? Yajbejtak on. Bekanxac'al co c'ul co chaon yobtakilal, lajanxac'al chi jut axca juq'uen aej.

¹⁷Ab wal tzet ok wal xin, a janic'ok tzet wojtak, a ok wal ayach.

¹⁸A eb aj nabal max on cuyoni, a eb tu' max cuycan eb bay yichmam.

¹⁹A eb ichmamej tu' asan bay eb max ak'lay tx'otx' tx'otx' tu', xan man somanok eb yetok eb tx'ok conobal.

²⁰A eb anima caw wal yob is beybal txench'an k'inal eb, yinc'al yatakilal chi yun yec' eb.

²¹Chi yab eb bil tzetak yetal cax chi xiwaj eb yuj. A yet tol c'amxac'al tzet yetal ok on eb yaloni, a yet tu' chi jayoc c'aybanilal yiban eb.

²²C'amxa tzet ayoc yipok c'ul eb, yin colchaj el eb xol k'ekk'inalil cambal; ijanxac'al oc ch'en cuchillo yin eb.

²³Axa no ostoc ok chioncantok is mimanil eb. Yojtak eb tol a tzet yetal ok tit yiban eb, c'am chi ec'tok.

²⁴A somc'ulal c'al bilc'ulal, a chi ak'on xiwaj eb, axca chi yun co xiwaj satak junok yajaw chi jay yak'on owal jin.

²⁵Cayton wal tu' chi yun jayoc yiban mactxel tol chi yiaj k'ab yin Dios, cax chi oc wal tec'ban ba satak Cham tol chi je' yuj masanil,

²⁶axca tol chi yiaj eb makbal julbalej, chi toj lemnaj eb yak'on owal yin Dios.

²⁷Caw wal bak'ech sat eb c'al mimanil eb.

²⁸A jun conob bay cajan eb, yobxac'al ok yuncanok; axa te na ok beklaycanok, axcaxac'al bay chi bulay k'alem, cayxac'al tu' ok yuncanok.

²⁹Man mimanok tiempoal ok ayjok ec' is beyomal eb, tamwal ok maklay mimanok tx'otx' tx'otx' yuj is jobbejal no' eb.

³⁰Tokwal tol ok je' colchaj el eb bay xol k'ekk'inal. Lajanxac'al ok yun eb axca junok moc'an awoj te', tol chi tz'atok is wol yuj k'ak'ej. Ok ak'lay lajwok yuj k'anej Dios yetok yowal c'ul.

³¹C'amokab chi yetnej ba eb yin yaon oc is nabal yin tzet yetal c'am yelapnok, yujtol c'am yelapnok tzet ok cha eb is paktzilok.

³²Ok cam eb yet c'amto chi ajapnok tiempoal, manxa ok aj can eb junelxa.

³³Lajanxac'al ok yuncan eb axca junok an uva tol chi ilay el sat yet c'amto chi k'inbi, axca junok olivo tol toc'al chi pukay is xumaquil.

³⁴A eb yobtakwom, tok ay yinatil eb ok ch'ibcan ajok. A jantak is beyomal eb, max yi eb yin tumin max cha eb yin ewantakil, toc'al ok tz'acantok.

³⁵Axca tu' chi yun jayoc yiban eb tol asan yatakil chi na chi low yin juntzanxa, a ti' yet eb tol asanc'al yin etnewomal ayoc is nabal eb, ẍi cham Elifaz.