Read Q'anjob'al Job 16 Bible Online

Job 16 - Q'anjob'al bible

Job 16

¹Max yalon cham Job:

²Mayal c'oli waben juntzan k'anej ac'ala' che yalubtanej. Che yaloc e ba mimanc'ulnewomal, palta asan yatakil che yi paxtek wiban.

³¿Tom c'am is lajubal juntzan e k'anej c'am yelapnok tu'? ¿Tzet chex oni, xan ac'ala'c'al che paktzej ayin?

⁴Matawal ayex caytu' e yayji axca wal wayji ti', chi mi je' c'apax chin k'anjab axca wal e k'anjab ti'. Toxac'al mi chi wak' bil in jolom yin quex in cuyoni, cax chi walon wal el xiwilok k'anej ayex.

⁵Akxa xin, k'anej mi yet iptzebal chi wal ayex yuj e mimanc'ulnelay xol e yatakil.

⁶Tokwal yuj chin k'anjabi chi oc wanaj in yailal yuj, tamwal yuj tz'inc'al quin chi, chi oc wanaj chi wabej.

⁷A Dios chi ak'on lajwok ay wip; max yion el masanil eb wamigo,

⁸cax chin aon oc axca yin presoal. Tz'umtak inxac'al, xan chi yal eb anima tol yobtakwom in, xan caytu' wayji.

⁹A Dios chi tzaklojc'al wintak, chin coc'axtok yuj, ijanxa wal chin yak' cam Cham axca wal chi yun junok no' chiwajwom no' xolak te'. Caw wal chi ocxac'al can t'anan win axcaxac'al tol wajc'ul.

¹⁰Xiwilxa chi waj ba anima win yuj in is buchon eb; chi mak'ontok eb in sat, cax chin yuten eb yin yaynakilal.

¹¹A Dios max in aon oc yul k'ab juntzan anima yob is nabal.

¹²Yin wal junc'ulalil ayin, max oc lacnaj Cham yin in nuk', max in coc'axtok yuj, max in yaon oc satak is julbal.

¹³Tzanxac'al bay chi julwajtek win; chi eq'uel julbal tu' yulak in mimanil ti', c'amxac'al yabenc'ulal. Sakleminakxac'al chi yuncantok yul in c'ul bay sat tx'otx'.

¹⁴Coc'tak yasxac'al max wuncantok yuj; chi ocxac'al win axca junok soldado caw wal tec'an.

¹⁵Caw wal max in nojcan el yuj cusc'ulal, max waon oc el pichilej, max lajwixac'al wikbej.

¹⁶Toxac'al max malaj in sat yuj ok'il; k'ektaninakxac'al wilwani.

¹⁷Caytu' wayji, caxc'al mi c'am mac max wetnej, a in txaj watx'c'al.

¹⁸C'amokab chi makaycan el jantak yobtakil max ak'lay wiban, c'amokab yechel tol man ok ablay in tewilal yin in k'anon tojolal.

¹⁹Toltax tinani' a in testigo ayic' bay satcan, a tu' ay jun ok in colonok.

²⁰A eb wamigo toc'al chi buchwaj eb win, palta ayin ti' chin ok'c'al satak Dios.

²¹Ayok wal junok mactxel chi k'anjab satak Cham yuj in watx'ilok, axca chi yun co k'anjab satak junok anima yuj is watx'ilok junokxa.

²²Yujtol a janic'xa wabilal chito cancan ti', lananxac'al yeq'uelok; yinxac'al aymanil ok in tok yul beal camich bay c'amxa chon meltzoji.