Read Q'anjob'al Job 17 Bible Online

Job 17 - Q'anjob'al bible

Job 17

¹C'amxa chi je' wion in cak'ek' chi wabej; lananxa lajwi ay in k'inal, axac'al in camichal chi wechbanej.

²Asan eb buchwajwom oyan oc win, masanil tiempo asan in tx'emlay cus yuj eb chi wila'.

³Palta ach ti' ach Dios, chi je' a tak'wi wuj; macto wali, asannej ach chi je' oj.

⁴Ach ti' max a makchej el is nabal juntzan eb wamigo ti', manchak in a cha' ayc'ay yuj eb.

⁵Ta ay mac chi yak' yobc'ulalil yin yamigo yuj tumin, axa yuninal eb ok yab eb yailal yuj.

⁶Ach max ak' yun eb, xan masanil eb yob tzet chi yal eb win, tol chi tzubli oc eb yin in sat.

⁷Toxac'al chi k'ektanil yul in sat yuj in bilc'ulal; c'amxa yip in mimanil ti'.

⁸A yet chi yilon eb anima watx' beybal tzet chin on ti', chi c'ayc'ul eb; chi tit yowal eb yin eb yobtakwom.

⁹Cax ok beyc'altok eb tojol yin watx' beybalil; a eb c'am yobtakil chi yunej, ok ajc'al can eb.

¹⁰Palta titanek, k'anjabanek junelxa. C'am junok aj nabal ok ilchaj wuj e xol.

¹¹Lananc'al yec'tok bel-labok c'ual in k'inal, axa masanil tzet yetal nabil wuj, c'al tzet chi wochej, mayal etaxcan elok.

¹²Ayex ti' a ak'balil ti' che yala' tol c'ualil, caxc'al ay k'ekk'inal, che yala' tol cawilxa chi jayoc sakk'inal.

¹³Asanxanej camich chi wechbanej, yet ok in ay telan way xol k'ekk'inal.

¹⁴Chi wal oc cambal in maminok, axa no patz ok in chionok, chi waloc no' in txutxok c'al wanabok.

¹⁵¿Tzet yetal chi je' waon oc yipok in c'ul? Tok ay mac chi je' yalon tzet watx' chi waoc yipok in c'ul.

¹⁶¿Ok mi octok jun tu' wetok bay puertail cambal, yet watx' junejxac'al ok yun co xew bay xol pokok? ẍi cham Job.