Read Q'anjob'al Job 18 Bible Online

Job 18 - Q'anjob'al bible

Job 18

¹Max yalon cham Bildad aj Súa:

²¿Bak'in wal ok xew a k'anjabi? Naanokabc'al tzet chala', axca tu' chi je' chon k'anjabc'al.

³¿Tzet yuj xan chon al noal, cax chon ot yin tol c'am co nabal?

⁴Toc'al chak' yasjok a ba yuj a chichonc'ulal. ¿Chim a na tol a yuj tu' ok cancan tx'otx' tx'otx' yin tz'inanil, ma ok q'uexchaj el ch'en mimek ch'en bay is lugar a yailok?

⁵Yelton wali, a yipc'ulalil junok yob is nabal ok tancan elok, axca junok tzektebalej c'amxa yechel ok aj xak.

⁶Ok tan c'apax is tzektebal yul yatut, c'amxa sakk'inal bay tu'.

⁷A yakan tol tec'an yip tinani', ok pax yip, cax ok ayc'ay yul yal max watx'nej ayok.

⁸Ok ay junok tx'an yal bay yul is be, ac'ala' yul jun tu' ok ayc'ayok.

⁹Ok ay junok lasu yul is be, a yin nuk' yakan ok oc sut'najok.

¹⁰A yal tu', c'uan el bay yul be, yet chi ayc'ay jun yobtakwom tu' yet chi ec' bay tu'.

¹¹Masanilxac'al bay chi eq'ui ok camxac'al chi yabej; tzakanxac'al oc yilomal bay chi ec' yaloni.

¹²Ok pax yip yuj wajil, a wal yailal ayxac'al ec'ok yet chi lowcan yiban.

¹³A ilya', a ton mitx'k'abok camich, yin jab jabil ok yak'on lajwok is mimanil jun yobtakwom tu'.

¹⁴Ok ilay el xol junc'ulalil bay cajan, cax ok jutxlaycantok bay satak miman xiwc'ulal, a ton camich.

¹⁵Tx'okxa junokxa ok cajaycan bay is cajlobal yujtol manxa yetok. A azufre,*fn* ok seclay cantok yul yatut.

¹⁶A eb yobtakwom, lajan eb axca junok te te' tol takinxa is xe', c'al is k'ablak.

¹⁷Ok c'aycan el is nabaniltek eb bay sat tx'otx' ti', junelnej c'amxa bay ok ak'lay binaj is bi eb.

¹⁸Ok ilay el eb bay sakk'inal cax ok k'oklaycantok xol k'ekk'inal; ok ilaycan el eb bay jun yulyibank'inal ti'.

¹⁹Tokwal ay yinatil eb ok can bay is conob, c'amxa junokxa yinatil eb tu' ok sataknencan yatut eb.

²⁰A yet ok ojtaknelay el tzet yetal max jayoc yiban eb yobtakwom tu', toxac'al ok xiwcan aj eb chi aben bay yichcan c'al bay yayub c'u.

²¹Caywal tu' ok yun lajwi ay is k'inal eb yobtakwom, a ton eb anima chi intaknen el Dios, ẍi cham Bildad.