Read Q'anjob'al Job 19 Bible Online

Job 19 - Q'anjob'al bible

Job 19

¹Max yalon cham Job:

²¿Bak'in wal ok e bek wal e tx'emon aj can in yailal, c'al e yak'on cus in c'ul yetok e k'anej?

³Ayexc'al oc e yalon yobal k'anej win. ¿Tom c'am chex q'uixwic'al quin e yuten axca tu'?

⁴Caxc'al mi ay in mul xin, asanc'al ayin chi titcan wiban yuj in mul tu'.

⁵Ac'ala' e maynenc'al e ba in satak, cax yuj in yailal ti' che yalon oc yin in sat tol yobtakwom in,

⁶palta naek wali tol a Dios max in mitx'oni, a Cham chin ak'on ayc'ay yul jun yal ti'.

⁷Ayin ti' chi el waw, chi waloni: Chin etaxi, quin chi. Tokwal ay mac chi tak'wi ayin. Chin k'an colwal yuj eb chin etneni, palta c'am mactxel chi watx'nen el in k'anej.

⁸A Dios max makchen in be, c'amxa chi je' wec'tok. Axcaxac'al tol xol k'ekk'inal chin bey yuj.

⁹Max pojaxcantok in beyomal; mayal yican el in mimanbilal.

¹⁰Masanilxac'al bay max jayoc yailal wiban yuj Cham masantac'al chi yal in lajwi ayok. Max c'ayxac'alcan el in yipc'ulalil axcaxac'al yoclay aj junok te te'.

¹¹Max bekwal yowal c'ul wiban, axcaxac'al junok yajc'ul chin yutej.

¹²Masanil is soldado Cham max jayoc oynaj win; toxac'al max oc oyan eb yin watut yet chi yak'on eb owal win.

¹³Max yut Dios tol a eb wuẍtak c'al eb wamigo max elaj eb in c'atan, comon animaxac'al chin yut eb.

¹⁴A eb wican c'al eb wamigo max in beklaycan yuj eb; c'al in tojcan c'ayc'ulal yuj eb.

¹⁵A eb cajan wetok bay watut, yetokc'al eb ix in chekbej, tx'ok animailxac'al wayji yul sat eb, majxac'al in nachajtek yuj eb.

¹⁶Ta chi wawtej junok eb in chekbej tu', tokwal chito tak'wi eb ayin, caxc'al tol chin tewi bay.

¹⁷A xob in ti' c'amxa chi cha c'ul xal wetbi, toxac'al chin yajlay yuj eb wuẍtak.

¹⁸Toltax eb unin chin yintaknej el eb; a yet chin yilon eb chi buchwaj eb.

¹⁹A wal eb yelxac'al watx' wak'on yetok, chin yajlay yuj eb; a eb tol chi camil in c'ul yin, mayal oc eb ajc'ulal win.

²⁰Mayal oc lotzan in tz'umal yin in bakil, asanxanej yichlak we ayto in bak'chil.

²¹Cusokab oc e c'ul win ex wamigo, yujtol a Dios max aon oc yailal wiban.

²²¿Tzet yuj xan tol chex tzaklojxac'al wintak axca chi yun Dios? ¿Tom mantoc'al k'okbilok quin e tx'emon cusok?

²³Tolok wal ay junok chi tz'iben masanil in k'anej ti' yin junok un; mata tol chi jotz'laycan oc yin ch'en ch'en.

²⁴Matawal ay junok chi tz'ibencan oc yin ch'en plomo yetok junok cincel tol hierro, cax chi cancan yin junelnej.

²⁵Wojtak, tol a mac chin coloni iquis ec'ok, a yet lajub c'ual ok jayoc waan sat tx'otx' ti'.

²⁶Caxc'al chi lajwi el in tz'umal ti', a yetok jun in mimanil ti' ok wiloc yin Dios.

²⁷Ayin wal caw ok wil wal oc yin; ayin wal caw ok wila', man tx'ok animailok yili ok wila'. Lanan lajwi ay yip in c'ul

²⁸a yet chi waben tzet che yal ayex ti': ¿Tzet wal ok yun co tx'emonc'al cusok yujtol ac'al oc chi iontek jun yailal ti' yiban? quex chi.

²⁹Xiwanek bay ch'en espada xin, a ton ch'en chi yak'balnej Dios yuj yowal c'ul yin yobtakil. Ojtaknejek elok tol a Cham ok beyc'ulnenok, ẍi cham Job.