Read Q'anjob'al Job 20 Bible Online

Job 20 - Q'anjob'al bible

Job 20

¹Max yalon cham Zofar aj Naamat:

²Ach Job, a wal ach ti', c'amxa chi je' tol chin tz'inji ay oj, yuj tu' xan chi wochej chin paktzej ayach.

³Max con a buch yetok a yobal k'anej, palta wojtak tzet ok yun in tak'wi ayach.

⁴Ach ti' ojtakxa, tol yettaxc'al max c'oli yayji anima bay sat tx'otx' ti',

⁵janic'nej chi mayji is tzalojc'ulal eb yobtakwom; a is tzalojc'ulal eb, junnej bek chi yak'a'.

⁶Caxc'al yelxac'al can ay eb axca canil bay ayaj satcan, axa is jolom eb chi ajtac'al apnok bay chi ec' asun,

⁷ok lajwok ay eb axca tza' no no', manxa yojtakok eb yamigo bay ok apnokcan oc eb.

⁸Toc'al ok c'ayaj eb axca junok wayich, c'amxa mactxel ok ilchaj eb yuj.

⁹A mactxel max ayji ec' yetok eb, c'al yilon yin eb, c'amxa bay ok il-lay eb yuj eb junelxa.

¹⁰A yuninal eb ok ak'on meltzoj bay eb meba' masanil tzet yetal max yelk'anej eb.

¹¹A wal yet tec'anto waay eb yin yach'ejal, ok aycantok eb bay mukbanil camnak.

¹²Yujtol a wal yobtakilal caw wal watx' max yab eb, caw wal max tzaloj c'ul eb yetok,

¹³caxc'al manxa chialok max yab eb.

¹⁴Axa pax bay yul c'ul eb xin, ok yutcan oc ba yin venenoal, ec'ban yintak yet no labaj.

¹⁵Ok xayej ajtek eb masanil beyomal max lo aytok, yujtol a Dios ok ion ajtek bay yul is c'ul eb tu'.

¹⁶Axca wal tol max tz'ubtok eb venenoal yet no labaj, a jun veneno tu' ok ak'on cam eb.

¹⁷Axca tu' man ok je' yak'on tzalojbok eb c'ul yetok xiwil tzet ay, axca leche, c'al no yal cab tol c'amxa yalbanil.

¹⁸A masanil tzet yetal max yican ec' eb, yowalil ok yak' meltzoj eb; majxac'al je' yak'on tzalojbok eb c'ul yetok is beyomal.

¹⁹A eb meba', maj col-lay eb yuj eb, palta tol max etax eb yuj eb. Axac'al eb etnewom tu' max occan yajawilal yin na tol manak eb max watx'nen ajok.

²⁰C'amxa jabok max colchaj yul k'ab is yochwan eb, xan man ok mayjok is tzalojc'ulal eb yin.

²²Yak'ban xiwil tzet yetal ay eb, a wal yet tu' ok jayoc bilc'ulal yiban eb. Ok ayc'ay eb yul k'ab eb c'am yabenc'ulal.

²³A wal yet chi yak'on noj eb c'ul, a yet tu' cax ok bekon Dios yowal c'ul yiban eb. Ok jay yiban eb, yak'ban chi low eb.

²⁴Tatol chito el eb bay junok espada tol hierro; axa julbal tol bronce ok low yin eb.

²⁵A jun julbalej tu' tojolc'al yeq'uel yul mimanilej, chi ec' el yul is tx'ix eb, cax chi tok'on eltok bay jun pac'xa, xan caw wal ok aj can miman xiwc'ulal.

²⁶A wal k'ekk'inal ok makchen el tzet yetal c'uan yuj eb, a jun k'ak' tol c'am chi tani. A jun tu' ok ak'on tz'atok eb yetok masanil tzet yetal ay bay.

²⁷A Dios ok tx'oxon el masanil is yobtakil eb, cax ok aj wan eb cajyom bay tx'otx' tx'otx' ti' yin yak'on queja eb.

²⁸A wal yet ok jayoc yowal c'ul Dios yiban eb, a masanil is beyomal eb ok lajwokcan ayok.

²⁹Caywal tu' tzet nabil yuj Dios yiban eb yobtakwom, a ton wal tzet watx'xa yayji oc yiban eb tu' yuj Cham, ẍi cham Zofar.