Read Q'anjob'al Job 22 Bible Online

Job 22 - Q'anjob'al bible

Job 22

¹Max yalon cham Elifaz aj Temán axca ti':

²Tok ay tzet ok yi' Dios yin junok anima, caxc'al tol aj nabal.

³¿Tzet wal yetal ok yi' Cham chi je' yuj masanil tatol tojol ach ma c'am a mul is satak?

⁴Tok yuj chak' serbil Cham yin ikemal xan chach beyc'ulnej c'al yaon oc a yailal.

⁵Palta yujtol a a yobtakil tu' xiwilxa, a a mul tu' c'am is lajubal.

⁶Max a k'an can ec' majanbilal junok a tzet yetal bay junok et animail, toltax checan ec' janic'ok is pichil ayoc yuj yin tol c'am tzet chi oc oj.

⁷A mactxel ay is takintial tokwal max ak' yuc'a'; a mac ay is wajil tokwal max ak' is lobej.

⁸Nabaxac'al caw wal ay is may a binaji, ay elapnok yul sat anima, max a na tol et masanil tx'otx' tx'otx' ti'.

⁹Ach ti' max a chek pax eb xal ix tol camnak yichamil yin tol c'am tzet chak' bay; cax max eoncan ec' tzet yetal ay yul k'ab eb tol c'amxa is mam c'amxa is txutx.

¹⁰Yuj wal tu' xan a ay is mayil toxac'al chi oc oyan en tinani', cax chaben wali tol ayach oc yin xiwc'ulal.

¹¹Yuj wal tu' axca tol k'ekk'inalxac'al yayji ayach, c'amxa chi je' elon jabok; axca wal junok elom aej chach ikon beyok.

¹²A Dios atac'al tu' ay bay yiban satcan, chi yilaytek waycan xol yakan caxc'al yel wal can ay waycan tu'.

¹³¿Tzet yuj xan chala' tol man yojtakok Dios co beybal, a yuj k'ek asun c'am chi nachaj yuj Cham tzet chi junej?

¹⁴¿Tzet wal ok ot alon ajok tol a Dios c'am chi yila', yujtol chi ec'jabtok yiban satcan tu', cachi?

¹⁵¿Tom chi yochej a c'ul chach tzakloj yintak beybal eb tenomtak?

¹⁶Max cam eb tu' yin junbekal axca chi yun yilaytok junok mactxel yuj junok elom aej.

¹⁷Max yalon eb bay Dios axca ti': Manchak on a teyej. ¿Tzet wal ok ji' yin Cham chi je' yuj masanil? ẍi eb.

¹⁸(Palta xin, a ton Cham max ak'on noj yatut eb yuj masanil tzetak yetal. ¡C'amokab chin na axca chi na eb tenomtak tu'!)

¹⁹A eb tojol ok yil eb lajwi ay eb yobtakwom, cax ok tzalojbok aj eb; axa eb c'am is mul toc'al ok tzewok eb,

²⁰a yet ok yilon eb tol a is beyomal eb yobtakwom ok lajwokcan ay tz'atok.

²¹Ach Job, aoc a ba yul k'ab Dios, ocan yin junc'ulalil yetok, axca tu' ok aj can a beyomal junelxa.

²²Chaokab a c'ul tol a Cham chach cuyoni; canokab wal yin a nabal is k'anej Cham.

²³Ta chach meltzojtek bay Cham chi je' yuj masanil, ok ach ilay aj can. Ta najat checan el yobtakil bay atut,

²⁴ta c'amxa yelapnok ch'en oro manxa watx'ilok yul a sat, axcaxac'al pokok ma axca ch'en ch'en ay bay yulak aej ok otej,

²⁵axa Cham chi je' yuj masanil, ok occan Cham a beyomalok, axca tol xiwilxa a plata.

²⁶Ok ach tzaloj yetok Cham, cax ok ach oc wal t'anan yin, yin junc'ulalil.

²⁷Tatol ay tzet ok a k'an bay, ok yab tzet ok ala', cax ok eken bay max ak' a ti' bay.

²⁸Caw wal watx'c'al ok ach eloc yin tzet yetal ok onej; a watx'c'ulalil Dios ayc'al oc eban.

²⁹Yujtol a Dios chi ion ay eb chi mimanej ba, cax chi col-lay eb yaynakil yuj.

³⁰A Cham chi colon mac c'am is mul, ok ach colchajok tatol c'am a yobtakil, ẍi cham Elifaz.