Read Q'anjob'al Job 23 Bible Online

Job 23 - Q'anjob'al bible

Job 23

¹Max yalon cham Job:

²Chitoc'al aj waw yuj in bilc'ulal, yujtol a Dios chitoc'al yatek in yailal caxc'al xiwil chin k'akwi.

³Matawal chi wojtaknej el baytal chi ilchaj Cham wuj, cax tzetbil wal chi yun wapni oc bay is despacho.

⁴Chi mi wal in cawxinakil satak Cham, yujtol xiwilxa tzet yetal chi je' waloni.

⁵Wojtakxa tzet ok yun in tak'wi bay tzet ok yal ayin.

⁶A Cham man mi ok k'anbalnej yipalil yin quin yak'on tz'injok, palta toc'al mi ok yab tzet yetal ok wala',

⁷ok mi nachaj el yuj tol yel chi wala', cax mi ok yalon tol c'am in mul; cay mi tu' ok yun in bekchajcan el yin tojbalk'inal yuj.

⁸Palta chin sayic' Dios bay yichcan, c'am mac ayic' bay tu'; cax chin sayon c'apax ec' bay yayubc'u, c'am pax chi ilchaj wuj bay tu'.

⁹A yet ay tzet chi yun Cham bay norte c'am chi wil yin Cham. Ac'ala' ta ay tzet chi yun bay sur, ac'ala' c'am chi wil c'apax yin.

¹⁰Palta a Cham yojtak in beybal; lajwi wak'lay porobal yuj, watx'xac'al ok yun wayji axca ch'en oro chi watx'ji xol k'ak'.

¹¹Ay inc'al oc yul jun be chi tx'ox Cham ayin, c'am bay chin elcan yin.

¹²Max wikejc'al is ley. Ec'banxa yelapnok is chekbanil yul in sat yintak in lobej.

¹³Asannej Dios, c'am junokxa chi je' tenon oc wanajok. A yet chi naon Cham yunen junok tzet yetal, chic'al yun yuj.

¹⁴A tzet yetal max na Cham tol chi yun win, chic'al yun yuj, ayc'al juntzanxa tzet yetal tol lajan yetok juntzan ti' nabil yuj.

¹⁵Yuj wal tu' xan caw wal chin xiw bay, asan yet chin naon Cham cax chi aj can xiwc'ulal win.

¹⁶A Dios chi je' yuj masanil, a yuj Cham chi pax wip yuj xiwc'ulal.

¹⁷Palta c'am chin tz'inji ay yuj k'ekk'inal yet k'ekbut, caxc'al c'amxa chi je' wilon yuj.