Read Q'anjob'al Job 24 Bible Online

Job 24 - Q'anjob'al bible

Job 24

¹¿Tzet yuj xan c'am chi yal Cham chi c'al je' yuj masanil, c'ual yet ay beyc'ulal yuj? ¿Tzet yuj nabac'al chi yechbanej eb ojtaknen Cham jun c'ual tu'?

²A eb yobtakwom chi q'uex eb mojonal is tx'otx', chi yelk'anej eb no calnel yuj yaj can bisil yet eb.

³Chi tok'lay ec' no is burro eb meba' yuj eb, cax chi yion ec' eb is wacax eb xal ix camnakxa yichamil, yuj majanbilalok tumin.

⁴Chi ilay el eb meba' yul be yuj eb, c'al eb anima yaynakil chi c'ubaj el ba eb bay eb.

⁵A wal eb meba' lajanxac'al chi yuncan eb axca no xolakil teal burro bay tz'inan tx'otx', puralxac'al chi ilchaj is lobej. A bay tz'inan tx'otx' tu' chi yi eb lobej yuninal.

⁶A bay is mulnajil eb tx'ok animail, a tu' chi toj eb sic'aj jolom trigo, chi toj c'apax eb say yil bay yawoj uva eb yobtakwom.

⁷A eb meba' tu', c'am is pichil eb ayocok chi ec' ak'bal, c'am jabok tzet yetal chi colon eb bay sic.

⁸Caw wal chi ch'acay eb yuj nab bay xolak te', cax chi occantok nojan eb yebaj ba bay yulak na ch'en.

⁹Chi yiec' eb yobtakwom tu' eb unin lananto txutxwi yet eb xal camnakxa yichamil, yuj majanbilalok junok tzet yetal.

¹⁰A eb meba' unin tu', chi ec'jab eb yin tol jabjab ch'an pichil eb ayocok. Chi ec' eb ikoj trigo palta lanan cam pax eb yuj wajil.

¹¹Chi yak'on bil eb ch'en ch'en yet molino yet chi yion eltek eb aceite. Chi tec'wi uva eb yet chi watx'nen eb vino, yak'ban tu' lanan cam pax eb yuj takintial.

¹²Chi el yaw eb yas ay, lananxa cam bay xol conob. Palta c'am chi yab Dios is txaj eb.

¹³Ay mactxel c'am chi yochej sakk'inal, c'am chi ec' yul beal tojolal.

¹⁴A junok mak'om cam anima chi pet aj wan yet chi toj mak'cam junok meba', axa yet chi k'ekbican ayok, cax chi yutencan oc ba yin elk'omal.

¹⁵A eb ajmul asan tol chi yechbanej eb k'ekbi. Chi naon eb: C'amokab mac chon iloni, ẍi eb, palta tol chi makchej eb sat.

¹⁶A eb elk'om tu', a yet ak'balil chi toj eb elk'an bay nalak. A masanil juntzan eb tu' tol chi makchej ba eb yet c'ualil; c'am chi cha' c'ul eb sakk'inal.

¹⁷A eb tu', chi xiw eb bay sakk'inal, palta caw wal chi tzaloj aj eb yetok k'ekk'inal, bay chi xiw juntzanxa anima.

¹⁸Palta a eb yobtakwom tu' lajanc'al eb axca sukuwal aej, axa is tx'otx' eb chi cancan yalan catab k'anej, xan c'amxa mactxel okto mulnaj bay is yawoj uva eb.

¹⁹Axca chi yun c'ayaj yal sakbacom yuj k'ak'al yakan c'u, caytu' ok yun c'ayaj eb yobtakwom yul mukbanil.

²⁰Chi tojcan eb c'ayc'ulal yuj is txutx; axa no patz chi chioncantok eb. Tok ayto junokxa mactxel ok naontek eb. A junok yobtakwom tu', chi ayc'ay axca chi yun k'aklay aj junok te te'.

²¹Chi etax eb ix ix c'am yune', c'al yetok eb xal camnakxa yichamil, tokwal max col-lay eb xal yuj eb.

²²Chi ilaytok eb ay yip tu' yuj Dios yetok yipalil. A wal yet chi tx'oxon Cham yipalil, tok ayto mac c'am chi xiw bay camich.

²³Ta chi el yin c'ul Cham tol chi ayji ec' eb yobtakwom yin junc'ulalil xin, palta ayc'al oc sat Cham yin eb bay chi ec' eb.

²⁴Yin wal jun bekal chi je' yaj wan eb yobtakwom; ac'ala' yin jun bekal chi c'aypax el eb. Chi ilay ay eb, chi tojcan eb bay camich axcac'al chi yun juntzanxa anima. Chi c'uplay el eb axca chi yun c'uplay el jolom ixim trigo.

²⁵Tatol man cayok tu' yoqui, mac wal junok chi je' yaloni tol lek'tial chi wala', tol c'am yelapnok in k'anej ti', ẍi cham Job.