Read Q'anjob'al Job 26 Bible Online

Job 26 - Q'anjob'al bible

Job 26

¹Max yalon cham Job:

²E… caw wal miman a colwal win, yin in bilc'ulal c'al in c'unjabinakil.

³Watx' xin, ojtak wal chak' nabalej c'al cuybanilej ayin yin in c'am nabalil.

⁴¿Mactxel max alon ayach xan chal juntzan k'anej tu'? ¿Mactxel max ach ikbani xan chach k'anjab axca tu'?

⁵Caw wal chi ec' tx'umumok eb camnak ayic' yul tx'otx' tx'otx' yalan a' mar yuj yailal.

⁶A cambal bay ayic' eb mayal c'ayilok, man ewanc'uanok yayji oc satak Dios.

⁷A Cham max jenbantok satcan bay norte yiban bay tol c'am tzet, max watx'nej oc tx'otx' tx'otx' yin tol c'am bay batxan ocok.

⁸A Cham chi makchen cantok a' aej xol asun, palta c'am chi pojtok asun tu' yuj yalil a'.

⁹A' chi makchen el sat xajaw; caxc'al tec'an xajaw tu', chi makay el yuj asun.

¹⁰A Cham max aon ay yechel bay chi apni a' aej, a ton mojonal nan xol sakk'inal yetok k'ekk'inal.

¹¹Tatol a Dios chi tzuwaji, a bay chi apni oc batxan satcan, caw wal chi bilaj yuj xiwilal.

¹²A yetok yipalil chi aj somnaj a' mar; yetok is jelanil max ayc'ay no' miman Rahab yuj.

¹³Toc'al chi xu', mayayixac'al chi yuncan satcan tu' yuj, yetok is k'ab chi chucon cam no labaj xoyoyi toji.

¹⁴A juntzan c'ayubtak ti', axca wal tol tilakc'al is yunben Cham. A tzet max jab ti' toc'al max co txam abnej. Akxam wal tol tz'akan chi yun jabeni, tok mi wal ok nachaj el juj, ẍi cham Job.