Read Q'anjob'al Job 27 Bible Online

Job 27 - Q'anjob'al bible

Job 27

¹Max k'anjabc'al cham Job:

²Chi wak' in ti' bay Dios, Cham chi je' yuj masanil, a ton Cham c'am chi yal c'ul watx'nen el in k'anej, a ton chin aon oc yin bilc'ulal,

³tol yak'banto wal chi yak' Cham wip yet chi je' wion in cak'ek',

⁴c'amc'al bay ok wal tzet man yelok, tamwal ok wal lek'tial k'anej.

⁵C'am yechel tol ok wala' tol yel che yala' yak'ban iquis into, man ok in cha wabej tol yobtakwom in.

⁶Ok walc'al tol tojol in, man ok in q'uex in k'anej. Chin beyc'ulnej wal in ba tol c'am in mul chi wabej.

⁷Jayokab yailal yiban eb ajc'ul oc win, a ton eb chin ak'on queja axca wal yailal chi low yiban eb yobtakwom c'al eb man tojolok.

⁸¿Tzetto wal yetal ayoc yipok c'ul eb yobtakwom, yet chi yion el Dios is k'inal eb?

⁹A yet ayoc eb yin yatakilal, c'am jabok ok cha yab Dios is tewilal eb.

¹⁰Yujtol maj yi' eb is tzalojc'ulal yin Cham tol chi je' yuj masanil. Tokwal max tewic'al eb bay.

¹¹A tinani' ok in tx'ox is miman yipalil Dios ayex, c'al tzet yetal tol nabil yuj Cham tol chi je' yuj masanil.

¹²Tatol e masanil ayex ti' mayal e yila', ¿tzet yuj xan a tzet yetal tol c'am yelapnok che yala'?

¹³A jun yailal ti', chi yak' Dios, Cham tol chi je' yuj masanil paktzebalok bay eb yobtakwom.

¹⁴Caxc'al xiwil yuninal eb, yowalil ok cam eb xol owal ma yuj c'amxa tzet chi lo eb.

¹⁵A eb chito iquisbican xol eb xin, axa ilya' ok on cam eb tu', axa eb xal yistzil eb chi cani, tokwal ok ok' eb xal yuj eb.

¹⁶A eb yobtakwom tu' caxc'al chi wajbaj eb plata axca yec' bulan tx'otx' tx'otx', caxc'al xiwil yec' bulan is pichil eb,

¹⁷a mi junok winak caw wal yikem ok k'anon juntzan pichilej tu', a mi junok winak tojol ok yak' nabal yetok ch'en plata tu'.

¹⁸A yatut eb yobtakwom tu', caw wal c'un pojtok axca wayub no tzolol ij bay chi ch'ibi, axca junok lanchu ilbal awoj xol mulnajil.

¹⁹A eb yobtakwom ok ay telan eb way yin lajub ak'bal yetok is beyomal, axa yet ok el lenaj wayan eb c'amxa is beyomal tu'.

²⁰A xiwc'ulal ok lowxac'al yin eb axca elom aej, axca chi yun xulay bey junok tzet yetal yuj owal cak'ek' nab yet ak'balil.

²¹Yin wal jun bek ok ilay el eb bay ayic'ok axca chi yun yilay bey junok tzet yetal yuj junok owal cak'ek' chi tit bay yichcan.

²²C'amxac'al yabenc'ulal ok yun yilay bey eb caxc'al chito yak'lej eb yelajok.

²³A jun owal cak'ek' tu' axcaxac'al tol chi tzewi yin eb, tol wal ok uẍli toj yintak eb, ẍi cham Job.