Read Q'anjob'al Job 28 Bible Online

Job 28 - Q'anjob'al bible

Job 28

¹Ay minas bay chi ilay eltek ch'en plata, ay c'apax bay chi watx'ji ch'en oro.

²A ch'en hierro chi ilay el ch'en bay tx'otx' tx'otx', axa ch'en ch'en xin, a yet chi tz'a ch'en, chi eltek ch'en cobre yin.

³A eb anima, c'amxa yelapnok k'ekk'inal bay eb; chi aytok eb bay yulak olan tol najat yich. A bay xol k'ekk'inal tu', a tu' chi say eb ch'en ch'en.

⁴Chi jakajtek eb minas bay najat ayil bay tilak conob, a ton bay juntzan lugar bay c'amxa chi ec' anima, ayxa is may. Yetokxa lasu chi ec' t'ununok eb.

⁵A bay sat tx'otx' tx'otx', chi ch'ibaj tzet chi loji, axa bay yalan tx'otx', uchquiltak yayji axca tol yuj k'ak'ej.

⁶A bay tu', chi ilchaj ch'en zafiro, yetok ch'en oro soman yetok tx'otx'ej.

⁷Tamwal no tx'acbaj, tam junokxa makan no no', chi ilchaj beal minas tu' yuj.

⁸A no chiwajwom no' c'amxa chi ec' no' bay tu', tamwal no coj.

⁹A eb winak chi oc lacan eb bay yinlak sat ch'en tu', cax chi c'oli joton ajtek eb xelak mimek witz.

¹⁰Chi jot eb olan najat chi yun yich bay satlak ch'en, cax chi sayon yil eb masanil pojanil beyomal ay bay tu'.

¹¹Chi jakon ajtek eb nuk'lak aej bay tu', cax chi yion ajtek eb bay sakk'inal tzet yetal tol ewanc'uan yayji.

¹²Palta ¿baytal chi ca tit oc jelanilal? ¿Tzet lugaril bay ay aj nabalil tu'?

¹³Man yojtakok eb anima jantak yelapnok jun tu', tamwal chi ilchaj aj xol eb.

¹⁴Caxc'al chi co sayic' bay najatil yich a' mar, man ok ilchaj juj bay tu'.

¹⁵C'am chi je' co manon yetok oro, tamwal yetok plata.

¹⁶C'am chi je' chi tojlanelay yetok oro caw wal watx', tamwal yetok ch'en cornalina ma ch'en zafiro.

¹⁷Xiwil is tojol yintak ch'en oro c'al ch'en vidrio, c'am chi je' chi q'uexlay yetok ch'en naba oro watx'nebilxa.

¹⁸A jelanilal yelxac'al ochebil yintak ch'en coral; a ch'en cuarzo c'al ch'en perla c'am chi je' lajlen ba yetok.

¹⁹A ch'en crisólito chi tit bay Etiopía c'am chi je' lajlen ba yetok, tamwal chi je' chi tojlanelay yetok ch'en oro yelxac'al watx'.

²⁰¿Baytal chi ca tit oc jelanilal tu xin? ¿Tzet lugaril bay chi ilchaj jun aj nabalil tu'?

²¹A jun tu' c'uan el bay masanil anima iquis, toltax c'am chi yil no tz'iquin.

²²A cajlub pixanej c'al camich, max yal eb axca ti': A is k'umal jun tu' toc'al max sajlay jabej, ẍi eb.

²³Palta a Dios yojtak beal jelanilal; asan Cham yojtak bay chi ilchaj yuj.

²⁴Yujtol chi yil Cham masanil is lajubal tx'otx' tx'otx', yetokc'al masanil tzet yetal ay bay yalan satcan ti'.

²⁵A yet max watx'nencan oc Dios yipalil cak'ek', c'al yaoncan oc mojonal a' aej,

²⁶a yet max watx'nencan oc leyalil nabilk'inal c'al tx'oxoncan oc beal rayo c'al mak'waj c'u,

²⁷a yet tu', max yilon c'apax jelanilal tol caw wal miman yelapnok, max beyc'ulneni, max yilon xin tol watx' toni.

²⁸Max yalon Dios bay eb anima axca ti': Ta miman welapnok yul e sat, a ton wal jelanilal tu'; ta che poj wal el e ba xol yobtakilal, a ton wal aj nabalil tu xin, ẍi Cham, ẍi cham Job.